II. Samuela 8 - Iaai Bible 1901 (New Caledonia)

¹ KE hwaban e Davita ame kot at Filisiti me hom ûhnyûkongu ödra: ke Davita ame hûgûnâ Metheg-ama ûnyi hnyi hnyamen at Filisiti.

² Ke e ame kot at Moaba, me tuluti ödra ge tulut tö, me omokuli ödra eû hnyi kânâ; ke e ame tuluto lo li gaö he ka hlingʼ ödrin, ke khaca gaö ae bekhot he ka omelö. Me ame hwân tavat Moaba he ka bi lakei Davita, kʼ ödrin e hom je bwihlany.

³ Ke Davita ame kot minya Hadadeza, nöku Rehoba, than Zoba, wale me me he ka hûgûnâ hmetu iny hnyei hnyi Wagewe.

⁴ Ke Davita ame hûgûnâ gan khaca thauzan ke seven haded tavat tabö hors, ke twente thauzan tavat he hon kânâ: ke Davita ame sö can je hors hanen je kariota hia, kʼ ame ip biju keihen hobi kâu je kariota a khaca haded.

⁵ Ke ame o thö at Suria ûheny Damaseko he ka hom hadruo Hadadeza, than Zoba, me Davita ame kot twente tu thauzan at Suria.

⁶ Ke haba Davita ame otilâ je lap tue hnyi Suria hnyi Damaseko: ke ame bi lakei Davita but at Suria, me adre me hom je bwihlany. Ke Iehova ame ham dökhu kö Davita hnyi je hnyei e ame he ka hnyin hia.

⁷ Ke Davita ame hûgûnâ je bec gol ûnyi ge lathnyabai Hadadeza, me hom Jerusalema ai.

⁸ Ke Davita a than ame hûgûnâ bras ae ti gan hmâ ûnyi hnyi taun Beta me Berothai a li taun anyi Hadadeza.

⁹ Ke a long ut Toi than Hamath a Davita ame kot utbavat hia anyi Hadadeza,

¹⁰ me haba Toi ame kunö Jorama a nokon kö Davita than, he ka iouny mē, me ha hnahicâ e, anyin a e ame hia but vat me Hadadeza, me kot e: anyin a li iwahnaihmiony jia Toi me Hadadeza. Ke e hu eû hnyi hnyamen je kaia sileva, me je kaia gol, me je kaia bras:

¹¹ Ke Davita than ame okabâ je ûnyi eling minya kö Iehova, tha e me je sileva me gol wale e ame okabâ ûnyi hnyi je hnyei hia e ame hom ûhnyûkongo;

¹² ûnyi Suria, me Moaba, me laku Amona, me at Filisiti, me Amaleka, me ûnyi hnyi hna hûgûnâ ga Hadadeza nöku Rehoba, thaniny Zoba.

¹³ Ke ame lung iö Davita hnyi ûen e ame hmetu ûheny hnyi hna kot at Suria hnyi Hnyigöulen bucen Salt, wale eitin thauzan tavat.

¹⁴ Ke e ame otilâ je lap tue hnyi Edoma; hnyi Edoma hia e ame otilâ je lap tue, ke ame bi lathnyabai Davita but at Edoma hia. Ke Iehova ame ham dökhu kö Davita hnyi hnen hna he ka hnyin hia.

¹⁵ Ke Davita ame muso Isaraela hia; ke Davita ame ûhnö me ânyâ wisa ka lakeiny hia.

¹⁶ Ke Joab nöku Zeruia ame bi taben anyin je utbavat; ke haba Jehosofata nöku Ahiluda at ame oûnykûmeâ:

¹⁷ ke Zadoka nöku Ahituba, me Ahimelek nöku Abiathara, li at bihut; ke Seraia at sihnalimen;

¹⁸ ke Benaia nöku Jehoiada ban ka at Kerethi me Pelethi; ke je laku Davita tavat musi.