II. Timoteo 2 - Iaai Bible 1901 (New Caledonia)

¹ ANYIN a wale, nokuk lö, hwege thö hnyi ibetengiö baû a e unyin Keriso Iesu.

² Ke haba ta je ûnyi u je hia but löng ûnyi gak unyin tavat ohnatho ae se hia, ham but ka tavat ae hnathu, ae khanʼ ödra he ka ûne ka keihen minya.

³ Munyi hokhnyokâ ju vec mönya, helâ me at vat ae so anyin Keriso Iesu.

⁴ E ba at vat ame bi ovheliny ge ta je ûnyi anyin möt eang; me me he ka osenyinâ e waleji at ame ûca me hnân at vat.

⁵ Ke a ne ke at ame bi bi ton hnyi ta je mat, adre me ca obicâ e, e ka ca mat hoton hnanyibu.

⁶ Haba at ame belok me hamen he ka bân ka hom je wan.

⁷ Ûnykûme ju hnok hna ha; anyin ame he Than ka ham köu wâ ûnykûme ta je ûnyi hia.

⁸ Ûnykûmi Iesu Keriso, ûnyi hnyi mâtrâni Davita, a omelö ûnyi hnyi hna mok, hoton anyik ûthumetu ae so:

⁹ can e oge me hom vec ke ne o but adre me cö nya, helâ me at ae kong; ke adre ca ca bi hofuc hwan Khong.

¹⁰ Anyin a wale, inya oge me hokhnyokâ ta je ûnyi hia hobi kâu tavat adre ûca, me me hu minya thö kodra möt a e unyin Keriso Iesu, tha e me hmanenang ame ca ba balua.

¹¹ Walang uthofuc ae hnathu, ka habe, Öta ka tha mok më, ate me he ka tha möt minya më:

¹² ke ate ne hok hnyok, me ate me he ka tha than më: ke ate ne ivinoâ, me e ame he bi ka ivinʼ öta:

¹³ ke ate ne ca hnathu, me hnathu bala bi e; anyin e ca khana he ka hamen ivinoâ e bi.

¹⁴ Oûnykûmi ödra ju ge ta je ûnyi eang, me hûna kodra hnyi hnyimakan Than he ka ca ivinoâ ge ta je hofuc, ae ba troban, ke hnân omonoâ tavat adre me löng.

¹⁵ Hwege thö, me u me ka omanenö u bi a gʼ ame kap soi u Khong, mʼ u at huliwa ae ba hnân ohmehma, at ame huliwa wia hofuc ae hnathu.

¹⁶ Ke ûsâkâûö u but me ta je hofuc ae monu me ca ûnyi hnathu: anyin adre me he ka bi hanen gânâ hwakecin ae ûcû me Khong,

¹⁷ ke ame he hodra hofuc ka han helâ me anyû: e unyidrin Humenaio me Fileto;

¹⁸ tavat ödrin e he monu ûhedra hnyi hnathu, haingödrin, ka habe, a um dö möt hmetu, mʼ ödrin e hagutâ degecâ labageju anyin keihen.

¹⁹ Ke ame tethmâ taben ae hwege anyin Khong, ae hu hna ohmâ haten eang, ka habe, A wâhmakhmetoâ but Than ta je aten: ke, Hamödra hia adre me hawâ ien Than he ka ûsâkâûö me hwakecin ae kong.

²⁰ Ca je gol me sileva thibi eiö hnyin uma ae gan, ke je kaia uto minya me je kaia kânâ; haba keihen me hnân haisoâ, ke haba keihen me hnân haikongoâ.

²¹ Anyin a wale, a ne ke at ame ka ânyâwia e bi ûnyi hnyi ta je ûnji eang, me e ame he ka kaia hnân haisoâ adre okabâ, me ûcû he ka huliwan hnen at ae tren uma, me hna penapena ka hnyi ta je huliwa ae so.

²² Kec dö ge ta je weny wahidröu, ke hnu hoton hwakecin ae wisa, me labageju, me ibetengiö, me ûsoköu, tha e mʼ ödra hia adre me hawâ ien Than, ûnyi hnyi hnyok ae kalaöt.

²³ Ke hota ju ta je ivinö ae monu me ca metâ, anyin ae khanʼ öbun a wale at ame okûâ iwatretra.

²⁴ Ke ca ûcû bi athnyabainy Than he ka iwatretra, ke so e menyik hwakecin ka tavat hia thithö, me at ae khana ûne, me hokhnyok,

²⁵ me nâ menyikâ ta je iwahnaihmiony; ame ne he Khong ka ham kodra ietra he ka wâhmakhmetoâ hnathu,

²⁶ mʼ adre me he ka möt ûnyi hnyi hnewe anyin diabolo, me omelö ge at huliwa ka Than ka hnyi weny Khong.