Isaia 19 - Iaai Bible 1901 (New Caledonia)

¹ HOK honen Aigupito. Wâ bi Iehova ame tabâ ûlâ ae logot, kʼ ame he ka o hnyi Aigupito: me ame he ka bwebwet je idolainy Aigupito hnyi hnyimakan, kʼ ame he ka köiö but hnyekon Aigupito eû hnyin e.

² Ke oge me he ka obwebwelâ at Aigupito ka tot metâ bi ka at Aigupito; kʼ adre me he ka ve vat, a ke at me liamekeiny mē, ke ke at me at ame laba hakekeny kâu; ke ke taun me ke taun, ke ke dokhu me ke dokhu.

³ Kʼ ame he Aigupito ka gâon hnyin e; ke oge me he ka ohia ûhnenamöiny: ke adre me he ka elâlâm je idola, me tavat ulit, me tavat tren biobotkong, me tavat bi khong.

⁴ Ke oge me he ka hna at Aigupito ka hnyi hnyamen than ae beovecâ; kʼ ame he bi ka musi ödra hnen than ae hwege hnyimakan, ame ha Than, Iehova tuhan sabaoth.

⁵ Ke ame he ka hme köiö, kʼ ame he ka mada me hwahwacit wagewe.

⁶ Ke ame he ka bo kong ta je wagewe; kʼ ame he ka hme me hwahwacit ta je wadutöiny: ame he ka meleca je saköwi me je saamun.

⁷ Haba je hna önying hnyi wagewe Nail, hnyi baten Nail, me ta je ûnyi hia adre tä hnyi baten Nail, ame he ka mada, me hia, me me ba but.

⁸ Ke ame he ka tenge tavat thut, ke adre me he ka hlöuhlöu hia tavat adre me hnahna wage ka hnyi Nail, ke adre me he ka hmak hnyok tavat adre thung ert eû hnyi köiö.

⁹ Ke adre me he ka hmehma tavat adre me huliwan lino, me tavat hwâwâ mano ae hau.

¹⁰ Ke adre me he ka kia je taben e, ke ame he ka hmak hnyekon tavat hia thithö adre me huliwa ge hwaban.

¹¹ E ti monu but je thaniny Zoana; ke ûhnenamöiny tavat ae nua metâ he ka ha bongon unyi Farao ödrin e monu but: ieû gabun öbun e ha kö Farao, ka habe, Inya nokon at ae metâ, nokon je than kâû adrem?

¹² Ewa bi ânyâm tavat ae metâ? hamödrin he ka thumetu u walang ang, me omanenâ; me so e khanʼ ödrin ûnyi ame ip hmâ Iehova ge Aigupito.

¹³ A monu but je thaniny Zoana, adre iyawâ je thaniny Nofi; haba je taben je tribuiny, adre hia but omonoâ Aigupito.

¹⁴ A hia but Iehova hingâlâ ka hnyi wanben e hanu ae hwali: ke adre omonoâ Aigupito hnyi anyin ta je huliwa biâ, helâ me at ame monu ge grâg ame he monumonu hnyi hnen hna hmita.

¹⁵ Ke ame ca he ka hu huliwa anyin Aigupito he ka ânyâ hnen ban me hmokunen, me lan pama, me saköwi.

¹⁶ Hnyi bong eling ame he Aigupito ka helâ me omomo: ke ame he ka öbubuny me ot can hna jijingâ hnyamö Iehova tuhan sabaoth, wale e ame jijingâ hudra.

¹⁷ Ke ame he ka hnân outen hnyei Juda ka Aigupito, ame he tavat hia thithö ka ot e ka ha ien bi kodra, can hna ûnykûme ga Iehova tuhan sabaoth, wale e ame ûnykûme gadra.

¹⁸ Hnyi bong eling adre me he ka ha hwen Kanana hnyi je tauniny Aigupito a thabûng, me khemanyin kö Iehova tuhan sabaoth; adre me he ka hwenyi ien khaca me taun ae hnaûhango.

¹⁹ Hnyi bong eling ame he ka hu taben hut kö Iehova hnyi wanben hnyei Aigupito, me haten adre otilâ kö Iehova hnyi hnyigöulen e.

²⁰ Ke wale hnân haten me ohnathoâ kö Iehova tuhan sabaoth hnyi hnyei Aigupito: anyin adre me he ka hongot kö Iehova can tavat adre me oveci ödra, me e ame he ka kunâ kodra at ûhomeli, me at sing ödra, me e ame he ka omeli Ödra.

²¹ Ke ame he Iehova ka manen bi hnyi Aigupito, kʼ ame he at Aigupito ka khanʼ ödra Iehova hnyi bong eling; eke, adre me he ka khudrung me je hut me je bwihlany, me bi khöbi kö Iehova, me ohwâdâ bi e.

²² Ke ame he bala bi Iehova ka kot Aigupito, me osoâ bi; ke adre me he ka hmetu kö Iehova, me e ame he ka ling ödra, me osoi ödra.

²³ Hnyi bong eling ame he ka hu hna cit gethen ûheny Aigupito Asuria ai, ke ame he at Asuria Aigupito ai, ke at Aigupito ame he ka he Asuria ai; kʼ ame he at Aigupito ka tha hmi me at Asuria.

²⁴ Hnyi bong eling ame he Isaraela ka bi kuniny me Aigupito me Asuria, hnân hnahic hnyi wanben hmeledrany:

²⁵ anyin ame hia but Iehova tuhan sabaoth hahnahici ödra me ha, ka habe, E so e hnahic Aigupito a lakeik, me Asuria troban li hnyamok, me Isaraela jekhöûk.