Ioane 18 - Iaai Bible 1901 (New Caledonia)

¹ AHIA but Iesu ha ta je hofuc e, me e ame he hanyâûâ wagewe Kederon tha e me laten, eling ke ong utkânâ, me e ame o ka hnyin me laten.

² Ke e khanö Juda dok eling, at ame alecuâ e: anyin ame labö o eling Iesu me laten.

³ Ke haba Juda a hia but kap je soja me tavat tue ûnyi ge je taben tavat bihut me ta je Faresaio, adre me o eling me ta je lamepa me ta je okûnû me ta je ûnyi hnân vat.

⁴ Ke e khanö Iesu ta je ûnyi hia ame he ka o kâu, e ame he but, me ha kodra, ka habe, Ia öbun e elâm?

⁵ Adre me thu kâu, ka habe, Iesu at Nazareta. Iesu ame ha kodra, ka habe, Inya ang. Ke haba Juda at ame alecuâ e, ame tha tot mödra.

⁶ Ke a hia but ha kodra, ka habe, Inya ang, me adre me kec nulötudra me ta ju eû hnyi kânâ.

⁷ Me e ame hnei ödra hmetu, ka habe, Ia öbun e elâm? Ke adre me ha, ka habe, Iesu at Nazareta.

⁸ Iesu ame thu, ka habe, Oge hia but ha köbun, ka habe, Inya ang: öbun e ne elöm nya, hna but tavat ang, mʼ adre me he but:

⁹ me me hwâdâ hofuc e ame ha, ka habe, E ca hia ke at gadra u je ham könya.

¹⁰ Ke hu hele vat anyi Simona Peteru, me e ame oc dö, me köt athnyabainy taben tavat bihut, me ame subâ but hnyikonyen a metâ. Maliko ien athnyaba.

¹¹ Haba Iesu ame ha kö Peteru, ka habe, Inâ hmetu ju hele vat ka hnyi umen: hawa, oge me ca he ka ijem kaia a ham könya Cica?

¹² Me adre me köt Iesu me ca thö e hnen ta je soja me taben vat, me je taben tavat tue at Juda,

¹³ me lelo thö e a bân kö Ana; anyin a e ûngû Kaiafa taben tavat bihut hnyi huna eling.

¹⁴ Ke Kaiafa at ame ha ka at Juda, ka habe, E ûnyi hnathu he ka mok at a khaca hnân hwaban hnyei.

¹⁵ Haba Simona Peteru ame he hotu Iesu, me ke aten minya. Ke ame wâhmakhmetoâ aten eling hnen taben tavat bihut, me e ame dit minya me Iesu ka hnyi hnyeuleny uma umen taben tavat bihut;

¹⁶ ke haba Peteru ame tot eû hnyi hwanuma. Ke ame dit hmetu but aten eling, waleji ame wâhmakhmeto hnen taben tavat bihut me ha ka momo at ame tuö hwanuma he ka hum Peteru ka hnyin uma.

¹⁷ Me ame ha momo, at ame tuö hwanuma kö Peteru, ka habe, Hawa, u hanen laten at ang? Haingen, ka habe, Ca munyi inya.

¹⁸ Ke ame ûtitilen eling lathnyaba me tavat tue, kʼ adre me hû ke meic alep, anyin a ödra megic, me adre me hlök: kʼ ame tha tot Peteru mödrin, ame munyi hlök.

¹⁹ Haba taben tavat bihut ame hnei Iesu ge laten, me hnen minya hna ûne.

²⁰ Haba Iesu ame thu kâu, ka habe, Oge hia but ha manenâ ka hmeledrany; oge me labö ûne hnyin je sunago, me hnyin uma kap, wale ame labö ûkhacaköu hnyin at Juda; ke ba hofuc oge me ha duöngâ.

²¹ Ieû gam u me hnei nya? hnei ödra bi tavat adre me long hnok hna ha ködra: wâ bi e khanʼ ödra but hnok hna ha.

²² Ke a hia but ha e, me ame khaû e hnen ke at tue, at ame tot hakekenyâ, haingen, ka habe, U me thu helâe kâ taben tavat bihut?

²³ Haingö Iesu, ka habe, A ne kong hnok hna ha, omanenâ thö monu: ke a ne so, ieû gam u me kuc nya?

²⁴ Ke haba Ana ame ca e me kunâ kö Kaiafa taben tavat bihut.

²⁵ Ke haba Simona Peteru ame tot, kʼ ame hlök. Me adre me ha kau, ka habe, U ke aten minya? E ame ivinö me ha, ka habe, Ca inya.

²⁶ Ke ame ha ke at hanen athnyabainy taben tavat bihut, a liamekeiny me at eji a subâ Peteru hnyikonyen, ka habe, Oge me ca ō u mē hnyi ong utkânâ?

²⁷ Haba Peteru ame ivinö hmetu: ke ame ie kokok dö khoto.

²⁸ Ke ödrin e lili Iesu thö ûheny unyi Kaiafa ka hnyi uma umen than: ka hnyomakatu but; ke adre me ca hnyi dit ka hnyi uma umen than, wâ adre nye bo kong he ka hnyi an paseka.

²⁹ Haba Pilato ame didrut ködra, me ha, ka habe, Ieû monu anyin at ang öbun e he ka ha?

³⁰ Me adre me thu kâu, ka habe, A ne ba monu anyin at ang, ohmun e ca he ka hna köu.

³¹ Haingö Pilato ame ha kodra, ka habe, Hom dʼöbun me hnö helâ me anyibun hnanyibu. Haingen kâu at Juda, ka habe, E ca ûcû köhmun he ka hlingâ at:

³² me me hwâdâ hofuc ho Iesu a ha, ame omanenâ bongon imekiny bi.

³³ Anyin a wale Pilato ame dit hmetu thö ka hnyi uma umen than, me hawo Iesu, me ha kâu, ka habe, Hawa u Tuhan at Juda?

³⁴ Iesu ame thu, ka habe, u me ha e ka ûnyi gam, ke hawa, e hu at a haiö nya köu.

³⁵ Pilato ame thu, ka habe, Iny at Juda? Hnen aten em hnyei me je taben tavat bihut hna hnö u könya: ieû u je mâdrâ?

³⁶ Iesu ame thu, ka habe, Ca ûnyi eang hmeledrany dökhuk dokhu: a ne ûnyi eang hmeledrany dökhuk dokhu, ame ne he lathnyabaik ka vat, mʼ adre me ca he ka hnö nya ka at Juda: ke walang ang ca ûnyi ang dökhuk dokhu.

³⁷ Me Pilato ame ha kâu, ka habe, Hawa gam, u than? Iesu ame ha, ka habe, U me ha e, a iny than. Adre hnöku nya hobi kâu e, ke oge o but eang hmeledrany hobi kâu e, me inye he ka ohnathoâ hnathu. Haba ta je aten hnathu hia, adre me long ifucik.

³⁸ Pilato ame ha kâu, ka habe, Ieû hnathu? A hia but ha e, e ame dit hmetu but ka at Juda me ha ködra, ka habe, Oge me ca wâ thö ke monu gan.

³⁹ Ke hwakecibun, oge me thang köbun ke at hnyi paseka: hawa, e webun oge me he ka thang ut köbun Tuhan at Juda?

⁴⁰ Ödra adre me ha hwegiâ hmetu, ka habe, Ca e bi, ke so bi Barabasa. Ke haba Barabasa, me at venöu.