Isaia 22 - Iaai Bible 1901 (New Caledonia)

¹ HOK honen hnyigöulen bucen adre me omanenâ hnyin. Ieû gam walang ang a u je tha ölö ka hnyi hon je ban uma me je âtâm hia?

² U at ae unöngöt ge hwan kuku, taun ae mede, taun ae senyin; haba je kokâm me adre me ca hlingâ ge hele vat, kʼ adre me ca mok hnyi vat.

³ Adre tha kec hia latuhâm, adre cʼ ödra ge tavat hlic fana: adre tha cʼ ödra hia adre me wâ gam, adre kec sâkâû ai.

⁴ Anyin a wale, haingök, Hwio thö gak, oge me he ka tenge hwege; ca huliwa bi he ka otubweli nya, can hna okongoâ hluiny ik hnyei.

⁵ Anyin a bonginy hmak eling, me iututi, me monumonu ûnyi ge Than, Iehova tuhan sabaoth, hnyi hnyigöulen bucen hna omanenâ; adre me kia je hak veto, me tenge ka je bucen.

⁶ Ke Elama ame hom thi fana, me je kariota me tavat tabö hors: ke Kira ame uny ju hna tube bec.

⁷ Ke ame unöngöt ge je kariota je hnyigöulen bucen ae ti so hnyi em hnyei, kʼ ame tot metâ tavat tabö hors hnyi homagöule.

⁸ Me e ame hom degec hna tube Juda; ke hnyi bong eling u me ûnykûme ge ta je omjehen vat eio hnyin uma hnyi wanben hnyot.

⁹ Ke öbun e wâ je dok a hmoucainy taun anyi Davita, ae se hia: ke öbun e ûkhacaköuâ je köiö hnyi an eû.

¹⁰ Ke öbun e aû je umainy Jerusalema, me kia je uma mʼ adre me op hmetu hak.

¹¹ Öbun e op minya an wanben li hna up veto hobi kâu köiöiny an a kâû adrem: ke öbun e ca ûnykûme ge at a ânyâ, me ca ûnykûme wia ge at tibet e kâû adrem.

¹² Ke hnyi bong eling Than, Iehova tuhan sabaoth ame hawâ he ka tenge, me tenge thungaû, me hadreû, me weikâ mano ae gan nân:

¹³ ke wâ bi, adre me senyin me hobâ, adre me khuc bolok, me hlingö mamoe, me han ûtiö, me ic waina: ate me he ka han me ic, anyin a nyi ate me he ka mok.

¹⁴ Ke haba Iehova tuhan sabaoth ame omamenâ ka hnyi li hnyikönyök, ka habe, E hnathu adre me ca he ka hna köbun hulo eang ke ne o but öbun e mokcu, ame ha Iehova tuhan sabaoth.

¹⁵ Walang hna ha ge Than, Iehova tuhan sabaoth, ka habe, He thö, didro ka at tuö tang omjeû eang jia Sebena, at ame muso uma me ha, ka habe,

¹⁶ Ieû u je ânyâ eang? ke ie at e unyâm, anyin a u me thu op hnân erkemok? u je thu opiny erkemok ethö hobi kâu, me kave umen bi hnyi kic!

¹⁷ Wâ bi, ame he Iehova ka ti khûâ hwegiö u, helâ me at ae hwege; eke, e ame he ka lan hwegiö u.

¹⁸ E hnathu e ame he ka hwio me khuö u ka hnyi hnyei ae gan helâ me wâthâ; u me he ka mokcu eling, ke ame he ka e eling je kariotainy ânyâm hmanenang, u at ame hi hmehma hnyaban tuhâm.

¹⁹ Ke oge me he ka obö u ûnyi hnyi hanymâm, me hagutö u ûnyi hnyi hnâm hna tot gorany hnyin.

²⁰ Ke hnyi bong eling oge me he ka hawâ athnyabaik jia Eliakima nöku Hilekia:

²¹ ke oge me he ka okhavâ e ge ânyâm ûkhaû, me ohwegiâ e ge wen hnyekom, ke oge me he ka hna ânyâm musi ka hnyi hnyamen: ke e ame he ka kamen ka tavat adre me laba hnyi Jerusalema, me lap anyi Juda.

²² Ke oge me he ka ip kiiny lap anyi Davita hon bajebenyin; ke e ame he ka khong ke ba at ame he ka hlöng, ke e ame he ka hlöng ke ba bi at ame he ka khong.

²³ Ke oge me he ka ohmâ e helâ me fao hnyi dok ae hwege; ke e ame he ka hnân theron ae hmanenang hnyi lap anyin kamen.

²⁴ Ke adre me he ka uhno hon e hmanenanginy hia lap anyin kamen, wale ta je mâtrân, me ta je wan, me ta je kaia hia ae ûhnyûkong, hwân ge je utkaia ke ne o but ta je kaia hia ae gan.

²⁵ Ke haingö Iehova tuhan sabaoth, ka habe, Hnyi bong eling ame he ka kong ut fao adre ohmâ hnyi dok ae hwege; ke adre me ho ka sö degecâ me me kolu but, kʼ adre me he ka subâ degecâ hok a honen; anyin ame ha Iehova.