II. Samuela 6 - Iaai Bible 1901 (New Caledonia)

¹ KE Davita ame ûkhacaköuâ hmetu tavat adre ûca ge at Isaraela, ödrin thote thauzan.

² Ke Davita ame tot me tha he me tavat hia unyin, ûheny Baala Juda, he ka hom ûheny e tang tangen Khong, adre hwenyi Ien, a iö Iehova tuhan sabaoth, at ame laba hon li kerubi.

³ Ke ödrin e ip tang tangen Khong hon kât ae teb unyi, me hom e unyi hnyi uma umö Abinadab, wale hnyi dok ae hut: ke haba Uza me Ahio li laku Abinadab, ödru me alen kat ae teb ûnyi.

⁴ Ke ödrin e hom e ûnyi hnyi uma umö Abinadab, a e hnyi dok ae hut, tha e me tang tangen Khong: ke Ahio ame he hnyi hnyimakan tang.

⁵ Ke haba Davita me lap Isaraela hia, adre me khumöngö hnyi hnyimakö Iehova ta je ûnyi khumöng kop, me je kitara, me nabeli, me bwinybet, me pate, me simebalo.

⁶ Ke adre me o ka hnyi hna huje hwit anyi Nakan, me haba Uza ame inâ benyin ka hnyi tang tangen Khong, me kât e; anyin ame haû li bolok.

⁷ Me ame ubâhlâ hmonyin anyi Iehova kö Uza; me Khong ame kot e eling can anyin monu; me e ame mokcu eling hnyi tang tangen Khong.

⁸ Ke hmak bi Davita can ame utut Iehova kö Uza: ke e ame hwenyi ien dok eling me Farez-uza, ke ne o but hnyi bong ang.

⁹ Ke Davita ame outö Iehova hnyi bong eling, me e ame ha, ka habe, Ame ka kâmâu ka o könya tang tangö Iehova?

¹⁰ Ke höcö Davita he ka hom bi kâu tang tangö Iehova ka hnyi taun anyi Davita; me haba Davita ame saûâ ka hnyi uma umö Obed-edoma at Gatha.

¹¹ Me ame mokut tang tangö Iehova eiö hnyin uma umö Obed-edoma at Gatha hnyi kun ta tehi: me Khong ame ohnahici Obed-edoma me anyin lap hia.

¹² Ke adre me thumetu Davita than, ka habe, Iehova ame hia but ohnahicâ lap anyi Obed-edoma me ta je ûnyi hia can tang tangen Khong. Me haba Davita ame he me hom senyinâ tang tangen Khong, ûheny hnyi uma umö Obed-edoma, ka hnyi taun anyi Davita.

¹³ Ke ame he hnyat vadren tang tangö Iehova, ke ödrin e he siks ta hna okca, me e ame hudo ke bolok me ke meno ae pipikhenya.

¹⁴ Ke Davita ame biâ hwege hnyi hnyimakö Iehova; ke Davita ame weikâ iefoda lino.

¹⁵ Ke l haba Davita me lap hia anyû Isaraela, adre me hom tang tangö Iehova me hongot me tûö trutru.

¹⁶ Ke hnyi ûen ame didro tang tangö Iehova ka hnyi taun anyi Davita, haba Mikala nöku Saulo ame bwele hnyi mamalama me ō Davita than ame gâ me bibiâ hnyi hnyimakö Iehova; me e ame hûkötiâ e hnyi hnyekon.

¹⁷ Ke ödrin e odilâ tang tangö Iehova, me ip e hnyi hnen hnyi wanben uma mano wale ame otilâ Davita hobi kâu: ke Davita amo hudo je hudiny leû me je hudiny ole hnyi hnyimakö Iehova.

¹⁸ Ke a hia but Davita hudo je hudiny leû me je hudiny ole me e ame ha hnahicâ tavat hnyi iö Iehova tuhan sabaoth.

¹⁹ Ke e ame khenâ oûco ka i tavat hia, wale ka ûseiny Isaraela hia, obaga me omomo minya, ûsa khaca ong areto, me khaca uthmeno, me khaca u wan vine ae meleca. Me ame vese thö tavat hia ka hnyi je hnyabadrin.

²⁰ Ke Davita ame hmetu he ka ha hnahicâ anyin bi lap. Ke ame didrut Mikala nöku Saulo he ka ûkhanö me Davita, me ha, ka habe, E ti hmanenang eja than Isaraela, at ame bi wânen lathnyaba a je hlu hluiny lathnyabaem, helâ me at ae hop ame bi wânen!

²¹ Ke haingö Davita kö Mikala, ka habe, Wale hnyi hnyimakö Iehova at ame ûco nya hon kâmâm me anyin lap hia, he ka otilö nya hnân taben tavat anyi Iehova, a Isaraela: wale me inye he ka khumöng dö hnyi hnyimakö Iehova.

²² Ke oge me he ka ikiki tot hon e, ke hamök he ka he hnyikânâi hnyi hnyimakök bi: ke ame he ka oganö nya lathnyaba omomo wale u me ha eja.

²³ Ke ba nöku Mikala nöku Saulo ke ne o but bong e ame mokcu hnyin.