Ioane 4 - Iaai Bible 1901 (New Caledonia)

¹ KE a wâ but Than a gʼ ame long hnen ta je Faresaio, ka habe, Iesu ame bi laten me bapataisoâ tavat ae se hia, ke wakhalet bi Ioane

² (ke so bi ame ca bapataisoi ödra ga Iesu, ke hnen laten),

³ me e ame hna but Juda me he hmetu Galilaia ai.

⁴ Ke hamen he ka he hanyâûâ Samaria.

⁵ Me e ame o but hnyi ke taun hnyi Samaria, Sikara ien, e hakekeny ka hnyi utkânâ a ham Jekob ka nokon jia Josefa:

⁶ eling an beli Jekob. Ke ame laba ju Iesu hon an anyin ae sënyin dut anyin he. Awa a siksiny eling.

⁷ Me ame o but ke momo Samaria he ka se köiö: ke baingö Iesu kâu, ka habe, Habelik.

⁸ Haba laten, me ödrin e he but ka hnyi taun he ka ûcû jeû.

⁹ Ke haingen momo Samaria kâu, ka habe, Ieû gam, a u at Juda, kʼ u me sumatö köiö gak, kʼ iny momo Samaria bi nya? (Anyin ae ca iate at Juda me at Samaria.)

¹⁰ Haba Iesu ame thu me ha ka momo, ka habe, A ne manen köu bwihlany anyin Khong, me at ame ha köu, Habelik; me u je he ka sumâtâ gan, me e ame he ka ham köu köien möt.

¹¹ Me haingen momo kâu, ka habe Than lö, e ba ûnyi gam hnân soû, ke dit an, ke ûnyi ua köien möt gam?

¹² Hawa, u gan hu Jekob hanen lakamöhmun, at a ham kohmun an ang, ke belen e, me lakon, me ta je haleny?

¹³ Iesu ame thu me ha kâu, ka habe, Ame he ka beic hmetu tavat adre me ijem an ang:

¹⁴ ke haba at ame he ka ijem an oge me he ka ham, me ame ca he hmetu bi ka beic nyiele balua; ke haba köiö oge me he ka ham kâu me ame he ka eû hnyi hnyekon wale an ame pupua ka hnyi möt ame ca ba balua.

¹⁵ Haba momo ame ha kâu, ka habe, Than lö, ham but könya an e, mʼ inye ca beic hmetu, mʼ inye ca hmetu jem kââng he ka se köiö.

¹⁶ Haingö Iesu kâu, ka habe, He thö ka hawâ jem âiâm.

¹⁷ Haba momo ame thu, ka habe, E ba öiok Haba Iesu ame ha kâu, ka habe, E hnathu hnâm hna ha, ka habe, E ba âiâm:

¹⁸ anyin a ödrin thabûng ehac lâiâm, ke haba at u me tha laba mē walang, me ca âiâm bi: waleling, e me hnathu hnâm hna ha.

¹⁹ Haingen momo kâu, ka habe, Than lö, oge wâ but a u perofeta.

²⁰ Haba lakamöhmun adre me hmi hnyi bucen ang, ke öbun e ha, ka habe, E ûcû ka tavat he ka hmi hnyi Jerusalema.

²¹ Iesu ame ha kâu, ka habe, Momo lö, labageju nya ju, a gʼ ame he ka o ûen öbun e ca he ka hmi ka Kamen hnyi bucen ang, ke ba minya bi hnyi Jerusalema.

²² E ca khanʼ öbun hnobun hna hmi kâu; ke e khanʼ ohmun hnöhmun hna hmi kâu: anyin a ûnyi ge at Juda ûhomeli.

²³ Ke ame he ka o ûen, ke wale but ang, a gʼ ame he ka he tavat adre me hmi hnathu ka hmi ka Kamen hnyi hanu me hnathu: anyin a Kamen ame elâm tavat helâe he ka hmi kâu.

²⁴ Khong Hanu; ke hamen tavat adre me hmi kân he ka hmi hnyi hanu me hnathu.

²⁵ Haingen momo kâu, ka habe, E khanö nya a gʼ ame he ka o Mesia (adre hwenyi ien Keriso): ke hnyi ûen e ame o but, e ame he ka omanenâ köta ta je ûnyi hia.

²⁶ Iesu ame ha kâu, ka habe, Inya ang at ame ûhnenamö möu.

²⁷ Ke ame o but laten; ke ödrin e lâiâ anyin a e ame ûbnenamö me momo; ke so bi, e ba at ame ha, ka habe, Ieû u me elâm? ke, ieû e gam u me ûhnenamö me momo?

²⁸ Haba momo ame ip ju belen kaia me he ka hnyi taun, me ha ka tavat, ka habe,

²⁹ Ai öbun he ka hnyi wâ at ame hia but ha könya ta je ûnyi hia oge hia but ânyâ: hawa, ame ne e la Keriso?

³⁰ Me adre me he but ûhedra hnyi taun, me o kâu.

³¹ Kʼ ödra tiga bec, me ame ûjengö e laten, ka habe, Kabi, ö u mē han dö.

³² Ke haingen ködrin, ka habe, E hu ök ae ca khanʼ öbun.

³³ Anyin a wale, ame ûhnenamököuâ laten, ka habe, Ame ne hu at a hân?

³⁴ Haingö Iesu ködrin, ka habe, Walang ok, a oge me he ka mâdrâ weny at a kunö nya, me umo anyik huliwa.

³⁵ Hawa, ca hobun ang, ka habe, Vak biju ta tehi, me adre me menu? ke wâ bi, inya oge me ha köbun, ka habe, Bwele thʼ öbun, me wâ je hna belok a hmahmat ut ang he ka menu.

³⁶ Haba at ame hiny, me e ame kap hwaban, kʼ ame ûkhöûnâ troban hobi kâu möt ame ca ba; me me tha senyin at ame tā me at ame hiny.

³⁷ Waleling me me hnathu hna ha, ka habe, Ame tā hnen keʼat, kʼ ame hiny bi hnen ke at.

³⁸ Oge me kunʼ öbun he ka hiny hnobun hna ca huliwan: a hia but huliwa keihen, me öbun e didro ka hnyi anyidra ta je huliwa.

³⁹ Ke ame labageju kâu tavat Samaria ae se hia hnyi taun eling, can hofuc hwan momo, ka habe, E ame hia but ha könya ta je ûnyi hia thithö oge hia but ânyâ.

⁴⁰ Ke ame e but kâu tavat Samaria, me adre me sumâtâ e he ka tha laba mödra: me e ame laba eling lo li bong.

⁴¹ Ke ame labageju tavat ae se hia hmonyin ûnyi ge hofuc a hwan;

⁴² mʼ ödrin e ha bi ka momo, ka habe, Ohmun e ca hake labageju thibi ûnyi ge hwâm hofuc; anyin a ohmun e hnyi long ut me wâ a wale thibi e At omelö hmeledrany.

⁴³ Hwaban lo li bong e ame hna but dok e, kʼ ame he Galilaia ai.

⁴⁴ Anyin a Iesu ame ohnatho, a gʼ adre me ca ogânâ perofeta hnyi ka iny hnyei.

⁴⁵ E ame o hnyi Galilaia, me ame kap e ge at Galilaia, anyin adre me wâ ta je ûnyi e ame ânyâ hnyi Jerusalema hnyi bijeû: anyin adre me hnyi mwi minya hnyi bijeû.

⁴⁶ E ame o hmetu hnyi Kana hnyi Galilaia, waleji e ame wia hnyin köiö me me waina. Ke wale ke taben, kʼ ame mok nokon hnyi Kaperenauma.

⁴⁷ E ame long a gʼ ame o but Iesu hnyi Galilaia ûheny Juda, me e ame he but kâu, me sumâtâ e, me me he ka osoâ nokon; anyin ae hakekeny jut he ka mok.

⁴⁸ Haingö Iesu ame ha kâu, ka habe, Öbun e ne ca wâ ta je haten me ûöman, öbun e ca he bi ka labageju.

⁴⁹ Haingen taben kâu, ka habe, Than lö, he thö jem, e me tiga ca mok bi nokuk.

⁵⁰ Haba Iesu ame ha kâu, ka habe, He thö, a möt ut nokom. Haba at, me e ame labagejon hofuc a ha Iesu kâu, me e ame he.

⁵¹ Ke e ame tiga he, me ame ûkhanö mē lathnyabainy me ödrin e ha kâu a gʼ ame mödrut nokon.

⁵² Me e ame hnei ödrin ge ûen ioiny möt. Me ödrin e ha kâu, ka habe, a hna but e et hnen kahwa, hnyi awa a seveniny.

⁵³ Me ame wâhmakhmeto kamen ka habe, wale awa a ha hnyin kâu Iesu, ka habe, A mödrut nokom: me e ame labageju me anyin hia lap.

⁵⁴ Wale ûöman a loiny a ânyâ Iesu, waleji ge ibi ioiny hnyi Galilaia ûheny Juda.