Ioane 11 - Iaai Bible 1901 (New Caledonia)

¹ E HU ke at ae mok, jia Lazaro at Bethania, hnyi taun anyi Maria me liamekeiny mē jia Maretha.

² Haba Maria, me wale at ame osûâ Than ge muro, kʼ ame köt li can ge leûnen ban, haniny e a Lazaro at ame mok.

³ Ke haba li lahaniny, me ödru me ûkhûnöng he ka ha kâu, ka habe, Taböny Than, mē wâ bi at u me betenge gan ame mok.

⁴ A long ut; Iesu, me e ame ba, ka habe, Ame ca he ka mekiny mok ang, ke so bi hnân ogânâ Khong, mʼ adre me he minya ka ogânâ Nokon Khong hnen e.

⁵ Haba Iesu ame betenge ga Maretha me liamekeiny mē me Lazaro minya.

⁶ E ame long ae mok, ke e ame laba hmetu ju a lo bongon hnyi dok eling.

⁷ Hwaban e, e ame ha ka laten, ka habe, fitin a hmetu Juda ai.

⁸ Me ame ha kâu laten, ka habe, Rabi, haba at Juda adre me elâm he ka lûö u ge veto, hawa, u me he hmetu kâe?

⁹ Iesu ame thu, ka habe, Hawa, ca twelv awa hnyi bong? A ne he ke at hnyi lany e ame ca he ka thö, anyin a e ame wâ melam eang hmeledrany.

¹⁰ Ke a ne he at hnyi hnyinghet, e ame he ka thö, anyin ae ba melam gan.

¹¹ E ame ha hofuc eling, ke hwaban e, e ame ha kodra, ka habe, A mokut ut Lazaro a hanötin; ke oge me he bi nya ka ohmâkâ e hnyi hna mokut.

¹² Me ame ha laten, ka habe, Taböny Than lö, a ne mokut, e ame he ka möt.

¹³ Haba Iesu ame ha a ga mokcu: ke ödrin e ûnykûme a gʼ ame ha ge mokut me menâ.

¹⁴ Me haba Iesu ame ha manenâ ködrin, ka habe, A mokcu Lazaro.

¹⁵ Ke inya oge me senyin gabun, anyin ae hiö nya e, mʼ öbun e he bi ka labageju; otin he thö kâu.

¹⁶ Ke ame ha Toma, adre wenyö Didumo, ka hnyat a tha laten mē, ka habe, Ötin he minya mʼ ate me he ka tha mok mē.

¹⁷ Me ame o but Iesu, ke e ame wâ a vak ut bongon hnyin erkemok.

¹⁸ Haba Bethania me Jerusalema, me ûhakekeny helâke me fiftin je setadia:

¹⁹ ke se hia at Juda adre me he but kö Maretha me Maria he ka otubweli ödru anyina hanidru.

²⁰ A long ut Maretha a gʼ ame o but Iesu, me e ame he he ka ukhanö mē: ke haba Maria, me e ame laba biju eiö hnyin uma.

²¹ Haba Maretha ame ha kö Iesu, ka habe, Than lö, a ne hnâm ang, ma ca he ka mok hanik.

²² Ke walang ang, e khanö nya a gʼ ame he Khong ka ham köu ta je ûnyi hia thithö u me he ka sumâtâ gan.

²³ Iesu ame ha kâu, ka habe, Ame he ka möt hmetu hânâm.

²⁴ Haingö Maretha kâu, ka habe, E khanö nya a gʼ ame he ka möt hmetu hnyi ûen möt hmetu hnyi bong a obiny.

²⁵ Iesu ame ha kâu, ka habe, Inya ang möt hmetu, me möt minya: haba at ame he ka labageju könya, eja ke ne a ne mokcu, e ame he ka möt:

²⁶ ke haba at ame möt me labageju könya e ame ca he ka mok nyiele balua. Hawa, u me kap e?

²⁷ Haingen ame ha kâu, ka habe, Eke Than, inya oge hia but kap a u thibi Keriso a Nokon Khong, ame he ka o eang hmeledrany.

²⁸ E a hia but ha e, me e ame he but, me hawâ duöngi Maria, a liamekeiny mē, me ha, ka habe, A o thö ang At ûne, ke e ame hawo u.

²⁹ E a long ut, me ame ie todrö, me he kâu.

³⁰ (Ke tiga ca o bi Iesu ka hnyi taun, ke e ame tiga laba hnyi dok e ame ûkhanö me Maretha hnyin.)

³¹ Ke haba at Juda adre tha laba mē eiö hnyin uma, a hnyat otubwelâ, adre me ō Maria ame ie tot me he hnyou ai, me adre me he hoton, adre me ûnykûme a gʼ ame ke ka hnyi erkemok he ka tenge eling.

³² Ame o but Maria ka hnyi dok ae hnyin Iesu, me e ame ta ju ka hnyi li can, me ha kâu, ka habe, Taböny Than, a ne hnâm ang ma ca he ka mok hanik.

³³ Iesu ame wâ e ame tenge, me at Juda adre me tha he mē adre me hnyi tenge, me e ame mâng eû hnyi hnyekon, me hmak hmonyin,

³⁴ me ha, ka habe, Ewa dok öbun e ip e hnyin? Haingödra kâu, ka habe, Than lö, aiö u ka wâ.

³⁵ Iesu ame tenge.

³⁶ Me ame ha at Juda, ka habe, Wâ bi, ûganiny anyin ibe tengiö kâu!

³⁷ Ke haingen keihen, ka habe, Hawa e ca khana at e, wale at a obwela li emakan at ae wadröu he ka thawâ me me ca he ka mok bi at ang?

³⁸ Iesu ame mâng hmetu eû hnyi hnyekon, me o ka hnyi erkemok, wale op, ke adre ip veto hnyi hnyimen.

³⁹ Iesu ame ha, ka habe, Hom but veto. Haingö Maretha a haniny e a mokcu, ka habe, Thanlö, e bon dut, anyin a vak ut bongon.

⁴⁰ Iesu ame ha kâu, ka habe, Oge ca ha köu, ka habe, U je ne he ka labageju, me u me he ka wâ hmanenanginy Khong?

⁴¹ Me adre me hom but veto. Ke haba Iesu ame bwele thö görany ai me ha, ka habe, Cica lö, inya oge me ole köu anyin a u me ling nya.

⁴² Ke e khanö nya a u me ling nya bala: ke oge me ha anyin a ödra se adre me tot igigili nya, mʼ adre me he ka kap a u je kunö nya.

⁴³ E ame ha hofuc e, me e ame hongot hwege thö, ka habe, Lazaro lö, didrut.

⁴⁴ Me ame didrut at a mokcu a gʼ adre lan li can me li benyin ge manoiny erkemok; kʼ adre lan hnyimakan ge ecmano. Iesu ame ha kodra, ka habe, Thang ut e, me hna but me me he but.

⁴⁵ Me ame labageju kâu at Juda ae se, a hnyat adre me o kö Maria, kʼ adre me wâ ta je ûnyi e ame mâdrâ.

⁴⁶ Ke haba keihen gadra, me adre me he but ka ta je Faresaio, me ha kodra ta je ûnyi ame ânyâ Iesu.

⁴⁷ Me haba je taben tavat bihut me ta je Faresaio adre me hawâ ûhnenamö, me haingödra, ka habe, Hawa gata? anyin ae se hia but ta je ûöman ame ânyâ at e.

⁴⁸ Ate ne he ka hna e helâe, me ame he tavat hia ka lababeju kâu: me ame he ka o at Roma bi ka hûgûnâ hnöta me ita minya hnyei.

⁴⁹ Ke haba ke at gadra wale Kaiafa a taben tavat bihut hnyi huna eling, ame ha kodra, ka habe, E ba hmonyin ong ûnyi ae khanʼ öbun,

⁵⁰ ke öbun e ca ûnykûme, ka habe, e ûnyi hnathu köbun a ga mok bi at a khaca hnân hwaban tavat ae se hia, me me ca mok bi hnyei hia.

⁵¹ Ke e ame ca ba e a ka ûnyi gan: ke so bi e taben tavat bihut hnyi huna eling, kʼ ame perofeta a gʼ ame he ka mok Iesu hnân hwaban hnyei eling;

⁵² ke ca hake hnân hnyei eling, ke so bi mʼ adre me ûkhacaköu lakon Khong adre vese, mʼ adre me khaca thibi.

⁵³ Ke hwân hnyi bong eling adre me si hnân he ka hlingâ e.

⁵⁴ Waleling me me ca he manen hmetu Iesu hnyi hnyimakan at Juda, ke e ame he but ka hnyi ke keihen hnyei ae hakekeny ka hnyi hnyebuba, ka hnyi taun Eferaima ien, kʼ ame tha laba eling me laten.

⁵⁵ E hakekeny jut paseka anyin at Juda: ke se hia tavat adre me he Jerusalema ai ûhedra he e, he ka obosoi ödra e me tiga ca ûen paseka.

⁵⁶ Ke adre me elöm Iesu, me ûhnenamököuâ hnyi ûen adre me tot hnyin uma kap, ka habe, Ieû ûnykûmenöbun? Hawa, e ame ca he ka he jem ka hnyi bijeû?

⁵⁷ Haba je taben tavat bihut me ta je Faresaio adre me otilâ hnanyibu, ka habe, A ne ke at ae khana dok ame laba hnyin, hamen he ka omanenâ mʼ adre me he ka kât e.