II. Samuela 3 - Iaai Bible 1901 (New Caledonia)

¹ KE ame vat beû hmâ, lap anyi Saulo me lap anyi Davita: ke Davita ame hwege tot, ke ame ngâ tot lap anyi Saulo.

² Ke Davita ame hnokoâ lakon obaga hnyi Heberona: Aminona nokon a bâu, nöku Ahinoam momo Jezerela;

³ ke Kile-aba ûtangköu mē, nöku Abigaila, safaci Nabala, at Karemela; ke Abasoloma a kuniny, nöku Maaka, momo nöku Talemai than Gesuri;

⁴ ke Adonia vakiny, nöku Hagitha; ke Sefatia a thabûnginy, nöku Abitala;

⁵ ke Itherama a siksiny, nöku Egela öiö Davita. Adre hnöku ödrin ga Davita hyni Heberona.

⁶ Ke hnyi ûen ae tiga hu vat ge lap anyi Saulo me lap anyi Davita, me haba Abinera ame sihwegiâ e bi singiny lap anyi Saulo.

⁷ Ke e hu ke momo anyi Saulo, adre hwenyi ien me Rizepa, nöku Aia: ke Ise-boseth ame ha kö Abinera, ka habe, Ieû gam u je hom momo anyi cica?

⁸ Me Abinera ame ti hmonyin can hofuc ho Ise-boseth, me ha, ka habe, Hawa, iny ban kuli anyi Juda? Haba hnyi ûen ang oge me omanenâ ibetengiö ka lap anyi Saulo a kâmâm, me je liamekeiny mē, me je lahanen, me ca hnö u ka hnyi hnyamö Davita, ke so bi u je he hnyi bong ang ka haikongu nya me momo ang?

⁹ Hamen Khong he ka ânyâ helâe kö Abinera, me bi hanen minya, oge ne ca he bi nya ka ânyâ kö Davita helâ me Iehova ame khemanyin kâu;

¹⁰ he ka wia dökhu ûnyi hnyi lap anyi Saulo, me otilâ theron anyi Davita hon Isaraela me hon Juda, hwân hnyi Dana ke ne o but hnyi Bere-seba.

¹¹ Me e ca khana he ka thu kö Abinera ke hofuc a khaca, anyin a e ame outen.

¹² Haba Abinera ame kunâ je ûthumetu kö Davita, a ka ûnyi gan bi, ka habe, I ia hnyei? haingen minya, ka habe, U me he ka ânyâ ûhihinyköu mönya, me wâ bi, ame he hnyamok ka tha e möu ke ka wia köu Isaraela hia thithö.

¹³ Me haingen, ka habe, E so, me oge me he ka ûhihinyköu möu: ke so bi khaca thibi ûnyi; oge me wek gam, ka habe, a u me ca he ka wâ hnyimakök u ka ca hum Mikala nöku Saulo jem, u ka he jem, ka iouny mönya.

¹⁴ Ke Davita ame kunâ je metâ i kö Ise-boseth, nöku Saulo, he ka ha, ka habe, Ham dö könya öiök, jia Mikala, waleji oge me bi sâniny ge je unen unyin ai Filisiti a wan haded.

¹⁵ Me haba Ise-boseth ame kunâ je uthumetu he ka hom e anyin âiân baga jia Paletiela nöku Laisi.

¹⁶ Ke ame tha he baga me âiân, kʼ ame tenge hoton, ke ne o but hnyi Bahurim. Me wale Abinera ame ha ka baga, ka habe, Hmetuhmetu ju: me e ame he hmetu.

¹⁷ Ke haba Abinera ame ûhnenamö me wahingatiny Isaraela, me ha, ka habe, Haba ehac öbun e elöm Davita me me tuböbun:

¹⁸ awe, ânyâ thö walang ang: anyin a Iehova ame hia but ha ga Davita, ki habe, Oge me he ka omelö lakeik a at Isaraela ûnyi hnyi hnyamen at Filisiti, me ûnyi hnyi hnyamen je iwahnaihmiony mö-îrin ge hnyamö Davita athnyabaik.

¹⁹ Ke Abinera ame fuc minya hnyi hnyikonyen at Beniamina: ke ame he minya Abinera ka fuc hnyi hnyikönyö Davita hnyi Heberona ge ta je ûnyi hia ae so kö Isaraela, me lap hia anyi Beniamina.

²⁰ Me Abinera ame o kö Davita hnyi Heberona, ke tha e me tavat a twente. Ke Davita ame ânyâ bijeû hobi kö Abinera me anyin bunyen.

²¹ Ke Abinera ame ha kö Davita, ka habe, Oge me he ka tot me he, me ûkhacaköuâ ka than a tuhok Isaraela hia, mʼ ödrin e ûhihinyköu möu, me u me musi ködrin hia hoton wem. Me Davita ame kunö Abinera; me e ame he hnyi hnahic.

²² Ke wâ bi ame o but lakei Davita me Joab ûheny hnyi hna hnu vat, me oâ je ûnyi adre sö ae gan: ke hiö Abinera unyi Davita hnyi Heberona; anyin a hia but kunâ e, kʼ ame he but hnyi hnahic.

²³ Ke hnyi ûen ame o but Joab me utbavat hia unyin, adre me ha kö Joab, ka habe, A mwi ang Abinera nöku Neri, a he ka wâ than, ke e a hia but kunâ e, me a be but hnyi hnahic.

²⁴ Haba Joab ame o ka than, me ha, ka habe, Ieû ang u je inyâ wâ bi a o köu Abinera; anyin a ieû u je kunâ e, ke a he but eja?

²⁵ E khanö u Abinera nöku Neri a ga o he ka iyawö n, me wâhmakhmeto hnâm hna didrut me didrö, me he ka wâhmakhmeto ta je ûnyi u me ânyâ.

²⁶ Ke ame didrut Joab ûheny unyi Davita, me e ame kunâ je ûthumetu hotu Abinera, ke ödrin e ohmeto e ûnyi hnyi an Sira: ke ca khanö Davita bi.

²⁷ Ke ame hia hmetu Abinera Heberona ai, me haba Joab ame tha saû but mē hnyi homagöule he ka ûhnenamö duöng, me ame dâ e eling hnyi hnyekon, me ame mokcu, can drö Asael liamekeiny mē.

²⁸ Ke hwaban e Davita ame long me ha, ka habe, Iny gufa me dökhuk dökhu hnyi hnyimakö Jehova nyiele balua ge dra drö Abinera nöku Neri:

²⁹ e so e he ka takoû bö Joab me lap hia anyin kamen; ke ame ca he ka hia ûnyi hnyi lap anyi Joab at ame hingölö, me lepera, me at ame ci, me at ame ta ge hele vat, me at ae ba jeû.

³⁰ Ke Joab me Abisai liamekeiny mē ödru me hlingö Abinera, can e ame hlingö Asael liamekeiny mödru hnyi Gibeona hnyi vat.

³¹ Ke haba Davita ame ha kö Joab, me tavat hia unyin ka habe, Kia but anyibun je ûkhaû, me weikâ ec mano ae gan nân, me tengiö Abinera. Ke haba Davita a than ame he hoton taben komok.

³² Ke adre me konim Abinera hnyi Heberona: ke ame tenge goranyai than hnyi hu Abinera; kʼ ame tenge tavat hia.

³³ Ke than ame tengiö Abinera, me ha, ka habe, Hawa, e ûcû Abinera he ka mokcu helâ me imekiny at ae monu?

³⁴ Adre ca ca li hnyamâm, me inâ li cam hnyi wen a fao: Helâ me at ame ta hnyi hnyimakan tavat ae kong, me u je ta helâe. Kʼ ame tenge hmetu bi tavat hia gan.

³⁵ Ke ame o but tavat biâ ka kunö Davita ka han falawa e me tiga lany; ke Davita ame khemanyin, me ha, ka habe, Hamen Khong he ka ânyâ helâe könya me bi hanen minya, oge ne kâlâ falawa, ame ne ke jeû bi, e ka tiga ca dit bi seûnö.

³⁶ Ke haba tavat hia adre me wâhmakhmeto e, ke so hwakecin kodra bi: ke haba khaca, ame senyin bi tavat ge ta je ûnyi hia a ânyâ than.

³⁷ Me ame wâhmakhmetoâ hnen tavat hia me at Isaraela hia hnyi bong eling a ca ûnyi ge than he ka hlingö Abinera nöku Neri.

³⁸ Ke haingen than ka lakeiny, ka habe, Hawa, e ca khanʼ öbun a ga ta but ke taben me at ae gan hnyi bong ang hnyi Isaraela?

³⁹ Ke iny sēnyin dut hnyi bong ang, eja ke ne adre me hia but hû nya hnân than; ke ti hmak könya li at ang a li laku Zeriua: e so Iehova ame he ka bi hwaban ka at a ânyâ hwakecin ae kong hoton anyin bi monu.