II. Samuela 20 - Iaai Bible 1901 (New Caledonia)

¹ KE e hu eling ke at Belial, Seba ien, nöku Bikeri, at Beniamina: ke e ame tûâ trutru, me ha, ka habe, E ba ke keihöhmun unyi Davita, ka ba jekhöûhmun unyin laku Jese: vese but ka hnyi umöbun je uma mano, Isaraela lö.

² Me tavat Isaraela hia thithö, adre me vese but ga Davita, hotu Seba nöku Bikeri: ke so bi at Juda adre me kece ka tuhödrin, ûheny Joridano ke ne o but Jerusalema.

³ Ke Davita ame o but ka hnyi umen uma hnyi Jerusalema; haba than ame hom je momo a ten a anyin je momo, waleji e ame ip he ka tuö uma, me ip ödrin hnyi uma ceat, me haödrin, ke e ame ca dit ködrin. Ke adre ip ödrin ke ne o but hnyi bong Ödrin e mokcu hnyin ödrin e laba helâ me safac.

⁴ Haba than ame ha kö Amasa, ka habe, Ukhacaköuâ thö könya at Juda e tiga ca um dö je bong a kun, ke u me he minya ka hnyi hanen.

⁵ Me Amasa ame he he ka ûkhacaköuâ at Juda: ke e bec hnyi ûen adre thu.

⁶ Haba Davita ame ha kö Abisai, ka habe, Ame he walang ang Seba nöku Bikeri ka okongu otin hu Abasoloma: he thö ka hom lathnyabainy tuhâm, me hnu e, wâ e nye hu gan je taun adre bi haginy ge veto, me kec gatin.

⁷ Ke ame he hoton je atö Joab, me at Kerethi, me at Pelethi, me tavat hwege hia thithö: ke ödrin e didrut ûheny Jerusalema he ka hnu Seba nöku Bikeri.

⁸ Ke ödrin e o but hnyi veto ae gan hnyi Gibeona, me Amasa ame o he ka ûkhanö mödrin. Ke Joab ame weikâ ge ûkhaûen vat, wale e ame khavâ, ke hnyi hon e wen hnyekon me hele vat adre ohmâ ka hnyi li jevan hnyi tangen; ke e ame tiga he me ame kolu but hele vat.

⁹ Ke Joab ame ha kö Amasa, ka habe, U so bi, muma? Ke Joab ame kât wai Amasa ge hnyamen a meta he ka ûcimhnyimak mē.

¹⁰ Ke ame ca ûnykûme bi Amasa ge hele vat hnyi hnyamö Joab: ke e ame dâ hnyekon, me ame hingölö but tang tiny hnyikânâi, ke a ca kot e hmetu; ke e ame mokcu. Ke Joab me Abisai liamekeiny mē ödru me hnu Seba nöku Bikeri.

¹¹ Ke ame todrö unyin ke hidröu atö Joab, me ha, ka habe, Haba at a hiö Joab, me at ame hiö Davita, me hamen he ka he hotu Joab.

¹² Ke Amasa ame mokut hwihwiö hnyi dren eû hnyi wanben gethen. Ke a wâ but a gʼ ame todru tavat hia, me e ame hum Amasa ûnyi hnyi gethen ka hnyi hnyot, me tube ge ûkhaû, anyin e ame wâ a ga todru tavat Ödrin ka o me wâ e.

¹³ Ke a hia but hom e ûnyi hnyi gethen, me ame be hotu Joab tavat hia he ka hnu Seba nöku Bikeri.

¹⁴ Ke e ame vheno je tribu anyin at Isaraela hia ke ne o but Abela, me Bethe-maka, me at Beri hia: me ödrin e ûkhacaköu me hnyi he hoton.

¹⁵ Ke adre me o me thelöng e hnyi Abela hnyi Bethe-maka, ke ödrin e ûkhöûnâ göranyi kânâ cicö taun, ke ame tot ûnyi e cicö hak veto: ke haba tavat hia unyi Joab adre me kokot hna up hak, me me ta but.

¹⁶ Ke ame hongot ke momo ae metâ ûnyi hnyi taun, ka habe, Long ju, long ju; ö öbun me ha kö Joab, ka habe, Aiö u, mʼ inye he ka fuc köu.

¹⁷ Me e ame hakekeny kâu, me haingen momo ka habe, Joab u? Haingen, ka habe, E. Me e ame ha kâu, ka habe, Long ju hofuc hwan athnyabaem a momo. Haingen, ka habe, Oge me long.

¹⁸ Me haingen momo, ka habe, Adre me labö ha ehac, ka habe, Adre me he ka hnö wia hnyi Abela; me me bi obiny ju.

¹⁹ Inya hanen tavat adre behnahic me hnathu hnyi Isaraela: ke u je elâm he ka ohia taun a hinyen hnyi Isaraela: can ieû u me he ka utâ jekhoû Iehova?

²⁰ Ke Joab ame thu me ha, ka habe, Ohe, Ohe, oge me ca he ka utâ me ohia.

²¹ Ca bongon e: ke so bi haba ke at a aten hnyei ae hut hnyi Eferaima, Seba ien, nöku Bikeri, ame hai hnyamen ka than, Davita: mē hna but at e, me oge me he ka he but ûheny hnyi taun. Haba momo ame ha kö Joab, ka habe, Wâ bi, adre me he ka khûâ köu ban ûnyi hnyi hna up hak.

²² Me haba momo ae metâ ame he ka tavat hia. Me ödrin e subâ but bö Seba nöku Bikeri me khûâ kö Joab. Me e ame tuâ trutru me ödrin e vese thö ûnyi hnyi taun ka hnyi umödrin je uma mano. Ke haba Joab ame hmetu Jerusalema ai ka than.

²³ Ke haba Joab me e taben je utbavat hia anyin at Isaraela: ke Benaia nöku Jehoiada me ban ka at Kerethi, me Pelethi:

²⁴ ke Adorama at ame ö fat: ke Jehosafata nöku Ahiluda at ame oûnykûmeâ:

²⁵ ke Seva at ame sihnalimen: ke Zadoka me Abiathara li at bihut:

²⁶ ke Ira minya, at Jaira, at ame musi unyi Davita.