Ioane 9 - Iaai Bible 1901 (New Caledonia)

¹ E AME he, kʼ ame wâ ke at a wadröu hwân hnyi hna knokoâ e.

² Ke haba laten ödrin e hnö e, ka habe, Rabi, ie at a anyin hulö mʼ adre me hnokoâ wadröu eang, hawa, a ka ûnyi gan, ame ne kamen me hinyen?

³ Iesu ame thu, ka habe, E ca monu at ang, ke ca monu minya kamen me hinyen: ke so bi me me manen dut la je huliwa anyin Khong ge at ang.

⁴ E ûcû köta he ka mâdrâ ta je huliwa anyin at a kunö nya e me tiga lany: ame he jem lit ke ca khana hmetu ke at he ka ânyâ ke huliwa.

⁵ Hnyi ûen a inya ang hmeledrany, inya ang melaminy hmeledrany.

⁶ Ke e a hia but ha e, e ame hangöc ka hnyi kânâ, me ûnyûnya me botro li emakan at ae wadröu ge kânâ,

⁷ me ha kâu, ka habe, He thö ka hneû hnyi an Siloama (walang bongon, Hna ûkhûnöng). Me e ame he but me hneû, me e ame o hmetu but a ga bwela but.

⁸ Haba tavat adre me laba hakekenyâ, me tavat adre me wâ ehac ame labö sumat, adre me ha, ka habe, Ca at ke la ang ame labö sumat?

⁹ Ke haingen keihen, ka habe, Ka e at e: ke haingen keihen, ka habe, E tha ûcû mē. Ke e ame ha, ka habe, Inya ang.

¹⁰ Me adre me ha kâu, ka habe, Adre kâmâu hna obwela li emâkâm?

¹¹ E ame thu, ka habe, Hnen at adre hwenyi ien Iesu hna mâdrâ kânâ, me kina hnyi li emakök, me ha könya, ka habe, He thö Siloama ai ha hneû: me oge me he but me hneû, me oge me bwela but.

¹² Ke haingödra adre me ha kâu, ka habe, Ke ne e but ua? Haingen, ka habe Khete.

¹³ Ödra adre me hom but at ae wadröu ehac ka ta je Faresaio.

¹⁴ Haba bong Iesu ame mâdrâ kânâ, me obwela li emakan, me, bong sabath.

¹⁵ Haba ta je Faresaio adre me hnö hmetu e, ka habe, A hawa me u me bwela but? Haingen ame ha kodra, ka habe, E ame kina kânâ hnyi li emakök, me oge me he but ka hneû, me oge me bwela but.

¹⁶ Me ame ha keihen ta je Faresaio, ka habe, Ca ûnyi ge Khong at ang, anyin a e ame ca okabâ sabath. Ke haingen keihen, ka habe, A hawa at ae monu ka khana ka ânyâ ta je ûöman helâe? Me adre me khekhe lo but.

¹⁷ Me adre me ha hmetu ka at ae wadröu, ka habe, Ieû hwâm gan, anyin a e ame obwela li emâkâm? Haingen, ka habe, E perofeta.

¹⁸ Ke haba at Juda, me adre me ca kap a e at eji ae wadröu, ka bwela hmetu but, ke ne o but adre me hawâ kamen me hinyen at adre obwela,

¹⁹ me hnei ödru, ka habe, Hawa nökubu at ang waleji Öbu me ha a gʼ adre hnokoâ ke wadröu? a hawa a ga bwela but walang ang?

²⁰ Me ame thu kamen me hinyen, ka habe, E khanʼ ohmu a nökuhmu at ang, ke öhme hnokoâ ke wadröu:

²¹ e bwela but walang, ke ca khanʼ ohmu a hawa; ke ca khanʼ ohmu minya at a obwela li emakan: bethe hnö öbun gan; e at hnathu but; hamen he ka hâiâ e.

²² Ame ha kamen me hinyen helâe anyin a ödru outen at Juda; anyin ame ûhaköuâ at Juda he ka obâ ûnyi hnyi sunago at ame he ka ha, ka habe, E Keriso.

²³ Waleling me me ha kamen me hinyen, ka habe, E at hnathu but; bethe hnö öbun gan.

²⁴ Me adre me olo hawâ at ae wadröu, me ha kâu, ka habe, Ogânâ Khong, anyin a ohmun e wâ but ae monu at ang.

²⁵ Haba at ae wadröu ame thu, ka habe, A ne at ae kong, me ca khanö nya: khaca thibi ûnyi ae khanö nya, wale a iny wadröu ehac, ke walang ang oge me bwela but.

²⁶ Me adre me ha kâu, ka habe, Ieû hnen hna ânyâ köu? a kâmâu hna obwela li emâkâm?

²⁷ E ame thu kodra, ka habe, Oge hia but ha köbun eja, ke öbun e ca long: anyin a ieû ame bewebun hmetu ka long? e bewebun minya he ka bi laten?

²⁸ Me ödrin e oû e, me ha, ka habe, U at bi u a aten; kʼ ohmun je latö Mose bi öhmun.

²⁹ E khanʼ ohmun a Khong ame fuc kö Mose, ke haba at e, me ca khanʼ ohmun e at ua.

³⁰ Haba wadröu ame thu kodra, ka habe, Hap wale ju ang ûnyi hnân lâiâ, a öbun e ca wâ dok a mwi hnyin, ke a hia but obwela li emakök.

³¹ E khanʼ ota but, a gʼ ame ca he Khong ka long tavat ae monu: ke a ne ke at ame outen Khong me mâdrâ weny, me e ame he bi ka long kâu.

³² Adre me ca munyi long adrem a gʼ ame obwela ke at li emakan at adre me hnokoâ ke wadröu.

³³ A ne ca ûnyi ge Khong at e, e ca khana he ka ânyâ ke ûnyi.

³⁴ Ödra adre me thu kâu, ka habe, Adre me hnöku u hnyi hulö ae gan, ke u me he bi ka nʼ ohmun? me adre me obâ but e.

³⁵ A long ut Iesu a gʼ adre hia but obâ e; me e ame wâ e me ha kâu, ka habe, Hawa, u me labageju ka Nokon Khong?

³⁶ E ame thu, ka habe, Taböny Than, e ia, mʼ inye he ka labageju kâu?

³⁷ Iesu ame thu kâu, ka habe, U je wâ but, ke e thibi e at ame ûhnenamö möu.

³⁸ Haingen ame ha, ka habe, Taböny Than, inya oge me labageju. Me e ame khudrung ju kâu.

³⁹ Haingö Iesu, ka habe, Oge o but eang hmeledrany he ka owisa, me me bwela but tavat adre me ca hnyi bwela; me me ca bwela bi tavat adre me bwela.

⁴⁰ Ame long ut keihen ta je Faresaio a tha ödra mē ta je hofuc eling, me adre me ha kâu, ka habe, Hawa, ohmun je wadröu minya?

⁴¹ Iesu ame thu kodra, ka habe, Öbun e ne je wadröu me ba bi anyibun monu, ke walang ang öbun e ha, ka habe, Ohmun bwelâ: waleling me me e bala bi anyibun monu.