Isaia 14 - Iaai Bible 1901 (New Caledonia)

¹ A NYIN ame he Iehova ka betenge ga Jekob, ke e ame he hmetu ka ûco Isaraela, me ip ödra hnyi idra: kʼ ame he je atkanyua ka tha e mödra, kʼ adre me he ka kece ka lap anyi Jekob.

² Ke ame he je hnyei ka hum ödra, me ip ödra hnyi hnödra: ke ame he lap anyi Isaraela ka hum ödra ka hnyi hnyei i Iehova hnân je athnyaba obaga me omomo: ke adre me he ka hwenbödra bi, waleji tavat adre me bâ gadra; kʼ adre me he bi ka musi ka tavat adre me sedʼ ödra.

³ Ke haba hnyi bong ame he Iehova ka omeno u ûnyi hnyi ânyâm vec, me ânyâm ot, me huliwa ae hmak adre me kunö u ka hnyin,

⁴ me u me he ka hai ûhöûcû eang ge than Babulona, u me ka ha, ka habe, Ekölö ge hna bi obiny at ûsedö! ke adre me bi obiny taun gol!

⁵ A hia but Iehova thu uci anyin tavat ae kong, me baten musi anyin tavat musi;

⁶ waleji ame kot tavat ge wathethöt kʼ ame ca menâ bi nang, waleji ame muso hmönyinâ ta je hnyei, ge hna seda ae ca hnân thawâ bi.

⁷ A menâ hia thibut hmeledrany me laba wia: kʼ adre me ie hai khumöng.

⁸ Eke, ame senyin köu ta je kop, me je arasiny Lebanona, me ha, ka habe, Hwân hnyi hnödra hna omokuli u, me ba at si uto ame o kohmun.

⁹ Ama bwebwet ut hedis eû gam he ka ûkhanö möu, u ka dit ka hnyin: e ame bwebwelâ je komok gam, a je taben hnyei hia; e ame otilâ je thaniny hia hmeledrany ûnyi hnyi anyidra je theron.

¹⁰ Adre me he hia thithö ka ha köu, ka habe, Hawa u je sēnyin dut helâ möhmun? hawa, u ûcû but möhmun.

¹¹ Adre ohnyikânâ hedis ai ânyâm hmanenang, me meainy ânyâm je nabeli: adre me ulolo eû hnyi hmelâm je biget, ke adre me okhoti u ge waahnyöng.

¹² Okhû lan lö, nokon hnyomakatu, ekölö ge hnâm hna ta ûnyi ethö hnyi drany! at ame ohnyikânâ ta je hnyei lö, ekölö ge hnödra hna si u hagutö u hnyikânâi.

¹³ Ke u je ha eû hnyi hnyekom, ka habe, Oge me he ka ölö hnyi dranyai, oge me he ka ogöranyâ anyik theron hon je okhû anyin Khong; ke oge me he ka laba hon buceniny ûkhacaköu hnyi ke keihen ka hnyi hwadro:

¹⁴ oge me he ka ölö hon je ûlâ; oge me he ka helâ me Beönua.

¹⁵ Ke so bi adre me he ka ohnyikânâi u hedis ai, ka hnyi ûdiliny thop.

¹⁶ Haba tavat adre me ō u adre me he ka wâ wia, me wâ ûnykûme me ha, ka habe, Hawa, wale at ame jijingâ hmeledrany, at ame bwebwelâ je dokhu:

¹⁷ at ame wia hmeledrany me me helâ me hnyebuba, me hagutâ hnyikânâi je tauniny; at ame ca hna tavat hwenbâ ka hnyi ta je idra?

¹⁸ Haba je thaniny hia ta je hnyei, ödra hia thithö adre me ve mokut hnyi hmanenang hnyi umödra bi je uma.

¹⁹ Ke haba u, me adre digic u helâ me anginy ae ikiki ke ba erkemok gam, ke helâ ûkhaûen komok, adre dâ ge hele vat, adre me utut ka hnyi ta je veten thop; ke helâ me komok adre; me uto hmelen je cadrin.

²⁰ U me ca he, ka ûkhacaköu mödra hnyi erkemok, anyin a u je okongoâ em hnyei, me hlingâ lakem; adre me ca he bi ka ha nyiele balua mâtrâniny tavat ae kong.

²¹ Penapena thö dok hnân hlingâ je lakon, can hulo anyin je kamödra; mʼ ödra me ca he ka tot me me idra hnyei, me ounöngötâ kânâiny hmeledrany hnen ta je taun.

²² Ke haingö Iehova tuhan sabaoth, ka habe, oge me he ka höhöi kodra, me subâ degecâ ge Babulona ien me kolon, me nokon me obiny, haingö Iehova.

²³ Ke oge me he ka wia e hnân iny kifoda, me hnân je wadutö; ke oge me he ka aba e ge brum hnân mekiny, haingö Iehova tuhan sabaoth.

²⁴ Haba Iehova tuhan sabaoth ame khemanyin, me ha, ka habe, E hnathu ame he ka helâji me hnok hna ûnykûme; ke ame he ka tethmâ helâji me hnok hna ip hmâ hnyi hnyekuk:

²⁵ Ke oge me he ka oamâmâ at Asuria hnyi ik hnyei, me uto e hmelen li cak hon anyik je bucen: me ame he ka hia hna ûhûkâlâköuâ ûnyi gadra, me honen hok ûnyi hnyi hon je bajebenyidra.

²⁶ Wale hna ûnykûme adre me ûnykûme hnyi hmeledrany hia: ke wale hnyam adre me hai hon ta je hnyei hia.

²⁷ Anyin a hia but ûnykûme hnö Iehova tuhan sabaoth, ke ie at bi ame he ka thawâ e? ke ame hai hnyamen, ke ie at ame he ka ohmetu e?

²⁸ Hnyi hunainy mok a Ahaza than ame o but hok eang.

²⁹ Filisiti hia lö, ca senyin bi can adre thu uci waleji ame kuc u: anyin ame he ka o but vaipa ûnyi hnyi iwân anyin on, ke haba mâtrân e me on ame hiâ me gâ.

³⁰ Ke ame he nokon a bân at ae theduoc ka han, kʼ ame he tavat ae ba ta ûnyi ka mokut khötkic: ke oge me he ka hlingâ ânyâm wân ge mekihnânem, ke adre me he ka hlingâ ânyâm je kolon.

³¹ Homagöule lö, kuku tenge thö; taun lö, tenge thö: Filisiti hia lö, u je aû hia but; anyin ame o hai ûnyi hnyi hwadro, ke ba at ame he ka tot baû e ka o thö bonginy bong adre thu.

³² Ke ieû hnân thu ka je ûthumetuiny je hnyei? ame ha, ka habe, A hia but Iehova bi taben Ziona, ke ame he ta je aten adre me vec ka lubaduöng hnyin e.