Ioane 16 - Iaai Bible 1901 (New Caledonia)

¹ OGE hia but ha ta je hofuc e köbun, mʼ adre me ca he ka ohaûʼ öbun.

² Adre me he ka obʼ öbun ûnyi hnyi ta je sunago: eke, ame he ka o ûen, a gʼ ame he at ka hlingʼ öbun, me ûnykûme a e ame bi aten Khong.

³ Ke adre me he ka ânyâ ta je ûnyi e anyin ae ca khanʼ ödra inya me Kamen.

⁴ Ke oge hia but ha ta je hofuc e köbun hobi kâu e ka o but ûen, öbun e he ka ûnykûme hnok hna ha ta je ûnyi e köbun. Ke oge me ca ha köbun ta je ûnyi e ûnyi hnyi can, anyin a tha inya möbun.

⁵ Ke walang ang inya oge me he but kâu at a kunö nya; ke ba ke at gabun a hnei nya, ka habe, U me he kâ?

⁶ Ke unöngötö je hnyekubun ge hlöuhlöu hnyi hnok hna ha ta je ûnyi e köbun.

⁷ Ke so bi, inya oge me ha köbun hnathu, ka habe, E so hnân hobi köbun iny ka he but; anyin a oge ne ca he, me ame ca he ka o köbun Ûhadruo; ke oge ne he but me oge me he ka kunâ e köbun.

⁸ Ke haba e, e ka o but, e ame he ka ohmâkâ hmeledrany ge hwakecin ae kong, me hwakecin ae wisa, me hna owisa:

⁹ ge hwakecin ae kong, anyin adre me ca labageju bi könya;

¹⁰ ge hwakecin ae wisa anyin a inya oge me he but ka Kamen, ke öbun e ca he hmetu ka ō nya;

¹¹ ge hna owisa anyin adre hia but owisa tuhan eang hmeledrany.

¹² E hu bala gak ta je hofuc ae se hia he ka ha köbun, ke ca khanʼ öbun he ka kap walang ang.

¹³ Ke so bi e ka o but e, wale Hanon hnathu, me e ame he ka su öbun ka hnyi ta je hnathu hia: anyin a e ame ca he ka ha ûnyi gan bi; ke e ame he ka ha ta je ûnyi e ame long: ke e ame he ka omanenâ köbun ta je ûnyi ame he ka o.

¹⁴ E ame he ka oganö nya: anyin a e ame he ka hom but ûnyi gak me omanenâ köbun.

¹⁵ Anyik ta je ûnyi hia anyin Kamen: anyin a wale oge me ha a e ame he ka hom but gak, me omananâ köbun.

¹⁶ E me okhaca, me öbun e ca he hmetu ka ö nya; ke me okhaca hmetu, me öbun e he ka ö nya.

¹⁷ Me ame ûhaköuâ keihen laten, ka habe, Ieû ang ge hnen hna ha kötin, ka habe, Me okhaca, me öbun e ca he but ka ö nya; ke me okhaca hmetu, me öbun e he ka ö nya: me, Anyin a inya oge me he but ka Kamen?

¹⁸ Me adre me ha, ka habe, Ieû ang a hnen hna ha, ka habe, Me okhaca? E ca khanʼ otin hnen hna ha.

¹⁹ A wâ but Iesu a ödrin e behnö e, me e ame ha ködrin, ka habe, Hawa, öbun e ûhnököuâ hnok hna ha köbun, Me okhaca, me öbun e ca he hmetu ka ō nya, ke, me okhaca hmetu me öbun e he ka ö nya?

²⁰ E hnathu, e hnathu, inya oge me ha köbun, ka habe, öbun e he ka tenge me tenge thungaû, kʼ ame he hmeledrany ka senyin: öbun e he ka hlöuhlöu, kʼ adre me he ka wia anyibun hlöuhlöu me me senyin bi.

²¹ E ka vec dö hnyekon momo a erkin, me e ame hlöuhlöu anyin a o but ûen: ke e ka o but wanakat me e ame ca ûnykûme hmetu anyin vec, anyin ame senyin a ga hnokoâ ke at ka hnyi hmeledrany.

²² E hu gabun walang ang hlöuhlöu: ke oge me he hmetu ka iouny mʼ öbun, me ame he je hnyekubun ka senyin, ke ba at ame he ka ohia anyibun senyin.

²³ Ke ba ûnyi öbun e he ka hnö gak hnyi bong eling. E hnathu, e hnathu, inya oge me ha köbun. Haba ta je ûnyi hia öbun e he ka sumâtâ ge Kamen, me e ame he ka ham köbun ûnyi hnyi iök.

²⁴ E tiga ba ûnyi öbun e hnyi sumâtâ hnyi iök: sumâtâ thö, mʼ öbun e he ka kap bi, me me bekhöt ut anyibun senyin.

²⁵ Oge hia but ha ta je hofuc e hnyi ûhöûcû: ke ame he ka o ûen oge me ca he hmetu ka fuc köbun hnyi ûhöûcû, ke oge me he ka ha manenâ köbun ge Kamen.

²⁶ Hnyi bong eling öbun e he ka sumat hnyi iök: ke oge me ca ha köbun a oge me he ka hic ka Kamen hnân hobi köbun;

²⁷ anyin a Kamen ame betenge gabun, can öbun e hnyok könya, ke can öbun e kap a oge me o ûnyi ge Kamen.

²⁸ Oge me he but ûhek unyin Kamen, me o eang hmeledrany; ke oge me he hmetu ka hna hmeledrany me he ka Kamen.

²⁹ Haingen laten, ka habe, Wâ bi, u me ha manenâ walang ang, ke u me ca ha hmetu je ûhöûcû.

³⁰ E khanʼ ohmun dut walang ang a u me wâ ta je ûnyi hia, ke ca ûnyi hnathu e ka he ke at ka hnei u: anyin a wale ohmun e ûnykûme a u me o unyi ge Khong.

³¹ Iesu ame thu ködrin, ka habe. Öbun e labageju but walang ang?

³² Wâ bi, e hakekeny jut ûen, ke e but ang, mʼ adre me he ka ovesei öbun ka hnyi je hnyababun, ka hake inya thiju: ke ca hake inya bi, anyin a tha inya me Kamen.

³³ Oge hia but ha köbun ta je hofuc e me me hu gabun hnahic ûnyi gak. Haba hnyi hmeledrany, adre me he ka oveci öbun: ke hwege thʼ öbun anyin o ge hia but hom dökhu hon hmeledrany.