Ioane 7 - Iaai Bible 1901 (New Caledonia)

¹ HWABAN e Iesu ame vheno Galilaia: anyin ae ca weny bi he ka vheno Juda, anyin a at Juda adre me heleû deny he ka hlingâ e.

² E hakekeny jut bijeû anyin at Juda, wale bijeûiny uma menâ

³ Me ame ka kâu liamekeiny mē, ka habe, Hna but dok ang, ke he thö Juda ai, me me wâ thö hnen latâm ta je huliwa u me ânyâ.

⁴ Anyin ae ba at ame ânyâ duöngâ ke ûnyi, e ka weny bi he ka omanenâ e. U je ne ânyâ ta je ûnyi e, awe omanenö u thö ka hmeledrany.

⁵ Anyin ame ca labageju minya kâu je liamekeiny mē.

⁶ Haba Iesu ame thu ködrin, ka habe, E tiga ca o ûök; ke ûöbun bala bi.

⁷ E ca khana bi hmeledrany he ka hûköti öbun; ke so bi ame hûkötiö nya, anyin a oge me ohnathoâ ae kong ta je huliwainy.

⁸ He thʼ öbun ka hnyi bijeû: oge me ca mē he ka hnyi bijeû; anyin ae tiga ca hwâdâ bi ûök.

⁹ E ame ha je hofuc eling kodra, me ame mē laba ju hnyi Galilaia.

¹⁰ Ke ame he but ka hnyi bijeû je liamekeiny mē, me e ame ka he minya, kʼ ame ca he manen bi, kʼ ame he duöng.

¹¹ Haba at Juda adre me elâm e hnyi bijeû, haingödra, ka habe, Ewa?

¹² Ke gan hmâ hna ûlidro gan ge tavat ae se hia: haingen keihen, ka habe, E at ae so; haingen keihen, Ohe, e ame omono tavat ae se hia.

¹³ Ke ba at ame ha manenâ e anyin a ödra outen at Juda.

¹⁴ Ke haba hnyi wanben bijeû, me ame he Iesu ka hnyi uma kap, kʼ ame ûne.

¹⁵ Haba at Juda adre me lâiâ me ha, ka habe, A khana at ang tusi ga ia, ke adre ca nâ bi?

¹⁶ Me Iesu ame thu kodra, ka habe, Ca ûnyi gak hnök hna ûne, ke ûnyi ge at a kunö nya.

¹⁷ A ne weny ke at he ka mâdrâ weny, e ame he ka wâhmakhmetoâ hna ûne, a ne ûnyi ge Khong, oge ne ha ka ûnyi bi gak.

¹⁸ Haba at ame ha hofuc ka ûnyi gan bi e ame elâm be ka ogânâ e bi: ke haba at ame elâm he ka ogânâ at a kunâ e, e hnathu e, ke ba hwakecin ae ca wisa gan.

¹⁹ Hawa, a ca ham köbun Mose hnanyibu, ke ba ke at gabun ame vheno hnanyibu? Ieû gabun öbun e elâm he ka hlingö nya?

²⁰ Haba tavat ae se hia adre me thu me ha, ka habe, E but gam demoni: ia ame elâm he ka hlingö u?

²¹ Iesu ame thu me ha kodra, ka habe, Oge hia but ânyâ ke huliwa, ke öbun e lâiâ hia.

²² Anyin a wale Mose ame hia but ham köbun peritom (ke so bi ca ûnyi ga Mose, ke ûnyi bi ge wahingat); ke öbun e peritomonâ at hnyi sabath.

²³ Adre ne peritomonâ ke at hnyi sabath, kʼ adre me ca he ka hanyâûâ hnanyibu anyi Mose; hawa öbun e hmönyibun könya, anyin a oge me ti osoâ at hnyi sabath?

²⁴ Ca ha ûnykûme bi hoton hna wâ hnen ecmak, ke so bi ha ûnykûme ju hoton wisa.

²⁵ Me haba keihen ûhedra Jerusalema adre me ha, ka habe, Hawa, ca walang at adre me elâm he ka hlingâ?

²⁶ Ke wâ bi, e ame fuc manen, ke ba hodrin kâu. Hawa, e khana je taben me ka e Keriso?

²⁷ Ke haba at ang, me khanʼ ota dok a mwi hnyin: ke e ka o but Keriso, e ba at ame he ka wâhmakhmetoâ dok a mwi hnyin.

²⁸ Me haba Iesu ame fuc hwege hnyi hnyin uma kap me nö ʼdra me ha, ka habe, E khanʼ öbun dut inya, ke khanʼ öbun minya but dok oge mwi hnyin; oge ca o ka ûnyi gak, ke e hnathu e at a kunö nya, wale at ae ca khanʼ öbun.

²⁹ E khanö nya e, anyin a ûhek unyin, ke e a kunö nya.

³⁰ Me adre me elâm he ka kât e: ke ba ke at ame hinôbeny kâu, anyin ae tiga ca o bi ûen.

³¹ Ke ödra se hia adre me labageju kâu; me ödrin e ha, ka habe, E ka o but Keriso, hawa, e ame he ka ânyâ ta je ûöman hon hna ânyâ hnen at ang.

³² A long ut ta je Faresaio hna iulidroköuâ ge tavat ta je ûnyi e gan; me haba je taben tavat bihut me ta je Faresaio, me adre me kunâ je taben tavat tue he ka kât e.

³³ Haba Iesu ame ha, ka habe, E ca beû biju ûök a ûlabaik eang unyibun, ke oge me he ka he but ka at a kunö nya.

³⁴ Öbun e he ka elöm nya, ke öbun e ca he ka wâ: ke ca khanʼ öbun he ka he ka hnyi dok oge me he ka labâ.

³⁵ Me haba at Juda adre me ûhnenamököuâ, ka habe, Ewa dok ame he at ang ka he ka hnyin mʼ ate me ca he bi ka wâ; hawa, e ame he ka he ka tavat adre vese unyin at Heleni, me nâ at Heleni?.

³⁶ Ieû hofuc ang e ame ha, ka habe, Öbun e he ka elöm nya, kʼ öbun e ca he ka wâ: ke ca khanʼ öbun he ka he ka hnyi dok oge me he ka laba hnyin?

³⁷ Hnyi bong a biliny bonginy bijeû, wale bong ae gan, Iesu ame todrö me ha hwegiâ, ka habe, A ne ke at ae beic, he but jem ka ic unyik.

³⁸ Haba at ame labageju könya me ame he ka uoû ûnyi eû hnyi hnyekon je wageweiny möt, helâji me hna sihnalimen.

³⁹ Ke e ame ha ge Hanu, wale ame he tavat adre me labageju kâu he ka kap: anyin adre me tiga ca ham Hanu; anyin adre me tiga ca ogânö Iesu.

⁴⁰ Haba keihen tavat ae se hia, hnyi ûen adre me long ta je hofuc e, me haingödrin, ka habe, E hnathu, perofeta at ang.

⁴¹ Haingen keihen, ka habe, Walang Keriso. Ke haingen keihen, ka habe, Hawa, ame o Keriso ûheny Galilaia?

⁴² Hawa, adre me ca ha bi hnyi hna sihnalimen, ka habe, Ame he ka o Keriso ûnyi ge mâtrâni Davita, ke haba taun anyi Davita, me Betheleema.

⁴³ Me ame khekhe lo but tavat gan.

⁴⁴ Ke e weny keihen he ka kât e; ke ba bi at ame hinöbeny kâu.

⁴⁵ Me ame he hmetu but je taben tavat tue ka je taben tavat bihut me ta je Faresaio; ke ödrin e ha kodra, ka habe, Ieû gabun öbun e ca hom but e?

⁴⁶ Haingen je taben tavat tue, ka habe, E ba at ame fuc helâe.

⁴⁷ Me ame thu kodra ta je Faresaio, ka habe, Hawa, adre hia but omonu öbun minya?

⁴⁸ Hawa, e hu ke taben ame ne ke at Faresaio ame labageju kâu?

⁴⁹ Ke hnaûhango but houmonu ang ae ca khanʼ ödra bi hnanyibu.

⁵⁰ Me ame ha ködra Nikodema, (e ke at gadra, kʼ ame he kâu ehac),

⁵¹ ka habe, Hawa ge anyita hnanyibu, adre me he ka hangâ at ke adre me ca mē long dö gan me me manen dut hnen hna mâdrâ?

⁵² Me adre me thu me ha kâu, ka habe, Ûhem minya Galilaia? Elâm dö me wâ, anyin ae ba ke perofeta ame o ûheny Galilaia.

⁵³ Me adre me vese but ka hnyi umödra ta je uma: