Isaia 34 - Iaai Bible 1901 (New Caledonia)

¹ ÖBUN ta je hnyei lö, hakekeny dö he ka long; ke öbun tavat, tevehlöng ju: e so ame he hnyei me unöngötiny ka long, me hmeledrany minya me ta je ûnyi hia ame kû hnyin.

² Anyin a e but hmonyin anyi Iehova hon ta je hnyei hia, me anyin wathethot hon anyidra ta je utbavat hia: e a hia but ohiʼ ödra, e a hia but hnʼ ödra, inʼ adre me he ka hlingʼ ödra.

³ Ke adre me he ka degec ta je hna hlingâ unyidra, kʼ ame he ka hu bokonginy je unyidra ae mok, kʼ ame he ka köiö but je bucen ge drödra.

⁴ Ke ame he ka aû but ta je döiny drany hia, ke adre me he ka vhec drany helâ me tusi: ke ame he je dö hnyin e ka kolu helâ me lan vine ame kolu, ke helâ me lan ae meleca ûnyi huyi imeta.

⁵ Anyin a sekon dut anyik hele vat ge hnen hna ijem hnyi drany: wâ bi, e ame he ka utut hon Edoma me hon tavat oge me hangâ, mʼ adre me owisa.

⁶ A sekon dut ge dra hele vat anyi Iehova, adre me opipikhenya e hnen dren lakon ta je mamoe me ta je got, me pipikhenyainy je wagien je mamoe baga: anyin ae hu hut kö Iehova hnyi Bozera, me ûhlingö ae gan hmâ hnyi knyei Edoma.

⁷ Ke ame he je bolokiny hnyot ka tha ta mödra, me je nokon kau me je bolok; ke ame he ka monu idra hnyei ge dra, me ame he ka opipikhenya könödra kânâ.

⁸ Anyin a wale bong bi hwaban ga Iehova, hunainy bi hwaban hulo hnyi hna ivino ge Ziona.

⁹ Ke ame he ka wia je wageweiny me me tar, ke adre me he ka wia sesâiny me me teio, ke ame he kânâiny ka tar ame hiâ.

¹⁰ Adre me ca he ka ume e hnyi lit me lany; ame he bala bi ka o hainy: ame he ka ba wan e, hwân hnyi ke dö ke ne o but ka hnyi ke dö; e ba at ame he ka vheno e nyiele balua.

¹¹ Ke ame he ka iny kati me kifoda, ke ame he ka labā e mun me oreba: ke e ame he ka inâ hon e tulutiny imonumonuny, me tulutiny e ba onyen.

¹² Adre me he ka hawâ tavat ae beönua he ka musi, ke ba at eling; ke ame he ka ûnyi baû hia je thaniny.

¹³ Ke ame he ka kû ta je iwatetaföcö hnyi je uma umen je thaniny, ke je vhat me iwadekong hnyi je hnabâiny: ke e ame he ka hnân hnen je luko me je mun.

¹⁴ Ke ame he ka iouny eling je menoiny hnyebuba me je luko, kʼ ame he got baga ka hawâ hanen; eke, ame he ka hnen ling lilith, me wâ hobi kâu e hna menâ.

¹⁵ Ame he minya kifosa ka bi hâûen eling, me hip akuny, me tho wakuny me ûkhacaköuâ lakon hmelen e: eke, ame he minya je da a ka ûkhacaköu eling, a ûsa lo.

¹⁶ Elâm dʼ öbun tusi anyi Iehova, ke aû thö: ame ca he ka hia ke at a khaca gadra, ke ame ca he bi ka ba ûcon: anyin a hia but hûna e hnen hnyimök, ke a ûkhacaköuâ e ge hanon.

¹⁷ Ke e ame ugleköpi ödra, ke ame khenâ ge hnyamen kodra hoton tulut: ame he ka idra nyiele balua, adre me he ka laba eling hwân hnyi ke dö ke ne o but ka hnyi ke dö.