Isaia 11 - Iaai Bible 1901 (New Caledonia)

¹ KE ame he ka o khûen ûnyi hnyi iwân anyi Jese, ke ame he ka wa wan ke vheiny ûnyi hnyi anyin iwân:

² ke ame he hanu Iehova he ka laba hon, a hanuiny metâ me wâhmakhmeto, hanuiny omanenâ bongon, hanuiny man, hanuiny wâ ûnykûme me outö Iehova;

³ ke haba anyin senyin, me wale he ka ot kö Iehova: ke e ame ca he ka owisa hoton hna wâ hnen li ecmak, me nâ hoton hna long hnen li hnyiköny:

⁴ ke e ame he ka owisa ka ta je theduoc hnyi hwakecin ae wisa, me nâ hnyi tulut ae ûcû ka tavat ae menyik eang hmeledrany: ke e ame he ka kot hmeledrany ge osöiny hnyimen, me hlingâ tavat ae kong ge homenâ ûnyi hnyi hnyimen.

⁵ Ke wen hnyekon hwakecin bi ae wisa, ke wen fetriny hwakecin bi ae hnathu.

⁶ Ke ame he luko ka tha laba me nokon mamoe, ke ame he lepad ka tha mokut me nokon got; ke ame he nokon kau me nokon liona ka tha e me meno adre opipikhenyâ; ke ame he wanakat ae ûhnyûkong ka su ödra.

⁷ Ke ame he nak kau me bea ka tha han; kʼ ame he je lakudru ka tha mokut: kʼ ame he liona ka han thatûnyin hwit helâ me bolok.

⁸ Ke ame he wanakat ame i ka walak hon hwanumen asip, kʼ ame he wanakat adre hnebaio ka ip hnyamen hon hâûen vaipa.

⁹ Adre me ca he ka ovecâ me okongoâ hnyi anyik bucen hia ae kap: anyin ame he ka unöngötö hmeledrany ge wâ ûnykûme ga Iehova, helâ me köiö ame tube taben köiö ae gan.

¹⁰ Ke haba hnyi bong eling, haba iwân anyi Jese, at ame tot hnân haten ka ta je hnyei, me ame he ta je hnyei ka elâm e; ke ame he ka hmanenang hnen hna menâ.

¹¹ Ke hnyi bong eling ame he hmetu Iehova ka olo inâ hnyamen he ka hom kolon lakeiny, wale a tiga laba, ûheny Asuria me Aigupito, me Patherusi, me Kuza, me Elama, me Sinara, me Hamath, me ûnyi hnyi ta je bomene hnyi köiö.

¹² Ke e ame he ka ogöranyâ boûdila hobi kâu ta je hnyei, me ûkhacaköuâ je hna degec ge at Isaraela, me ûkhacaköuâ je hna oveseâ a at Juda ûnyi hnyi je can hmeledrany a vak.

¹³ Ke ame he ka hia ciâ anyi Eferaima, ke adre me he ka subâ degecâ tavat adre me oveci Juda: ame ca he Eferaima ka ciâ ga Juda, kʼ ame ca he Juda ka oveci Eferaima.

¹⁴ Ke adre me he ka utut ka hnyi hon je bajebenyin at Filisiti e jimeû; adre me he ka tha söh tavat aten jimeio: adre me he ka inâ hnyamödra hon Edoma me Moaba; ke ame he ka ling ödra je laku Amona.

¹⁵ Ke ame he Iehova ka ohia beduainy köiö hnyi Aigupito, ke jijingâ hnyamen hon Wagewe ge anyin ang ame hiâ, me kot e me me seven but ta je di, mʼ adre me he ka hanyâûâ ke mada bi tangen hnyeûcadra.

¹⁶ Kʼ ame he ka hu hna cit gethen anyin kolon lakeiny, a kolon ûnyi Asuria; helâji ka Isaraela hnyi bong e ame he ûheny hnyi hnyei Aigupito.