Ioane 2 - Iaai Bible 1901 (New Caledonia)

¹ HABA hnyi bong a kuniny me adre me ânyâ faipoipo hnyi Kana hnyi Galilaia; eling hinyö Iesu:

² ke adre me hao Iesu me laten ka hnyi faipoipo.

³ Ke a um dö waina, me haba hinyö Iesu ame ha kâu, ka habe, E ba but waina gadra.

⁴ Haba Iesu ame ha kâu, ka habe, Bai lö, ieû gam könya? e tiga ca o ûök.

⁵ Haba hinyen ame ha ka je lathnyaba, ka habe, Haba ûnyi e ame he ka ha köbun, ânyâ thö.

⁶ Ke e hu eling je kaia veto a siks, adre me ip hnân okâlâotâ helâ me hwakecin at Juda, ûsa lo ame ne kun ta bath tulutiny.

⁷ Haingö Iesu ködrin, ka habe, Öunöngötâ thö je kaia ge köiö. Me ödrin e öunöngötâ ke ne o but hnyi hnyimen.

⁸ Haingen ame ha ködrin, ka habe, Sâû thö walang ang, me hom dö ka taben bijeû. Me ödrin e hom.

⁹ Ke a hia but taben bijeû drem cubecâ köiö adre wia me me waina, ke ca khana bi dok a ûnyi hnyin (ke e khana bi lathnyaba tavat adre sâû) haba taben bijeû ame hawâ at a tep faipoipo,

¹⁰ me ha kâu, ka habe, Hwakecin tavat he ka khenâ bânâ waina ae so; ke e ka hia but ijem gânâ, adre hom waina ae kong: ke haba u, u je tuö waina ae so ke ne o but ang.

¹¹ Wale ûöman a ânyâ Iesu a bân hnyi Kana hnyi Galilaia, me omanenâ anyin hmanenang; haba laten ödrin e labageju kâu.

¹² Hwaban e, e ame he Kaperenauma ai, e, me hinyen, me je liamekeiny mē, me je laten: ke ca se je bong adre me laba eling.

¹³ E hakekeny jut paseka anyin at Juda, ke haba Iesu ame he Jerusalema ai.

¹⁴ Me e ame wâ hnyin uma kap tavat adre me ûco je bolok, me mamoe, me biny, ke tavat adre me wia mone, adre me ûlalabainy:

¹⁵ me e ame hom je ong to hnân osö, me obʼ ödrin hia ûnyi hnyin uma, me ta je mamoe, me bolok; me hingâlâ degecâ ta je mone anyin tavat adre me wia mone, me ohnyimenâ hnyikânâi ta je laulau;

¹⁶ me e ame ha ka tavat ûco je biny, ka habe, Hom dö ta je ûnyi eang ûheny ang; ca wia bi uma umo Cica, me me uma ûcû.

¹⁷ Haba laten adre me ûnykûme hna sihnalimen, ka habe, A hia but uto nya hnen weny ae gan hmâ ka umâm uma.

¹⁸ Me ame thu at Juda me ha kâu, ka habe, Ieû haten u me he ka omanenâ kohmun, a u me ânyâ ta je ûnyi e?

¹⁹ Iesu ame thu me ha ködrin, ka habe, Kia but uma eang, me oge me he ka otilâ hmetu e hnyi ta bong a kun.

²⁰ Me haba at Juda adre me ha, ka habe, Fâte siks je huna adre otilâ hnyin uma eang, ke u me he ka otilâ e hnyi ta bong a kun?

²¹ Ke haba uma e ame ha, me, wale a unyin.

²² Ke hnyi ûen ame möt hmetu thö e ûheny hnyi hna mok, me ame ûnykûme laten a gʼ ame ha helâe; ke ödrin e kap hna sihnalimen me hofuc a ha Iesu.

²³ Tiga e bi hnyi Jerusalema hnyi bijeûiny paseka, ödra se hia adre me labageju ka hnyi ien, anyin adre me wâ ta je ûöman e ame ânyâ.

²⁴ Ke haba Iesu ame ca ka hna e kodra, anyin a e ame wâhmakhmetoâ tavat hia,

²⁵ ke ca ûnyi hnathu kâu a gʼ ame he at ka omanenâ hwakecin at; anyin a e ame wâhmakhmetoâ ta je ûnyi eû hnyi hnyin at.