II. Timoteo 4 - Iaai Bible 1901 (New Caledonia)

¹ INYA oge me hûna wia köu hnyi hnyimakan Khong, me Keriso Iesu, at ame he ka owisa wamöt me wamok, me he ka manen dut e, me dokhon dokhu;

² ka habe, Khetâ thö hofuc; ke hwege thö hnyi ûen ae ûcû, me ûen ae ca ûcû; owisa thö, nâ thö, sihwege thö me hokhnyok beû hmâ me ûne.

³ Anyin ame he ka o but ûen adre me ca he ka kap hna ûne hnân melen; ke so bi, adre me he ka ûkhöûnâ tavat he ka ûne kodra hoton ta je wedra ae monu, anyin ae hölök ta je hnyikönyödra;

⁴ ke adre me he ka wia ta je hnyikönyödra ûnyi hnyi hnathu, me saû but ka hnyi ta je vekhet.

⁵ Ke u me he ka hnyokâ wisa hnyi ta je ûnyi hia, hokhnyok ju hnyi ta je vec, ânyâ thö hanymen at ame huliwan ûthumetu ae so, obekhötâ hanymâm hia thithö.

⁶ Anyin adre me hwân walang ang he ka hudi nya, ke ame o thö ang ûen oge me he ka he but hnyin.

⁷ Oge hia but vâtâ vat ae so, oge hia but umo hna ûö logot, oge hia but kât hmâ bala labageju:

⁸ ke wale bi ang adre ip hobi könya koronainy hwakecin ae wisa, wale ame he ka ham könya hnyi bong eling Than ae wisa, at ame owisa: ke ca hake könya thibi, ke kodra hia thithö minya adre me senyin hnyi hna omanenâ e.

⁹ Hwege thö he ka ie o könya:

¹⁰ anyin a hia but Dema hna degeci nya, kʼ ame hnyokâ hmeledrany, ke ame he but Thesalonika ai; ke Kerese ame he but Galatia ai, kʼ ame he but Tito Dalamatia ai.

¹¹ Ke hake Luka thiju ang unyik. Hum Mareko thö, me tha he thö jem öbu könya: anyin ae ûnyi hnathu e könya hobi kâu huliwa.

¹² Ke haba Tukiko, me oge hia but kunâ e Efeso ai.

¹³ U ka he jem mʼ u hom minya thö anyik ûkhaû ae beû waleji oge me ip Troas, ûnyi Karepo, me ta je tusi minya, ke ca hnying bi je unen hnân sihnalimen hon.

¹⁴ E gan monu ame ânyâ könya Alesanedro, at ame leû fao kapa: kʼ ame he Than ka bi hwaban kâu e ûcû me anyin huliwa:

¹⁵ ō u eâu gan; anyin a e ame hwege ka tot, me ûcon hohmun hofuc.

¹⁶ Haba hnyi hnok hna ivinö a bân, me ba at ame bi hiök, kʼ ame digic nya tavat hia thithö: e na ca ip kodra hwaban.

¹⁷ Ke so bi ame tha tot mönya Than, me ham könya man; me me he ka ti manen dut gak hna khetâ hofuc, me me löng hia Aten ta je hnyei: ke iny möt bi ûnyi hnyi hnyimen liona.

¹⁸ Ke ame he Than ka omeli nya ûnyi hnyi ta je huliwa hia thithö ae kong, ke e ame he ka omeli nya ke ne o but ka hnyi dokhon dokhu ethö hnyi drany: e so adre me ogânâ e nyiele nyiele balua. Amen.

¹⁹ Anyik talofa kö Perisila me Akula, me lap anyi Onesiforo.

²⁰ A laba biju Erato hnyi Korinito; ke oge me hnö Trofimo e Mileto, ke a mok.

²¹ Hwege thö he ka o könya e me tiga ca o huna ae megic. Ame itolafa möu Eubulo, me Pudens, me Lino, me Kelaudia me je liamekeiny hia thithö.

²² E so e unyin hanom Than. E so e unyibun ibetengiö baû.