II. Samuela 21 - Iaai Bible 1901 (New Caledonia)

¹ KE e hu hmiâ hnyi ûö Davita a kun hunainy, ke huna me ke huna; ke Davita ame elâm hnyimakö Iehova. Ke Iehova ame thu, ka habe, Ga Saulo me anyin lap ame hingâlâ dra, anyin a e ame hlingâ at Gibeona.

² Haba than ame hawâ at Gibeona me ha ködrin, (ke ca hanen lakon Isaraela at Gibeona, ke hanen je kolon at Amora; ke a hia but lakon Isaraela khemanyin ködrin: ke Saulo ame elâm he ka kuc ödrin can weny ae gan hmâ ka lakon Isaraela me Juda:)

³ ke Davita ame ha ka at Gibeona, ka habe, Ieû oge me he ka ânyâ hobi köbun? ke oge me he ka bi hwaban ge ieû, me öbun e he ka hahnahicâ jekhoû Iehova?

⁴ Ke haba at Gibeona ödrin e thu, ka habe, E ca wehmun sileva me gol ûnyi ga Saulo ame ne anyin lap; ke ca hanymöhmun he ka hlingâ ke at hnyi Isaraela. Ke haingen, ka habe, Oge me he ka ânyâ hobi köbun ûnyi öbun e he ka ha.

⁵ Me ödrin e thu ka than, ka habe, Haba at a ohiʼ ohmun, me heleû deny gahmum, me me ohiʼ ohmun, mʼ ohmun e ca laba hnyi hnyei hia iny at Isaraela,

⁶ ame he ka ham kohmun seven lakon obaga me ohmun e he ka uhni ödrin hobi kö Iehova hnyi Gibea i Saulo, wale hnö Iehova hna ûca. Ke haingen than, ka habe, Oge me he ka ham ödrin.

⁷ Ke than ame omeli Mefiboseth, nöku Jonathana nöku Saulo, can hna khemanyin anyi Iehova a wanbödru, wale wanbö Davita me Jonathana nöku Saulo.

⁸ Ke haba than ame hom li baga laku Rizepa momo nöku Aia, wale e ame hnokoâ ga Saulo, jia Aremoni me Mefiboseth; me ta baga a thabûng laku Mikala momo nöku Saulo, wale e ame hnokoâ ga Aderiela nöku Bazilai at Mehola:

⁹ ke e ame ham ödrin ka hnyi hnyamen at Gibeona, ke ödrin e uhni ödrin hnyi bucen hnyi hnyimakö Iehova, ke ödrin a tha ta hia but a ödrin seven ke adre hlingʼ ödrin hnyi ûen ibi hwân menu, hnyi hna hwân dö meno bali.

¹⁰ Ke Rizepa momo nöku Aia ame hom mano ae gan nân me ulolo hobi kâu bi hon kic, hwân hnyi hnyimakan menu ke ne o but ame ta we hudrin ûnyi hnyi drany; ke e ame ca hna je meno ame gâ ethö he ka laba hudrin hnyi lany, me je menoiny hnyot hnyi lit.

¹¹ Ke adre me thumetu Davita wale ge hna ânyâ hnö Rizepa momo nöku Aia, wale momo anyi Saulo.

¹² Ke habe Davita ame he me hom je jeiö Saulo me je jeiö Jonathana a nokon unyin at Jabesi-gileada, tavat adre venâu e ûnyi hnyi gethen hnyi Bethe-san, wale hnen at Filisiti hna uhno hnyin, hnyi ûen at Filisiti ödrin e hlingö Saulo hnyi Gibeboa:

¹³ ke e ame hom ûheny e je jeiö Saulo me je jeiö Jonathana a nokon; ke ödrin e ûkhöûnâ je jeiödrin adre uhno.

¹⁴ Ke ödrin e konâm je jeiö Saulo me Jonathana a nokon hnyi hnyei Beniamina hnyi Zela, hnyi hu Kiso a kamen: ke ödrin e ânyâ ta je ûnyi hia hnen than hna hûna. Ke hwaban e Khong ame long hodrin ge hnyei.

¹⁵ Ke haba at Filisiti ödrin e vat hmetu me Isaraela; ke Davita ame utut, tha e me lakeiny, me vat me at Filisiti: ke ame sēnyin Davita.

¹⁶ Ke haba Isebi-benobe, wale hanen lakon at ae beû, ke kun ta haded sekel bras ihmakiny dân ö, ke adre oweikâ e ge hele vat ae teb ûnyi, e ame ûnykûme he ka kuc Davita.

¹⁷ Ke haba Abisai nöku Zeruia ame hom hadruâ, me kot e, me hlingâ at Filisiti. Ke haba lakei Davita ödrin e khemanyin kâu, ka habe, U me ca he hmetu he ka tha he möhmun ka vat, wâ e nye omoko lamepainy Isaraela.

¹⁸ Ke hwaban e, e hu vat hmetu me at Filisiti hnyi Gob: ke haba Sibekai at Husa ame hlingö Saf, hanen lakon at ae beû.

¹⁹ Ke e hu vat hmetu me at Filisiti hnyi Gob; ke haba Eleanana nöku Jaare-oragim at Bethe-leema ame hlingâ liamekeiny me Goliatha at Gatha, ke haba taben anyin ö helâ me utöiny ûnyi hnân hwâwâ mano.

²⁰ Ke e hu vat hmetu hnyi Gatha, ke eling at ae beû hmâ, ke ûsa siks je banyen hnyi li hnyamen, me siks je bacan hnyi li can, wale twente foa ûseiny; ke ame hnokoâ minya e hnen at ae beû.

²¹ Ke e ka humbasö Isaraela, haba Jonathana nöku Simea a liamekeiny me Davita ame hlingâ e.

²² Wale hnyat a vak eling nokon at ae beû adre hnokoâ hnyi Gatha; ke ödrin e ta but ge hnyamö Davita me lakeiny.