Isaia 17 - Iaai Bible 1901 (New Caledonia)

¹ HOK honen Damaseko. Wâ bi, adre me he ka degec Damaseko me me ca taun hmetu bi, kʼ ame he biju kahudrei.

² Adre me he ka hna degecâ but je tauniny Aroera: ke hnân bi hobi kâu je hnahat mamoe, kʼ adre me he ka mokut eling ke ba at ame he ka ootödra.

³ Ke ame he ka hia hnabâ hnyi Eferaima, me dokhu hnyi Damaseko, me je kolon hayi Suria; kʼ adre me he ka helâ me hmanenanginy lakon Isaraela, haingö Iehova tuhan sabaoth.

⁴ Ke haba hnyi bong eling me adre me ke ka ohalelöûâ hmanenangi Jekob, kʼ ame he ka delâ unyin ae pipikhenya.

⁵ Ke ame he ka helâ me at subö hwit ame ûkhacaköuâ hwit ame tot, kʼ ame subâ je wan ge benyin; eke, ame he ka helâ me hna hlo hwit hnyi hnyigöulen bucen e Refaima.

⁶ Ke so bi ame he ka hu kolon hnyin e hnân hlo, helâke hna jijingâ ûö elaio, ame ne lo ame ne kun thibi ta wan hnyi obiny vheiny ae gorany, ame ne vak ame ne thabûng hnyi je vheiny ûo ae wa so wale hnyi je baten, ame ha Iehova Khongu Isaraela.

⁷ Hnyi bong eling ame he at ka bwela ka At a op e, ke ame he li emakan ka wâ Kabi Isaraela.

⁸ Ke e ame ca he ka bwela ka hnyi ta je taben hut, huliwa anyin li hnyamen, ke ame ca he ka wâ ta je ûnyi a ânyâ hnen je banyen, je Aseira, me je hna theati seûno.

⁹ Hnyi bong eling ame he anyin je taun adre up veten ka helâ me je dok ae ba aten hnyi hnyot me bon ban bucen, waleji adre hna degecâ hnyi hnyimakan lakon Isaraela: kʼ ame he ka dok ae ba wan.

¹⁰ Anyin a u je hnying Khongon ânyâm ûöhmeli, ke u je ca ûnykûme kicin tang hwegiâm; anyin a wale u je tā je ûo ae hmanenang, me tā ta je hatong kanyua:

¹¹ hnyi bong u je tā hnyin u je si haginy, ke hnyi hnyomakatu u je ovhöngâ ânyâm je hatong: ke ame he ka ba menu hnyi bonginy hlöuhlöu me vec ae gan hmâ.

¹² Ekölö! hwan tavat ae se hia, adre me mede helâ me hwan köiö; me iwadringiny je hnyei, adre me wadring helâ me wekhetiny je köiö ae se hia!

¹³ Ame he je hnyei ka wadring helâ me wekhetiny je köiö ae se hia: ke e ame he ka thawʼ ödra, mʼ adre me kec sâkâû ai, ke adre me he ka hnu ödra helâ me unen hwit hon je bucen ge ang, ke helâ me thatûnyi ge hon.

¹⁴ Ke e ka sahac ut, wâ bi adre me öbubuny; ke e tiga ca hnyomakatu bi, e hia ödra but. Wale jekhon tavat sei öta, me jekhon tavat adre me hûgûnâ anyita ta je ûnyi.