Ioane 12 - Iaai Bible 1901 (New Caledonia)

¹ E tiga siks biju ta bong adre me he ka ânyâ paseka, me Iesu ame he Bethania ai, wale dok a laba hnyin Lazaro waleji a omelö ûheny hnyi hna mok.

² Me ödrin e bi sahac eling hobi kâu: ke haba Maretha ame bi aten; ke Lazaro ke at gadrin ame hnyi han mē.

³ Maria ame hom litara tang muro ae hing narado ae gan hwaban, me hneû kâu li ca Iesu, me köt li can ge leûnen ban: ke unöngötö uma ge bunen muro.

⁴ Me ame ha ke at unyin laten, jia Juda Isakariota, at ame he ka alecuâ e,

⁵ ka habe, Ieû adre me ca ûco gan muro eang me hnân hwaban je denari a theri haded, mʼ adre me he ka ham ka ta je theduoc?

⁶ Ame ca ha e anyin ame betenge ge ta je theduoc; ke anyin bi a e at venöu, ke e unyin tang, ke e ame hom ta je ûnyi hnyin tang.

⁷ Iesu ame ha, ka habe, Ca hâiâ bi momo, e ame ip e hnân hobi kâu bong he ka konim nya hnyin.

⁸ E bala unyibun ta je theduoc; ke oge me ca he bi nya ka laba bala unyibun.

⁹ Me ame long houmonu a tavat Juda a e but ling: me adre me o thö ca hake ga Iesu thibi, ke adre me he minya ka ö Lazaro, waleji a omelö ûheny hnyi hna mok.

¹⁰ Ke a ûhnenamö je taben tavat bihut he ka hlingö Lazaro minya;

¹¹ anyin ae se hia at Juda adre me he me labageju kö Iesu ûnyi gan.

¹² Haba nyi, e se hia tavat adre me he ka hnyi bijeû, ke adre me long a gʼ ame he ka o Iesu hnyi Jerusalema,

¹³ me adre me bi lan pama me he ka ûkhanö mē, me hongot, ka habe, Hosana: hnahic hnen Than Isaraela, ame o but hnyi ien Than.

¹⁴ Ke a wâ but Iesu ke asina ae tiga ûhnyûkong, me e ame tabâ e, helâ me hna sihnalimen, ka habe,

¹⁵ U ca he ka ot, hlu nöku Ziona; wâ bi ame o but Tuhâm, ame tabâ nokon asina.

¹⁶ Ame ca wâhmakhmetoâ laten ta je hofuc eling ûnyi hnyi can: ke adre hia but oganö Iesu, me ödrin e ûnykûme a gʼ adre hia but sihnalimen ta je ûnyi e gan, ke adre me ânyâ ta je ûnyi e kâu.

¹⁷ Me ame ohnathoâ hnen tavat ae se hia a tha ödra mē waleji hnyi hnen hna hawo Lazaro ûnyi hnyi hnyin erkemok, me omelö e ûnyi hnyi hna mok.

¹⁸ Wale minya me me ûkhanö mē tavat ae se hia, anyin adre long ut hnen hna mâdrâ ûöman eling.

¹⁹ Anyin a wale haba ta je Faresaio adre me ûhnenamököuâ, ka habe, Wâ bi, a gʼ ame ca tubun: wâ bi, ame he hoton hmeledrany hia.

²⁰ Wale keihen ta je Heleni unyin tavat adre me he he ka hnyi hmi minya hnyi bijeû:

²¹ me adre me he but kö Filipo at Bethesaida hnyi Galilaia, me hnö e, ka habe, Taböny, ohmun be hnyi ō Iesu.

²² Filipo ame he me ha kö Anederea: haba Anederea me Filipo ödru me he me ha kö Iesu.

²³ Ke haba Iesu ame thu ködrin, ka habe, A o but awa he ka ogânâ Nokon at.

²⁴ E hnathu, e hnathu, inya oge me ha köbun, A ne kolu ka hnyi kânâ ke wan hwit, ke ame ca bobot bi, ame he ka hake mokut; ke a ne bobot, ame he ka wa se hia.

²⁵ Haba at ame hnyokâ anyin möt, me ame he ka ohia e; ke haba at ame hûkötiâ anyin möt eang hmeledrany, e ame he ka tuö e ke ne o but ka hnyi möt ame ca ba balua.

²⁶ A ne ke at ame he ka bi atök, e so e ame he hotuk; ke haba dok o ge me he ka laba hnyin, me ame he minya atök ka laba eling: a ne he ke at ka bi atök ame he Cica ka ogânâ e.

²⁷ E hlohlo hnyekuk walang ang; ke ieû oge me he ka ha? Cica lö, bethe omeli nya hnyi ûen ang. Ke so bi can e oge me o but ka hnyi ûen ang.

²⁸ Cica lö, ogânâ thö iâm. Me ame o but hofuc ûnyi hnyi drany, ka habe Oge hia but ogânâ, ke oge me he hmetu ka ogânâ.

²⁹ Haba tavat adre me ûtitilen eling adre me long me ha, ka habe, Hendreng ang: haingen keihen, ka habe, Angela ame fuc kâu.

³⁰ Iesu ame thu, ka habe, A ca o hofuc e hnân hobi könya, ke so bi hnân hobi köbun.

³¹ Adre me he walang ang ka owisa hmeledrany: ke adre me he walang ang ka obâ tuhan hmeledrany ang.

³² Ke haba inya, adre ne ogoranyi nya ûnyi eang hmeledrany, me oge me he bi nya ka lelo tavat hia thithö könya.

³³ E ame ha e, kʼ ame omanenâ bongon mok e ame he ka mekiny.

³⁴ Haba tavat ae se hia adre me thu kâu, ka habe, Ohmun e long ut ûnyi hnyi hnanyibu a gʼ ame he ka tethmâ Keriso nyiele balua: ieû gam u me ha a ga ûcû he ka ogöranyâ Nokon at? ia Nokon at eling?

³⁵ Haba Iesu ame ha kodra, ka habe, E okhulit biju melam unyibun. He thö e me tiga e unyibun melam, wâ e nye o but köbun lit: haba at ame he hnyi lit, me ca khana dok e ame he ka hnyin.

³⁶ Kap ju melam e me tiga e unyibun melam, mʼ öbun e lakon melam bi. Iesu ame ha hofuc e, me ame he but, kʼ ame labö duöng gadra.

³⁷ Ke so bi, eja ke ne a ne ânyâ ta je ûöman ae se hia hnyi hnyimakodra, adre me ca labageju kâu:

³⁸ me me hwâdâ hofuc ho Isaia perofeta waleji e ame ha, ka habe, Than lö, ia ame labageju ka hnöhmun hna thumeto? Kʼ adre me omanenâ kö ia benyin Than?

³⁹ Anyin a wale e ca khanʼ ödra he ka labageju, anyin a haingö Isaia minya, ka habe,

⁴⁰ E ame owadruâ ta je emaködra, ke e ame okhötâ je hnyekudra; Wâ adre nye wâ ge je emaködra, me ûnykûme ge je hnyekudra, Wâ adre nye hmetu, Mʼ iny omeli ödra but.

⁴¹ Haba Isaia ame ha ta je ûnyi e, anyin a e ame wâ anyin hmanenang; kʼ ame hâiâ e.

⁴² Ke so bi e se hia ta je taben adre me labageju kâu; kʼ adre me ca ha manenâ bi, can ta je Faresaio, wâ adre nye obʼ ödra but ûnyi hnyi sunago:

⁴³ anyin ae nua wedra a gʼ ame he ka ogânʼ ödra hnen tavat, hon wedra a gʼ ame he ka ogânʼ ödra hnen Khong.

⁴⁴ Ame ha hwegiâ Iesu, ka habe, Haba at ame labageju könya, me ame ca labageju bi könya, ke kâu minya bi at a kunö nya.

⁴⁵ Ke haba at ame ō nya; me ame wâ minya at a kunö nya.

⁴⁶ Inya oge me o mʼ inya melaminy hmeledrany, me me ca laba hnyi lit at ame labageju könya.

⁴⁷ Ke a ne long hok hofuc hnen ke at, kʼ ame ca vheno bi, oge me ca he bi nya ka owisa e, anyin oge me ca o he ka owisa hmeledrany, ke so bi he ka omelö hmeledrany.

⁴⁸ Haba at ame digic nya, kʼ ame ca kap bi hok hofuc, me hu bi at ame owisa kâu: haba hofuc, waleji oge me ha, me wale at ame he ka owisa kâu hnyi bong a obiny.

⁴⁹ Anyin a inya oge me ca fuc a ka ûnyi gak; ke haba Kamen, wale at a kunö nya, me e ame hna könya hnanyibu a hanymök he ka ha, me ûnyi minya oge me he ka ûnö.

⁵⁰ Ke e khanö nya a haba anyin hnanyibu, me möt ame ca ba balua: me haba ta je hofuc oge me ha, me helâ me hnen Kamen hna ha könya, me wale hnok hna ha.