II. Samuela 4 - Iaai Bible 1901 (New Caledonia)

¹ KE a long ut nöku Saulo a ga mokcu Abinera hnyi Heberona, me ame sēnyin li hnyamen, kʼ ame hmak hnyekon at Isaraela hia.

² Ke e bi unyin nöku Saulo li at a li taben deo vat: Baana ien ke at, ke Rekaba ien ke at, a li laku Rimona, at Berotha, hanen lakon Beniamina: (anyin adre tha öû Berotha me Beniamina:

³ kʼ ame kec Gitaim ai at Berotha, kʼ ödrin e laba atkanyua eling ke ne o but hnyi bong ang.)

⁴ Ke e hu ke nöku Jonathana nöku Saulo ae mat li can. Ke thabûng hunainy wale hnyi ûen ame o ûthumetu ka haiö Saulo me Jonathana ûnyi Jezerela, ka ame hijen e hnen momo ame tuö me kec ut: ke momo ame tiga kec logot, me e ame ta me omadrâ e. Haba ien bi, me Mefiboseth.

⁵ Me ame he li laku Rimona at Berotha, jia Rekaba me Baana, me o helâ me jebigö ka hnyi uma umo Ise-boseth, hnyi ûen e ame menâ hnyi jebigö.

⁶ Ke ödru me o hnyi wanben uma helâ ke ödru me he ka hok hwit; ke ödru me dâ e hnyi hnyekon: ke Rekaba me Baana a liamekeiny mē ödru me kec.

⁷ Ke ödru me o ka hnyi uma, me e ame mokut hon hna mokut hnyi hnyeuleny, me ödru me kot e, me hlingâ, me subâ but ban, me hom ban, me vheno lit hnyi gethen hnyi dok ae tha hon.

⁸ Ke ödru me hom bö Ise-boseth kö Davita hnyi Heberona, me ha ka than, ka habe, Wâ bi, bö Ise-boseth nöku Saulo iwahnaihmiony möu, wale at ame elâm ânyâm möt; ke a hia but Iehova bi hwaban kö Saulo me je mâtrâniny hobi kâu than a tuhok hnyi bong ang.

⁹ Ke haba Davita ame thu kö Rekaba me Baana a liamekeiny mē a li laku Rimona at Berotha, me ha ködru, ka habe, Kia inya Iehova, at ame omelö hanuk ûnyi hnyi ta je kong hia,

¹⁰ hnyi ûen a thumetu nya ke at, ka habe, Wâ bi, a mokcu Saulo, ke ame ûnykûme wale ûthumetu ae so könya, me oge me kât e, me hlingâ e hnyi Zikelag, wale hwaban oge me bi hwaban anyin ûthumetu.

¹¹ Ke hawa ge ûganiny hwaban, e ka he tavat ae monu ka hlingâ at ae wisa hnyi umen bi uma me hon anyin hna mokut, hawa, oge me ca he ka elâm dren ûnyi hnyi hnyamöbu, me ohiʼ öbu eang hmeledrany?

¹² Ke haba Davita ame kunâ anyin je hidröu, me ödrin e hlingʼ ödru, me subâ but li hnyamödru me li cadru, me uhni ödru hon an hnyi Heberona.; Ke adre me hom bö Ise-boseth, me konâm e hnyi hu Abinera hnyi Heberona.