II. Samuela 24 - Iaai Bible 1901 (New Caledonia)

¹ KE ame ubâhlâ hmetu thö hmonyin anyi Iehova kö Isaraela, ke e ame kunö Davita ködrin he ka ha, ka habe, He thö ka aû at Isaraela me Juda.

² Ke haba than ame ha kö Joab taben utbavat wale unyin, ka habe, He thö walang ka vheno hnyi wanben je tribu Isaraela hia, hwân hnyi Dana ke ne o but Bere-seba, me öbun e he ka aû tavat, me me khanö nya thö ûseiny tavat.

³ Haba Joab ame ha ka than, ka habe, E na he ju Iehova Khongom ka bi hanen ka tavat, ame ne ve ûseidrin, he ka osehia ge haded, me me wâ li emakan than a tuhok: anyin a ieû ame weny ûnyi eling than a tuhok?

⁴ Ke so bi e hwege hofuc hwan than hu Joab, me je taben vat. Ke Joab me je taben vat ödrin e didrut ge than, he ka aû tavat a at Isaraela.

⁵ Ke ödrin e he hanyâûâ Joridano me hunuma hnyi Aroera, hnyi ke keihen metân taun hnyi wanben hnyigöulen bucen e Gada, me cicö Jazera;

⁶ ke ödrin e o but hnyi Gileada, me hnyei Tati-hodesi; ke ödrin e o hnyi Dana-jaan, me wadrâ Zidona,

⁷ me o but hnyi hnabâ hnyi Turo, me je taun hia anyin at Hivi me Kanana: ke ödrin e umo hnyi ke keihen Juda hnyi hwaiöu, hnyi Bere-seba.

⁸ Ke ödrin e hia but vheno hnyei hia, me ödrin e o hnyi Jerusalema obiny je tehi a naininy me twente je bong.

⁹ Ke haba Joab ame ham ka than ûseiny hna aû tavat: ke e hu hnyi Isaraela eit haded thauzan tavat hwege, tavat hok hele vat; ke faiv haded thauzan at Juda.

¹⁰ Me haba hnyeku Davita ame dâ e hwaban hnen hna aû tavat. Me haingö Davita kö Jehova, ka habe, Oge hia but ûnyâ monu ae gan hnyi ûnyi oge me ânyâ: ke walang ang, Than lö, oge me khöû köu he ka hna but hulö anyin athnyabaem; anyin oge me ânyâ monu.

¹¹ Ke a hmak dö Davita hnyi hnyomakatu, me ame o but hofuc ho Jehova kö Gada perofeta, at wâ unyi Davita, ka habe,

¹² He thö ka fuc kö Davita, ka habe, Walang hofuc ho Iehova, ka habe, Inya oge me ip köu kun ta ûnyi; ûca thö khaca mʼ inye he ka ânyâ köu.

¹³ Ke ame o but Gada kö Davita, me thumeto e, me ha kâu, ka habe, Hawa, ame he ka o köu hmiâ hnyi em hnyei ke ne o but seven je huna? ke hawa, u je bekec ge je iwahnaihmiony möu adre me hnu u ke ne o but kun ta tehi? ke hawa, adre me ne kunâ mok ae cap hnyi em hnyei ke ne o but kun ta bong? awe wâhmakhmeto thö hofuc oge me he ka ha hmeto ka at a kunö nya.

¹⁴ Haba Davita ame ha kö Gada, ka habe, E gan hma hlohlo gak: e so ate me ta walang ang ka hnyi hnyamö Iehova; anyin ae gan hmâ anyin ta je ibetengiö: ke ca he bi nya ka ta ka hnyi hnyamen at.

¹⁵ Me Iehova ame kunâ mok ae cap ka at Isaraela hwân hnyi hnyomakatu ke ne o but hnyi ûen adre me thu: me ame mokcu sevente thauzan tavat hwân hnyi Dana ke ne o but Bere-seba.

¹⁶ Ke hnyi ûen ame he angela ka lau hnyamen hon Jerusalema he ka okongoâ, me haba Jehova ame ietra kong eling, me ba ka angela at ame ohia tavat, ka habe, Soju; kât ju hnyamâm. Ke ame tot angela anyi Iehova hnyi hna huje hwit anyi Aruna at Jebusi.

¹⁷ Me Davita ame wâ angela at ame kot tavat, me e ame ha kö Jehova, ka habe, Me wâ ju, e kong hwakecik, ke oge me hia but ânyâ hwali: ke ieû a ânyâ je mamoe ang? ö u hai hnyamâm könya ke ûcon lap anyi cica.

¹⁸ Ke ame o but Gada kö Davita hnyi bong eling, me ha kâu, ka habe, Ölö thö, me otilâ taben hut kö Iehova hnyi hna huje hwit anyi Aruna at Jebusi.

¹⁹ Haba Davita ame ölö hoton hofuc ho Gada, helâ me hna hûna hnö Iehova.

²⁰ Ke Aruna ame bwele me wâ than me lathnyabainy ödrin e he kâu: ke Aruna ame didrut me nom hnyikânâi ka than.

²¹ Ke Aruna ame ha, ka habe, Ieû can a o thö than eang unyik? Haingö Davita, ka habe, He ka ûco möu hna huje hwit, me hnân otilâ taben hut kö Jehova, me me hia ju mok cap unyin tavat.

²² Ke Aruna ame ha kö Davita, ka habe, E so than tuhok ame hom me hudo ûnyi ae so kâu: wâ bi je bolok hnân hudiny leû, me je ûnyi hnân huje hwit me omjehen je bolok me hlogon:

²³ haba ta je ûnyi hia eling, than lö, a ham Aruna ka than. Ke haingö Aruna ka than, ka habe, E so ame he Iehova a Khongom ka kop u.

²⁴ Ke haingen than kö Aruna, ka habe, ohe; ke so bi oge me he ka ûco möu ge hwaban: ke haba khaca oge me ca he ka hudo kö Iehova Khonguk je hudiny leû ame o gufa but könya. Me Davita ame ûco hna huje hwit me je bolok hwaban je sekel sileva a fifte.

²⁵ Ke haba Davita ame otilâ taben bi hut kö Iehova eling, me hudo je hudiny leû, me je hudiny ole. Ke Iehova ame kap je hna khöû hobi kâu hnyei, me ame hia ju mok ae cap unyin at Isaraela.