Isaia 21 - Iaai Bible 1901 (New Caledonia)

¹ HOK honen hnyebubainy köiö. E ame o but ûheny hnyi hnyebuba, ûnyi hnyi hnyei adre outen, helâ me hou ame tûâ ûheny hnyi hwaiöu.

² Adre thumetu nya ge hna omanenâ ae hmak; at ânyâ hwakecin iyawâ ame iyawâ, ke at sei ame söh. Elama lö, ölö thö; Madai lö, igigilo ju; oge hia but umo je bongon mâng hia.

³ Anyin a wale a unöngötö li fetrem ge vec; ame hum nya hnen vec helâ me momo ame vec hnyekon ame he ka hnokoâ: inya oge me vec me me ca khanö nya long bi; inya oge me öbubuny me me ca khanö nya bwela bi.

⁴ Ame momokon hnyekuk, oge me öbubuny ge ot ae gan hmâ: haba hauhaotreng oge me wek, me adre hia but wia ka öbubuny könya.

⁵ Adre me penapena laulau, adre otilâ tavat tue, adre me han me ic: todrʼ öbun je than, botro ju je bec.

⁶ Anyin a walang hna ha hnö Iehova könya, ka habe, He thö ka otilâ at hmâkâ; hamen he ka omamenâ ûnyi e ame he ka wâ:

⁷ ke e ka wâ deö vat adre me tabö hors, a ûsa lo, me tavat tabö asina, me tavat tabö kamela, me hamen he ka long wia me ti wâ wia.

⁸ Me e ame hongot helâ me liona, ka habe, Than lö, inya oge me tot bala hnyi je lany hon tap tue, ke oge me tuö hanymök hnyi lit hia:

⁹ ke wâ bi, waleû deö at ame o, tavat tabö hors a ödra ûsa lo. Ke e ame thu me ha, ka habe, A ta but, a ta but Babulona; ke adre hia but sa hnyikânâi je idolainy je khongon.

¹⁰ Ekölö gam hnok hna kokot, me hwit hnyi anyik om hani: oge hia but omanenâ köbun hnok hna long ga Iehova tuhan sabaoth, Khongu Isaraela.

¹¹ Hok honen Duma. Ame hongot könya ûheny Seira, ke at, me ha, ka habe, At hmâkâ lö, hawa ge lit? At hmâkâ lö, hawa ge lit?

¹² Ke ame thu ge at hmâkâ me ha, ka habe, Ame o hnyomakatu, kʼ ame o minya lit: öbun e ne he ka hnö, hnö thö: hmetu ju öbun me he jem.

¹³ Hok honen Arabia. Öbun je bunyen Dedana lö, öbun e he ka mokut hnyi hnyot hnyi Arabia.

¹⁴ Adre me hom köiö ka tavat beic; haba je aten hnyei Tema, me adre me hok areto me ûkhanö me tavat kec.

¹⁵ Anyin adre me kec ge je hele vat, a hele adre oc, me cafana adre lau, me vecin vat.

¹⁶ Anyin ame ha helâng könya Than, ka habe, Hnyi huna a khaca, hoton ta je hunainy at ame hok hwaban, me ame he ka ta but hia hmanenanginy Kedera:

¹⁷ ke haba kolon ûseiny tavat hlic fana, a tavat hwege unyin lakon Kedara, me adre me e ka wakhalet ut: anyin a hia but ha Iehova Khongu Isaraela.