II. Timoteo 3 - Iaai Bible 1901 (New Caledonia)

¹ KE wâhmakhmetoâ ju ang, ka habe, ame he ka o ta je ûen ae kong hnyi je bong nyiele.

² Anyin ame he tavat ka hamödra hnyok kodra bi, me behnyekudra mone, me hobelöu, me bi gan, me fuc monu, me ca löng kamen me hinyen, me ca ole bi, me ca okabâ bi,

³ adre me ca betenge ge lahanödra, adre me höcö ûsoköu, tavat ûhaiö, me ca khanʼ ödra kât weny unyidra, me hwege hnyimakodra, me ca hnyok ûnyi ae so,

⁴ tavat ûalecuo, me huliwa wathethot, me bemusö, adre me weny ûnyi hnân osenyinâ, ke ca wedra bi ka Khong;

⁵ tavat a helâke me ûcû hwakecidra ka Khong, kʼ ödra ivinoâ bi maniny: ûsâkâûö u but me tavat a helâe.

⁶ Anyin a keihen tavat helâe, adre me dit ka hnyi ta je uma, me hom hwenbâ omomo ae monu me hmak ge hulo, adre lili ödra hnen ta je wedra bi ae ke bongon bi,

⁷ adre me labö ûne, ke ca khanʼ ödra bala bi wâ ûnykûme hnathu.

⁸ Ke helâ me Jane me Jamebere ödru me tot ûcû Mose, helâe minya tavat e adre me tot ûcon hnathu; tavat ae kong hnyekudra, kadre me ca hnathu ka hnyi labageju.

⁹ Ke so bi, adre me ca he ka vheno bala hwakecin e, anyin ame he ka manen dut hwakecidra ae monu ka tavat hia thithö, helâ me imaneniny hwakecidru könya.

¹⁰ Ke u je hia but hnu hoton hnok hna ûne, me hwakecik, me ûnykûmenök, me hnök hna labageju, me hokhnyok beû hmâ, me betenge, me hokhnyok,

¹¹ me hna seda, me ta je vec; ta je ûnyi ame o könya hnyi Anetioka me Ikonio, me Lusetara; me ta je vec adre oveci nya kâu: ke haba Than ame hûgûnö nya ûnyi hnyi ta je vec hia.

¹² Eke, ke adre me he ka oveci ödra hia tavat adre me weny he ka laba me hwakecin ae ûcû me Khong unyin Keriso Iesu.

¹³ Ke haba tavat adre me ânyâ hwakecin ae kong, me tavat iyawo, adre me he ka kong tot bala, adre me omonoâ, me adre me ka omonu ödra bi.

¹⁴ Ke u ma tethmâ ju hnyi ta je ûnyi adre hia but nö u kâu me hnâm hna hia but kap wia, anyin ae khanö u hnyat ödrin e nö u;

¹⁵ ke e khanö u ta je hna sihnalimen ae kap, kʼ u tiga mendreng, wale ae khana he ka ometö u ka hnyi möt a deny labageju ka Keriso Iesu.

¹⁶ Haba ta je hna sihnalimen hia ûnyi ge hanon Khong, rae ûcû minya hnân he ka ûne, me hnân owisa, me hnân nâ, me hnân sihwege hnyi hwakecin ae wisa:

¹⁷ me me bekhöt ut soiny aten Khong, wale at adre hia but penapena hobi kâu ta je huliwa hia thithö ae so.