Isaia 16 - Iaai Bible 1901 (New Caledonia)

¹ KUNÂ thö je lakon mamoe hobi kâu at muso hnyei ûheny Sela wale cicö hnyebubu, ka hnyi bucen anyin hluiny Ziona.

² Ke ame he wahluiny Moaba hnyi je hna utihai hnyi Arenona ka helâ me je meno ame gâ monu, ke helâ me hâûeu meno adre oveseâ.

³ Ha ju bongon, owisa thö; bi hmenom ju helâ me lit hnyi jebigo: ikhâlâ ju je hna obâ; ca he ka hâiâ tavat adre kec.

⁴ E na he ju ka laba unyâm ta je atök adre obâ; ke haba u Moaba eso u me he ka tubi ödra hnyi hnyimakan at sei: anyin ame he ka hia at ûöveci, a um do hwakecin sei, adre ohia tavat seda ûnyi hnyi hnyei.

⁵ Ke adre me he ka otilâ ke theron hnyi ibe-tengiö, kʼ ame he ka tabâ e ke at hnyi hnathu, hnyi uma mano umo Davita; he ka owisa, me elâm hna owisa, me logot he ka ânyâ wisa.

⁶ Ate hia but long hnyok bi gan anyi Moaba, a e bi gan hmonyin; wale anyin bi gan, me begörany, me wathethot; ke ûnyi baû bi anyin je bi gan.

⁷ Anyin a wale, ame he Moaba ka tenge kuku ge Moaba, adre me he hia ka tenge: öbun e he ka mâng ge je taben Kira-haraseth, adre ti okongoâ.

⁸ Anyin a ut ame kot je utkânâ iny Hesebona, me vine hnyi Sibema; je thaniny je hnyei adre me hia but thu je ûöiny ae so; adre me o ke ne o but Jazera, adre me vheno hnyebuba; ke ame hlau je vheiny, me hanyâûâ köiö.

⁹ Anyin a wale oge me he ka tenge helâ me ûtengien Jazera can vine hnyi Sibema: Hesebona me Eleala lö, oge me he ka hû u ge je deköiök: anyin ame o but hwan vat hon ânyâm je waniny hnyeun me ânyâm menu.

¹⁰ Ke adre me hom degecâ senyin me hobâ ûnyi hnyi hnyei ame wa wan; ke ame ca he ka hu hmetu khumöng, me hongot senyin hnyi je hnyei vine: ame ca he at ka uto waina hnyi je taben, a at ame ututo; oge hia but bi obiny kuku senyin.

¹¹ Anyin a wale ame fuc hnyekuk helâ me kitara can Moaba, kʼ ame fuc hnyekuk can Kira-heres.

¹² Ke e ka manen Moaba, ke e ame kong hnyekunâ e hon dok ae gorany, kʼ ame dit ka hnyi anyin dok ae kap he ka hic, me e ame ca he bi ka ton.

¹³ Walang hofuc ho Iehova ehac ge Moaba.

¹⁴ Ke a hia but fuc Iehova walang ang, me ha, ka habe, Hnyi ta huna a kun hoton je hunainy at ame hok hwaban, me adre me he ka hûkotiâ hmanenanginy Moaba, tha e me aten ae se hia hmonyin; kʼ ame he ka wakhalet hmonyin je kolon ke ca ûnyi hnathu hmetu.