Isaia 2 - Iaai Bible 1901 (New Caledonia)

¹ HOFUC ame wâ Isaia nöku Amosa ge Juda me Jerusalema.

² Hnyi ta je bong a biliny adre me he ka otethmâ buceniny uma kap umo Iehova hon ban je bucen, ke adre me he ka ogöranyâ hon je hut; ke ame he ta je hnyei hia ka ok ut kâu.

³ Ke ame he ka o ta je hnyei ae se hia me ha, ka habe, Ai öbun me otin e ölö thö ka hnyi bucen anyi Iehova, ka hnyi uma umen Khongu Jekob; ke e ame he ka nʼ öta ge deny je gethen, ke ate me he ka vheno je gethen ûnyi gan: anyin ame he ka he but hnanyibu ûheny Ziona, me hofuc ho Iehova ûheny Jerusalema.

⁴ Ke e ame he ka owisa ge ta je hnyei, me nâ je hnyei ae se: ke adre me he ka kokot anyidra je hele vat, me me hnân bi hwio kânâ, me dödra je ö hnân je bâlet adre dela kâu vine: ame ca he ke hnyei ka nang hele vat ka kot ke hnyei, ke adre me ca he hmetu bala he ka nâ vat.

⁵ Lap anyi Jekob lö, ai öbun, ate me he ka vheno melam anyi Iehova.

⁶ Anyin a u je degec lakem, a lap anyi Jekob, anyin a ödra unöngötö ge je hwakecin ûnyi jemeiö, ke ödra tavat bihihwakecin helâ me at Filisiti, kʼ adre me ûkhöû hnyam me lakon je atkanyua.

⁷ Ke unöngöt idra hnyei ge sileva me gol, ke ca hnân bi aû omjehedra ta je omjeû; ke unöngötö idra hnyei ge ta je hors, ke ca hnân bi aû anyidra je kariota.

⁸ Ke unöngötö idra hnyei ge ta je idola; kʼ adre me khudrung ka huliwa anyin ta je hnyamödra, wale adre me ânyâ ge je banyödra.

⁹ Ke ame nom ju hoûmonu, ke ame hnyikânâ but at ae ûnyi hnathu: anyin a wale u me ca he ka kot degecâ anyidra hulo.

¹⁰ Didro hnyi hnyin kic, ke ikölö u bi eû hnyi kânâ, ûnyi ge hna outö Iehova, ke ûnyi ge anyin hmanenang ae mec.

¹¹ Adre me he ka ohnyikânâ hnyimakan tavat adre me begörany, ke adre me he ka hom ûhnyûkongo tavat adre me bi gan, ke adre me he bi ka oganö Iehova thibi hnyi bong e.

¹² Anyin ame he ka o ke bong bongu Iehova tuhan sabaoth, ka hnyi hon tavat begörany me bi gan hia, ke tavat hia adre me ogânʼ ödra; me adre me he ka ohnyikönʼ ödra:

¹³ ke hon je arasiny hia Lebanona, ae gorany ke beû; ke hon je iwajoiny hia Basana;

¹⁴ ke hon ta je bucen hia ae beû, ke hon je hut hia ae gorany;

¹⁵ ke hon je hnabâ hia ae beû, ke hon je hna up hak veto;

¹⁶ ke hon je huiny ʼhia Tasesa, ke hon ta je ûnyi adre tretrau hia ae kese.

¹⁷ Ke adre me he ka hom ûhnyûkongo tavat adre me begörany, kʼ adre me he ka ohnyikânâ tavat ae bi gan: ke adre me he ka oganö Iehova thibi hnyi bong e.

¹⁸ Ke ame he ka hia hia but ta je idola.

¹⁹ Kʼ ame he ka dit tavat ka hnyi hnyin ta je op hnyi je kic, ke eû hnyi hnyin ta je uthankonginy kânâ ûnyi ge hna outö Iehova, ke ûnyi ge anyin hmanenang ae mec, hnyi ûen e ame he ka todrö ka jijingâ hwegiâ hmeledrany.

²⁰ Ke hnyi bong eling amo he tavat ka degec anyidra je idola sileva, me anyidra je idola gol, waleji adre me tibet hnân hic kodra, adre me he ka degec ka je afora, ke ta je obûbû bi;

²¹ me me dit ka hnyin je esopiny kic, ke je khekheiny je kic ae ûjejong, ûnyi ge outö Iehova me anyin hmanenang ae mec, e ka todrö ka jijingâ hwegiâ hmeledrany.

²² Soju öbun labageju ka at, ame menâ ge li hnyingöiny: anyin a hnân eû he ka ûnykûme kaû?