Isaia 18 - Iaai Bible 1901 (New Caledonia)

¹ EKÖLÖ! hnyei ae hu hwan li labenyidru, a e bi hnyi ke keihen wageweiny Aithiope:

² at ame kunâ je ûthumetu a deny je köiö, wale adre me tabâ je hu gom hon köiö, me ha, ka habe, he thʼ öbun je ûthumetu ae logot, ka hnyi hnyei ae hwege me hnyok baga, ka hnyei adre outen hwân ehac me nyiele; wale a hnyei adre ham je tulut, me adre me ututo, hnyei a susubâ hnen je wagewe!

³ Öbun hia thithö tavat adre me laba hnyi hmeledrany, ke tavat laba hon kânâ hia, e ka kap goranyai boûdila hon je bucen, wâ thö; ke e ka tûâ trutru long ju öbun.

⁴ Anyin a walang hna ba hnö Iehova könya, ka habe, Oge me he ka laba wia, me wâ hnyi hnyabak; helâ me hlöng ae gan e ka o seuno, ke helâ me hauiny ûlâ e ka hlöng hnyi ûen menu.

⁵ Anyin a ödra tiga ca menu, e ka kolu vongon, kʼ ame wia bi vongon me me wan vine ame he ka metu but, me e ame he ka sö je vheiny ge hele si vine, mʼ adre me he ka hom je anginy ame iyâû me sö degecâ.

⁶ Kʼ adre me he ka tha hna degecâ e ka ta je meno ame gâ adre me behan hon je bucen, me omenoiny hnyot: ke ame he ta je meno ame gâ adre me behan ka laba e hnyi honivakeny, kʼ ame he omenoiny hnyot hia ka laba e hnyi hnyeun.

⁷ Hnyi ûen eling adre me he ka ham bwihlany kö Iehova tuhan sabaoth ûnyi hnyi hnyei ae hwege me hnyok baga, wale hnyei adre me outen hwân ehac ke ne o but nyiele; a hnyei ame tuluto, kʼ ame ututo, a hnyei ame susubâ ge ta je wagewe, ka hnyi hnen iö Iehova tuhan sabaoth, wale bucen Ziona.