Ioane 17 - Iaai Bible 1901 (New Caledonia)

¹ IESU ame ha ta je ûnyi e; ke e ame bwele hnyi drany ai me ha, ka habe, Cica lö, a o but ûen; ogânâ thö Nokom, me me oganö u minya bi Nokom:

² waleling u je hna e he ka muso tavat hia, me me he ka ham möt ame ca ba balua kodra hia u je ham kâu.

³ Ke walang möt ame ca ba balua, a gʼ adre me he ka wâhmakhmetu u Khong hnathu a khaca thibi, me at u je kunâ, wale Iesu Keriso.

⁴ Oge me oganö u eang hmeledrany, ke oge hia but umo huliwa u je kunö nya he ka ânyâ.

⁵ Ke walang ang, Cica lö, oganö nya thö tha inya möu ge hmanenangitu kâû adrem ke tiga hia bi hmeledrany.

⁶ Oge hia but omanenâ iâm ka tavat u je hna könya ûnyi eang hmeledrany: ânyâm ödrin ke u je hnʼ ödrin könya; ke ödrin e vheno but hwâm hofuc.

⁷ Walang ang, e khanʼ ödrin but a ûnyi gam ta je ûnyi hia thithö, u je ham könya:

⁸ anyin oge ham ködrin ta je hofuc u je ham könya; ke ödrin e hia but kap, ke e khanʼ ödrin wia but a oge o but ûnyi gam, ke ödrin e labagejon hnâm hna kunö nya.

⁹ Inya oge me hic hobi ködrin: oge ca hic hobi kâu hmeledrany, ke hobi ködrin bi u je ham könya; anyin a ânyâm ödrin:

¹⁰ ânyâm, anyik ta je ûnyi hia, ke anyik, ânyâm ta je ûnyi; ke ödrin e oganö nya.

¹¹ Ke oge me ca he hmetu ka laba eang hmeledrany, ke ödrin e he biju ka laba eang hmeledrany, ke inya oge me he but köu. Kamök ae kap lö, tuʼ ödrin ju hnyi iâm waleji u je ham könya, mʼ ödrin e khaca thibi helâ me ötu.

¹² Oge tuʼ ödrin hnyi iâm, waleji ke tiga inya unyidrin, hnyat u je ham könya: ke oge tuʼ ödrin me ba ke at gadrin ae hia, ke aten thiju hnaûhango; me me hwâdâ hna sihnalimen.

¹³ Ke walang ang inya oge me he ka he but köu; ke inya oge me ha ta je ûnyi e eang hmeledrany, me me he ka hwâdâ anyik senyin eû hnyi je hnyekudrin.

¹⁴ Oge hia hut ham ködrin hwâm hofuc; ke ame huköti ödrin ge hmeledrany, anyin a ödrin ca aten hmeledrany, helâ me inya a ca aten bi hmeledrany.

¹⁵ Oge me ca sumatö u a u me he ka hum ödrin ûnyi eang hmeledrany, ke so bi he ka tuʼ ödrin hnyi hulö.

¹⁶ Ödrin ca aten hmeledrany, ke helâ me inya ca aten hmeledrany.

¹⁷ Okabi ödrin ju ge hnathu gam: he haba hnathu, me hwâm hofuc.

¹⁸ U je kunö nya ka hnyi hmeledrany, helâe minya oge me kun Ödrin ka hnyi hmeledrany.

¹⁹ Oge me ka okabi nya hobi ködrin, mʼ ödrin e kap bi ödrin hnyi hnathu.

²⁰ Ke oge me ca hic hnân hobi ködrin thibi, ke hobi kodra minya tavat adre me labageju könya ûnyi ge hodrin ta je hofuc;

²¹ mʼ adre me be bi hia thithö ka khaca thibi; helâ me u Cica eû hnyi hnyik, ke inya minya bi eû hnyi hnyâm, me me tha ödra mʼ ötu: me me labageju hmeledrany a u je kunö nya.

²² Ke haba hmanenang u je hia but ham könya, oge hia but ham kodra; mʼ adre me he bi ka khaca thibi, helâ me ötu a ötu khaca thibi;

²³ inya eû hnyi hnyidra, ke u eû hnyi hnyik, me adre me he ka khaca thibi hmonyin bi: me me he hmeledrany ka wâhmakhmetoâ a u je kunö nya, me u je hnyok kodra, helâji me hnâm hna hnyok könya.

²⁴ Cica lö, haba wek, a gʼ me he ka tha ödra mönya bi hnyi hnök, tavat u je hia but ham könya; mʼ adre me be bi ka wâ anyik hmanenang, waleji u je hna könya; anyin a u je hnyok könya kâû adrem kʼ adre tiga ca bi taben hmeledrany.

²⁵ Kamen ae wisa lö, e ca khana hmeledrany u, ke haba inya, me khanö nya u; ke haba hnyat ang, me khanʼ ödrin a u je kunö nya;

²⁶ ke oge me omanenâ ködrin iâm, F oge me he minya bi ka omanenâ e; me me laba eû hnyi je hnyekudrin ibetengiö waleji a hnâm hna betenge gak, ke inya eû hnyi je hnyekudra.