Isaia 24 - Iaai Bible 1901 (New Caledonia)

¹ WÂ bi, Iehova ame öba ûnyi hnyi hmeledrany, me öba waniny, me ohnyimenâ e hnyikânâi, me oveseâ tavat adre me labā e.

² Ke walang bongon ame he ka o, khaca thibi tulut ka tavat me at bi hut; khaca thibi tulut ka athnyaba me tuhan; khaca thibi tulut ka athnyaba momo me momo a tuhan; khaca thibi tulut ka at ûco ke ûnyi me at kap hwaban gan; khaca thibi tulut ka at ame mē ham ke ûnyi me at ame mē sumâtâ e; khaca tulut ka at ame mē ham mone ge hwaban me at ame mē hom mone ge hwaban.

³ Ame he ka ti ba onyen hnyei, me ti söh; anyin a hia but Iehova ha hofuc ang.

⁴ Ame hlöuhlöu tavat me meleca, ame sēnyin hmeledrany me meleca, adre me sēnyin je tavat ae be-önua hnyi hnyei.

⁵ E ikiki hnyei hmelen tavat adre me labā e; anyin adre me hanyâûâ ta je hnanyibu, me wia hna otilâ, me thu hna ûhihinyköu a nyiele balua.

⁶ Anyin a wale ame an hnyei hnen hnaûhango, ke adre wâ joniny tavat adre me labā e; anyin a wale adre me thong degecâ tavat adre me labā hnyei, ke ödra wakhalet biju je kolon.

⁷ Ame tenge waina adre teb ânyâ, kʼ ame sēnyin vine, adre me mâng hia tavat ae hnyok senyin.

⁸ E hia but senyininy bwinybet, a um dö hwan tavat senyin, e hia but senyininy kitara.

⁹ Adre me ca he ka ic waina me khumöng; kʼ ame he ka hiny grâg ka tavat adre me ijem e.

¹⁰ Adre me hagutâ taun ae monumonu: adre hlöng je uma hia me me ca he bi at ka dit.

¹¹ Adre me tenge eû hnyi gethen can waina; e lit ut senyin hia, e hia but hobâ anyin tavat.

¹² E ba onyen hnyi taun, ke adre kot homagöule ge hnaûhango.

¹³ Anyin ame he ka helâe bi hnyi hmeledrany unyin je hnyei, helâ me hna jijingâ ûö elaio, ke helâ me je wan vine adre me hlo, ödra ka hia but tau je wan.

¹⁴ Ame he tavat eling ka hongot goranyai me kuku; kʼ adre me hongot goranyai ûnyi hnyi köiö ge hmanenangi Iehova.

¹⁵ Anyin a wale, oganö Iehova thö hnyi jimeio, ke hnyi je bomene hnyi köiö, wale iö Iehova, a Khongon Isaraela.

¹⁶ Ate me hia but long je khumöng ûnyi hnyi can hmeledrany, hna ogânâ tavat ae wisa. Ke haingök, Oge me delâ tot, oge me delâ tot, ekölö gak! a hia but iyawo ge tavat iyawo; eke, ame iyawo gan hmâ hnen tavat iyawo.

¹⁷ Aten hmeledrany lö, e but unyâm ot, me thop, me hnewe.

¹⁸ Ke ame he ka ta ka hnyi thop at ame kec ge hwan ûnyi hnân ootâ; ke ame he ka hnok hnyi hnewe at ame ölö ûnyi hnyi thop: anyin adre me khong ut je mamalamainy drany, me ame bwebwet dö je taben hmeledrany.

¹⁹ A ti mou but hmeledrany, a aû but hia hmeledrany, a ti bwebwet hmeledrany.

²⁰ Ame he ka he ta tot hmeledrany helâ me at ae monu ge grâg; me bwebwet helâ me uma menâ; kʼ ame he ka hmak hon e je hna hanyâûâ, me ame he ka ta, kʼ ame ca he hmetu bi ka tot.

²¹ Ke hnyi bong eling ame he Iehova ka bi hwaban ka tavat ae gorany ethö, ke je tuhan hmeledrany hnyi hmeledrany.

²² Ke adre me he ka ûkhacaköu ödra helâ me hna ûkhacaköuâ tavat adre cʼ ödra hnyi thop, kʼ adre me he ka hlöng hwanuma hnyi uma ceat, ke hwaban ta je bong ae se hia, me adre me he ka senʼ ödra.

²³ Ke ame he ka hmak tehi, me hmehma bi seûno; anyin ame he Iehova tuhan sabaoth ka musi hnyi hmanenang hnyi bucen Ziona, me hnyi Jerusalema, me hnyi hnyimakan anyin wahingat.