Isaia 27 - Iaai Bible 1901 (New Caledonia)

¹ HNYI bong eling ame he Iehova ka bi hwaban ge anyin hele vat ae nâk me gan hmâ me hwege kö leviathana, on ame kec logot, me leviathana on ame hwahwali; ke ame he ka hlingâ tanimo wale hnyi köiö.

² Hnyi bong eling: hnyei vine ae kese, khumöng dö kâu.

³ Inya Iehova at ame tuö e; oge me he ka labö hû e hnyi je ong ûen hia, oge me he ka tuö e hnyi lit me lany, wâ e nye okongoâ e hnen ke at.

⁴ E ba wathethot unyik; e na tot metâ könya je iwadekong me watetaföcö hnyi vat! oge me he ka he kodra, oge me he ka tha thong degeci ödra.

⁵ Ke walang khaca, e so e ame kât tang hwegiök, me me ûsoköu mönya.

⁶ Hnyi ûen ame he ka o me ame he Jekob ka hu iwân; kʼ ame he Isaraela ka vhei me vhong: kʼ ödru me he ka ounöngötâ hon hmeledrany ge ta je wan ûö.

⁷ Hawa, e ame kot e bi helâji me hnen hna kot tavat adre me kot e? ke hawa, adre me hlingâ e bi helâ me hnen hna hlingâ tavat adre hlingâ e?

⁸ Hnyi tulut, hnyi ûen u je obâ e, u je oû e; e ame hia but hom e ge ang ae hwege hnyi bonginy ang hwei.

⁹ Anyin a wale adre me he ka hneû degecâ hulo anyi Jekob, ke walang wan hia hnyi hna ohia anyin hulo; e ka ânyâ je vetoiny hia taben hut, me me helâ me veten inyâ veto adre me oamamâ, me me ca he hmetu ka tot je Aseira, me je hna theati seûno.

¹⁰ Anyin ame hake laba taun adre up haginy, hnyaba ae ba wan kʼ adre degec ut, helâ me hnyebuba: ame he ka han tot eling nokon kau, kʼ ame he ka mokut eling, me an ta je anginy.

¹¹ Ke e ka meleca ta je vheiny, me adre me he ka thu degecâ; ame he omomo ka he bi, me thong ut ge meic: anyin a e hnyei ame ca wâhmakhmeto; anyin a wale ame ca he ka betenge gadra at ame up ödra, ke haba at ame otilʼ ödra, me ame ca he bi ka ânyâ so ködra.

¹² Hnyi bong eling ame he Iehova ka tau wan, hwân hnyi wadutöiny Wagewe, ke ne o but hnyi wageweiny Aigupito, kʼ adre me he ka hlu öbun a ûsa khaca, öbun lakon Isaraela.

¹³ Ke haba hnyi bong eling, me adre me he ka tûâ trutru ae gan; ke ame he ka he tavat wale adre me hakekeny ka mok hnyi hnyei Asuria, me tavat adre me hna degecâ hnyi hnyei Aigupito; me adre me he ka hmi kö Iehova hnyi bucen ae kap hnyi Jerusalema.