Ioane 8 - Iaai Bible 1901 (New Caledonia)

¹ KE Iesu ame he but ka hnyi bucen Elaio.

² Ke hnyi hnyomakatu kong e ame o hmetu ka hnyi uma kap, me ame he but kâu tavat hia; ke e ame laba ju me nʼ ödra.

³ Haba tavat sihnalimen me ta je Faresaio adre me hom kâu ke momo adre lelo kʼ ame tiga bi ûnyi monu; me adre me otilâ momo hnyi wanben,

⁴ me ha kâu, ka habe, At ûne lö, haba momo ang ohmun e lelo kʼ ame tiga bi ûnyi monu.

⁵ Ka hûna köta Mose hnyi hnanyibu he ka lûâ ge veto tavat adre me helâe; ieû hnâm hna ha gan?

⁶ Adre me ha e he ka cubec e, me me hu ûnyi hnân bi fuco e. Ke Iesu ame nom but me set kânâ ge banyen.

⁷ Ke adre me hnö ûjengö e kâu, me e ame höhöi me ha ködra, ka habe, ama bân at ame ca munyi mâdrâ hulo ka lûâ e.

⁸ Ke e ame nom hmetu ju me set kânâ.

⁹ Ke adre me long ut me adre me ve dididrut, hwân ge at a bân ke ne o but ge at a biliny: ke hake Iesu thiju, ke momo ame hake tot.

¹⁰ Ke haba Iesu ame höhöi thö, me ha ka momo, ka habe, Ke momo lö, ödra but ua? e ba but at a obnaûhangöi u?

¹¹ Haba momo ame ha, ka habe, Than lö, e ba. Haba Iesu ame ha, ka habe, Oge me ca he minya inya ka ha hnaûhangöi u: he thö; ca mâdrâ hmetu monu hwân ûen eang.

¹² Iesu ame ha hmetu ködra, ka habe, Inya ang melaminy hmeledrany: haba at ame he ka he hotuk, e ame ca he ka he hnyi menekholom, kʼ ame he bi ka hu melaminy möt.

¹³ Me ame ba kâu ta je Faresaio, ka habe, U me ka hamâm ohnathu u; e ca hnathu thö hnâm hna ohnathu u.

¹⁴ Iesu ame thu me ha ködra, ka habe, A ne inya oge me ohnathu nya bi, e hnathu hnok hna ohnatho; anyin ae khanö nya dok oge mwi hnyin, me dok oge me he ka hnyin.

¹⁵ Öbun e ha ûnykûme hoton unyin, ke oge me ca ha ûnykûme bi nya ke at.

¹⁶ Ke so bi oge ne ha ûnykûme, e hnathu hnok hna ûnykûme; anyin a ca hake inya ke, ke tha inya me Kamök at a kunö nya.

¹⁷ Eke, adre me sihnalimen hnyi anyibun hnanyibu, ka habe, haba hna ohnathoâ hnen li at a lo, me hnathu.

¹⁸ Haba inya oge me ka ohnathu nya bi, ke ame ohnathu nya minya bi Kamen at a kunö nya.

¹⁹ Me haingödra kâu, ka habe, Ewa Kâmâm? Iesu ame thu, ka habe, E ca khanʼ öbun inya, me Cica: a ne khanʼ öbun inya, me khanʼ öbun minya Kamök

²⁰ E ame ha ta je hofuc e hnyi dok adre hip mone, e ame tiga ûne hnyi uma kap: ke ba at ame kât e; anyin ae tiga ca o bi ûen.

²¹ Iesu ame ha hmetu ködra, ka habe, Oge me he but ka he, ke öbun e he bi ja ka elöm nya, ke öbun e he ka mekiny anyibun ta je hulö: haba dok oge me he ka hnyin, me ca khanʼ öbun he ka he ka hnyin.

²² Me ame ha at Juda, ka habe, Hawa, ame ka he ka hamen hlingâ e bi anyin a haingen, ka habe, Haba dok oge me he ka hnyin me ca khanʼ öbun he lea he ka hnyin.

²³ Me e ame ha kodra, ka habe, Ûkebun eang hmelen; ke ûhek thö: öbun aten hmeledrany, ke iny ca at hmeledrany bi nya.

²⁴ Anyin a wale, oge me ha köbun, ka habe, Öbun e he ka mekiny anyibun ta je hulö: anyin a öbun e ne ca labageju, ka habe, Inya e, me öbun e be ka mekiny anyibun ta je hulö.

²⁵ Ke haingödra kâu, ka habe, U ia? Haba Iesu ame ha ködra, ka habe, Wale ûnyi oge hia but ha köbun hwân hnyi can.

²⁶ E ha gak ta je ûnyi ae se he ka ha köbun me he ka owisa: ke so bi e hnathu e at a kunö nya; ke haba je hofuc a hwan oge me long me inya oge me ha e ka hmeledrany.

²⁷ Ke adre me ca wâhmakhmeto a e ame ha ködra ge Kamen.

²⁸ Ke haingö Iesu, ka habe, öbun ka hia but kap goranyai Nokon at, me ame he ka khanʼ öbun, ka habe, Inya e, ke oge me ca mâdrâ ke ûnyi ka ûnyi gak bi, ke haba hnen Kamök hna nö nya, me wale can oge me ha ta je hofuc ang.

²⁹ Ke tha e mönya at a kunö nya: e ame ca hnö nya but; anyin a inya oge me ânyâ bala ta je ûnyi hnân osenyinâ e.

³⁰ E ame tiga ha ta je hofuc eling, me ame labageju kâu tavat ae se hia.

³¹ Haba Iesu ame ha ka at Juda, tavat adre me labageju kâu, ka habe, Öbun e ne he ka laba hmâ hnyi hok hofuc, me öbun je latök ae hnathu;

³² ke ame he ka khanʼ öbun hnathu, ke adre me he ka hnʼ öbun ge hnathu.

³³ Me adre me thu kâu, ka habe, Ohmun je mâtrâni Aberahama, ke tiga ca hom hwenbʼ ohmun hnen ke at: a hawa, u me ha, ka kabe, Adre me he ka hnʼ öbun dut?

³⁴ Iesu ame thu kodra, ka habe, E hnathu, e hnathu, inya oge me ha köbun, ka habe, haba at ame he ka mâdrâ monu e ame bi aten hulö.

³⁵ Ke haba aten, me e ame ca laba hmâ bi hnyi hnyaba: ke so bi nokon ame laba hmâ.

³⁶ Anyin a wale a ne he Nokon ka hnʼ öbun adre me he ka ti hnʼ öbun dut.

³⁷ E khanö nya a öbun je mâtrâni Aberahama; ke öbun bi öbun e elâm he ka hlingö nya, anyin ae ba hnen hok hofuc eû hnyi je hnyekubun.

³⁸ Inya oge me ha ta je ûnyi oge me hia but wâ unyin Kamök: ke öbun e mâdrâ minya öbun hnobun hna wâ unyin kamöbun.

³⁹ Ödra adre me thu, ka habe, Aberahama kamöhmun. Iesu ame ba kodra, ka habe, A ne je laku Aberahama öbun, mʼ öbun e he ka mâdrâ je huliwa anyi Aberahama.

⁴⁰ Ke walang ang, öbun e elâm he ka hlingö nya, wale at ame ha köbun hnathu, waleji oge me long ûnyi ge Khong: ke ca ânyâ helâe Aberahama.

⁴¹ Öbun e ânyâ ta je huliwa anyin kamöbun. Haingödra kâu, ka habe, Ohmun ca je lakon gethen; khaca thibi Kamöhmun, a wale Khong.

⁴² Iesu ame ha ködrin, ka habe, A ne Khong Kamöbun, öbun e he ka hnyok könya; anyin oge me o but, me oge me o ûnyi ge Khong; ke oge ca ka hamök o, ke e a kunö nya.

⁴³ Ieû gabun öbun e ca wâ ûnykûme hok hofuc? anyin a e ca khanʼ öbun he ka long hok hofuc.

⁴⁴ Ûnyi ge kamöbun öbun, wale diabolo, ke öbun e behe ka ânyâ weny ae kong anyin kamöbun. E at ûhlingö hwân hnyi can, kʼ ame ca tethmâ hnyi hnathu, anyin ae ba hnathu gan. E ka he ka ha thoi, me ka ûnyi gan, anyin a e at thoi, ke kamen thoi.

⁴⁵ Ke can anyin oge me ha hnathu, me öbun e ca labageju könya.

⁴⁶ Ia gabun ame he ka ohnathoâ a gʼ ame hu monu gak? Ke oge ne ha hnathu, ieû gabun öbun e ca labageju könya?

⁴⁷ Haba at a ûnyi ge Khong, me e ame long hofuc hwan Khong: waleling me öbun e ca long anyin a ca ûnyi ge Khong öbun.

⁴⁸ Haba at Juda adre me thu kâu, ka habe, Hawa, ohmun e ca ha hnatho, ka habe, U at Samaria, ke e gam demoni?

⁴⁹ Iesu ame thu, ka habe, E ba demoni gak; ke inya oge me ogânâ Kamök, ke öbun e ohnyikönö nya bi öbun.

⁵⁰ Ke oge me ca elâm hnân ogânö nya bi: e hu at ame elâm, me owisa minya.

⁵¹ E hnathu, e hnathu, inya oge me ha köbun, ka habe, a ne hu at ame he ka vheno hok hofuc, me e ame ca he ka wâ mok nyiele balua.

⁵² Me ame ha kâu at Juda, ka habe, E khanʼ ohmun dut walang ang, a e unyâm demoni. A mokcu Aberahama, me ta je perofeta, ke u me ha, ka habe, A ne hu at ame he ka vheno hok hofuc, me e ame ca he ka wâ mok nyiele balua.

⁵³ Hawa, u gan hon kamöhmun a Aberahama, waleji a mokcu? ke mok minya ju ta je perofeta: ke u ia bi u?

⁵⁴ Iesu ame thu, ka habe, Oge ne ogânö nya bi, me ca ûnyi hnathu ûganik: ke hnen Kamök hna ogânö nya; wale öbun e ha, a e Khongubun;

⁵⁵ e ca khanʼ öbun e: ke khanö nya e; oge ne ha, ka habe, E ca khanö nya e, awe, oge ma at thoi bi helâ me öbun: ke khanö nya e, ke oge me vheno hwan hofuc.

⁵⁶ Ame senyin Aberahama a kamöbun he ka wâ bonguk je bong; ke e ame wâ ju me e ame senyin.

⁵⁷ Me haingen at Juda kâu, ka habe, Hawa, ca fifte but ta je hunaiâm ke u je munyi ō Aberahama?

⁵⁸ Haingö Iesu kodra, ka habe, E hnathu, e hnathu, inya oge me ha köbun, ka habe, Iny at kâû adrem, ke tiga hiö Aberahama.

⁵⁹ Me adre me hom je veto he ka lûâ e: ke haba Iesu ame ka oiyongâ e bi, me didrut ûheny hnyi uma kap.