Isaia 23 - Iaai Bible 1901 (New Caledonia)

¹ HOK honen Turo. Je huiny Tasesa lö, kuku tenge thö; anyin ae ba wan e, ke ba uma, ke ba hna dit: adre me omanenâ e kodra ûnyi hnyi Kitim.

² Öbun tavat a aten bomene, laba hnyibû ju; a u at adre me ounöngötâ hnen tavat ûcû hnyi Zidona, tavat adre me hanyâûâ köiö.

³ Ke haba hon je köiö ae gan me wale wan Sihora, ke hu gan hna menu hnyi Nail; ke wale hnyaban ûcû anyin je hnyei.

⁴ Zidona lö, hmehma ju: anyin a hia but fuc hnen köiö, haingen hnabâiny köiö, ka habe, A ca vec hnyekuk, me hnokoâ, ke oge me ca hat je hidröu, me tuö wahlu.

⁵ E ka o ûthumetu Aigupito ai, me adre me he ka vec gan hmâ ge hna thumetu ge Turo.

⁶ He thʼ öbun Tasesa ai; kuku tenge thö, öbun tavat öbun e labā bomene.

⁷ Hawa, wale tauniny anyibun senyin, ae kâû adrem hwân, waleji ame labö hom e ge li can ka hnyi dok ae sâkâû he ka mē laba?

⁸ Ie at ame ûnykûme he ka ânyâ e ka Turo, a at ame ham je korona, ke haba je tuhan, me tavat ûcû omjeû, kʼ ame ûcû omjeû hnyin je at hnathuiny hmeledrany?

⁹ Ame ûnykûme e hnö Iehova tuhan sabaoth, hnân he ka oûnyibaûâ bigan anyin tavat hia ae hmanenang, me ohûkötiâ je at hnathuiny hia hmeledrany.

¹⁰ Hluiny Tasesa lö, vheno thö em hnyei helâ me Nail; e ba hmetu bala wen hnyekom.

¹¹ E ame hia but hai hnyamen hon köiö, e ame oöbubunyâ je dokhu: a hia but hûna Iehova ge Kanana, mʼ adre me he ka ohia je hnabâiny.

¹² Ke e ame ha, ka habe, U me ca he hmetu ka hobelöu, u hluiny Ziona adre me okongu u: tödrö, he thö Kitim ai; ke ba bi hna menâ eling hobi köu.

¹³ Wâ bi, hnyei iny at Kaledaia; wale hnyei a hia but; haba at Asuria adre me ip e hobi kâu je menoiny hnyot: adre me otilâ je uma tue, adre me hagutâ je uma umen thaniny; e ame oba wan e.

¹⁴ Je huiny Tasesa lö, kuku tenge thö: anyin a ba but wan anyibun hnabâ.

¹⁵ Ke hnyi bong eling, adre me he ka hnying Turo hnyi sevente je huna, helâ me je bong bongon ke than a khaca: ke hnyi obiny je huna a sevente ame he Turo ka helâ me sit khumöng ka momo hnyi gethen.

¹⁶ Hom dö kitara, vheno thö taun, u momo hnyi gethen adre hnying; kokot me me hwan ae kese, khumöngö thö je khumöng ae se hia, mʼ adre me he ka ûnykûme köu.

¹⁷ Ke hnyi obiny je huna a sevente, ame he Iehova ka senâ Turo; ke e ame he ka hmetu ka hnyi hok hwaban, me bi ûnyi monu me je dökhuiny hia hmeledrany hnyi hon kânâ.

¹⁸ Ke ame he ka hwakecin ae kap kö Iehova ta je ûnyi gan hnân ûco me hnen hna hok hwaban: adre me ca he ka ip me ûkhöûnâ; anyin a hobi kâu tavat adre me laba hnyi hnyimakö Iehova ta je ûnyi hnân ûcö gan, he ka han sekon, me ûkhaû ae nâk.