Ioane 13 - Iaai Bible 1901 (New Caledonia)

¹ A TIGA ca bijeûâ paseka, ke a wâ Iesu a ga o but ûen he ka he but ka Kamen ûheny ang hmeledrany, ke a hia but hnyokâ lahanen eang hmeledrany, me e ame hnyoki ödra ke ne o but obiny.

² Haba hnyi ûen han sahac, ke a hia but diabolo ip hnyi hnyeku Juda Isakariota nöku Simona he ka alecuâ e,

³ ke a wâ but Iesu a gʼ ame hia but hna ta je ûnyi hia ka hnyi hnyamen hnen Kamen, ke ûheny unyin Khong, kʼ ame he ka hmetu ka Khong,

⁴ awe e ame todrö hnyi hna han, me uny jut anyin je ûkhaû, me hom ecmano me weikâ.

⁵ Ke e ame hingâlâ köiö ka hnyi kaia, me hwân he ka hneû je li can laten, me köt ge ecmano ame weikâ.

⁶ Me e ame he but kö Simona Peteru. Me e ame ha, ka kabe, Than lö, u me he bi ka hneû li cak?

⁷ Iesu ame thu kâu, ka habe, Haba ûnyi oge me ânyâ, me ca khanö u walang ang, ke u me he ka wâhmakhmetoâ nyiele.

⁸ Haingö Peteru kâu, ka habe, U me ca he bala ka hneû li cak. Iesu ame thu kâu, ka habe, Oge ne ca osûö u, me ba jekhom unyik.

⁹ Haba Simona Peteru ame ha kâu, ka habe, Than lö, ca hake li cak thibi, ke so minya li hnyamok me bök minya.

¹⁰ Iesu ame ha kâu, ka habe, Haba at adre me osûâ, me ûcû he ka hneû li can thibi, me ame he ka tha kalaöt hia but: öbun e kalaöt ut ke ca öbun hia bi.

¹¹ Anyin a e ame wâhmakhmetoâ at ame he ka alecuâ e; waleling me me ha, ka habe, Öbun ca kalaöt hia bi.

¹² A hia but hneû je li cadrin, e ame hom hmetu je ûkhaûen, me laba hmetu ju, me e ame ha ködrin ka habe, Hawa öbun e wâhmakhmetoâ hnok hna ânyâ köbun?

¹³ Öbun e hawo nya, ka habe, At ûne me Than: ke so hnobun hna ha, anyin a eke.

¹⁴ Oge ne Than me At ûne, ke oge hia but osûâ je li cabun, me ûcû köbun he ka ûösûâköuâ je li cabun.

¹⁵ Anyin oge hia but ham köbun tulut, me öbun e he ka ânyâ helâ me hnok hna ânyâ köbun.

¹⁶ E hnathu, e hnathu, inya oge me ha köbun, ka habe, E ca gan aten hon tuhan; ke ca gan minya at adre kunâ hon at a kunâ e.

¹⁷ A ne khanʼ öbun ta je ûnyi e, hnobun hnahic öbun e ne he ka ânyâ e.

¹⁸ Oge me ca hai öbun hia: e khanö nya hnok je hna ûca: ke so bi me me hwâdâ hna sihnalimen, ka habe, Haba at ame an ök jeû me ame hûki nya ge ohmâiny can.

¹⁹ Oge me ha ang köbun ke tiga ca hwâdâ bi, hobi kâu e ka hwâdâ thö, mʼ öbun e he ka labageju a inya e.

²⁰ E hnathu, e hnathu, inya oge me ha köbun, ka habe, Haba at ame kap at oge kunâ, me e ame köp nya minya; ke haba at ame köp nya, me e ame kap minya at a kunö nya.

²¹ Ke a hia but Iesu ha e, e ame hmak hnyekon, me thumetu me ha, ka habe, E hnathu, hnathu, oge me ha köbun ame he ke at gabun ka alecuo nya.

²² Haba laten ödrin e ibweleköu, me ûcetköuâ hnen hna ha gan.

²³ Ke wale ke aten ame laba hnyi ûlai Iesu, ame hnyok kâu Iesu.

²⁴ Haba Simona Peteru ame atmemâkâ e, me ha kâu, ka habe, Ha thö at e ame ha.

²⁵ Me e ame hwio hnyi ûlai Iesu me ha kâu, ka habe, Than lö, ia?

²⁶ Me Iesu ame thu, ka habe, Haba at oge me he ka ham ûjeû kâu iny ka hia but hneû. Ke a hia but hneû, e ame hom me ham kö Juda nöku Simona Isakariota.

²⁷ Ke hwaban dö ujeû, ame didrö Satana eû hnyi hnyekon. Haba Iesu ame ha kâu, ka habe, Haba ûnyi u me he ka ânyâ, me ânyâ mweimweiâ thö.

²⁸ Kʼ ame ca wâhmakhmeto ke at gadrin ödrin e laba hnyi laulau ge can e ame ha hofuc eling kâu.

²⁹ Haba keihen ödrin e ûnykûme anyin a e unyi Juda tang, me ame ha kâu Iesu, ka habe, Ûco thö ûnyi ae ûcû otin ka hnyi bijeû; kʼ ame ne ha la, he ka ha omjehen ta je theduoc.

³⁰ A hia but kap ujeû e ame ie didrut: ka lit ut.

³¹ E ame didrut, kʼ ame ha Iesu, ka habe, Adre me ogânâ walang ang Nokon at, ke adre me ogânâ Khong ûnyi gan;

³² ke ame he Khong ka ogânâ e a ka ûnyi gan, kʼ ame he ka ie ogânâ e.

³³ Lakuk lö, e ca beû biju ûök unyibun. Öbun e he ka elöm nya: ke haba hnok hna ha ka at Juda, me oge me ha minya walang ang köbun, ka habe, E ca khanʼ öbun he ka he ka hnyi dok oge me he ka hnyin.

³⁴ Inya oge me ham köbun hnanyibu a teb ûnyi, a öbun e he ka ibetengiököu; oge hia but betenge köbun, e so öbun e be ka helâe wale he ka ibetengiököu öbun.

³⁵ Wale me me he tavat hia thitbö ka wâhmakhmetoâ a latök öbun, hnyi hnobun hna ibetengiököu.

³⁶ Haba Simona Peteru ame ha kâu, ka habe, Taböny Than, u me he kâ? Iesu ame thu, ka habe, E ca khanö u walang ang he ka he hotuk ka hnyi dok oge me he ka hnyin; ke u me he ka he hotuk nyiele.

³⁷ Haingö Peteru kâu, ka habe, Than lö, anyin a ieû ae ca khanö nya he ka be hotom walang ang? oge me he bi ka ham anyik möt hnân hobi köu.

³⁸ Iesu ame thu, ka habe, Hawa u me he ka ham ânyâm möt hobi könya? E hnathu, e hnathu, inya oge me ha köu, ka habe, Ame tiga ca he bi ka kokok khoto, me u me he bi ka ibi okun ivinö nya.