II. Samuela 19 - Iaai Bible 1901 (New Caledonia)

¹ KE adre me thumetu Joab, ka habe, Wâ bi, than ame tenge thungaû ga Abasoloma.

² Ke adre wia dökhu hnyi bong eling me me hnyamok ka tavat hia thithö: anyin a long ut tavat hnyi bong eling, ka habe, Than ame tengege nokon.

³ Ke ame he hnihnik tavat ka hnyi taun hnyi bong eling, helâ me tavat adre me he hnihnik me hmehma ödra ka kec ge vat.

⁴ Ke haba than ame tube hnyimakan, me than ame tenge hwege goranyai, me ha, ka habe, Ekölö ge nökuk Abasoloma, ekölö Abasoloma, nökuk, nokuk!

⁵ Ke ame o but Joab ka than ka hnyi uma, me ha, ka habe, U je ohmehma hnyi bong ang hnyimakan lakem, tavat adre me omeli u hnyi bong ang, me lakom je baga me hlu, me laâiâm, me ânyâm je momo;

⁶ wale hnyi hnâm hna betenge ge tavat adre me hûkötiö u, me hûkötiâ tavat adre me betenge gam. Anyin a u je hia but omanenâ hnyi bong ang ae ca ûnyi hnathu köu je tuhan me lathnyaba: anyin a oge me wâhmakhmetoâ hnyi bong ang a gʼ ame ne möt bi Abasoloma, ke ohmun mokcu hia thithö hnyi bong ang, ame he ka so hmonyin köu.

⁷ Ke walang ang, todrö, me didrut, me fuc so ka lakem: anyin oge khemanyin me haiö Iehova a u je ne ca didrut, ame he ka ba at unyâm, eâu hnyinghet: Ke ame he ka beönua köu monu eling hon ta je monu hia a o köu ehac kʼ u tiga thoth ke ne o but hnyi bong ang.

⁸ Me ame todrö than me laba hnyi homagöule. Ke ödrin e thumeto tavat; hia thithö, ka habe, Wâ bi, ame laba than hnyi homagöule: me ame he tavat hia ka than. Haba at Isaraela ödrin e ve kec ka hnyi umödrin je uma mano.

⁹ Ke ame labö iwatretra tavat hia thithö hnyi je tribu Isaraela, hia, ke haingödrio, ka habe, Than ame omeli ota ûnyi ge je iwahnaihmiony möta, ke e ame omeli ota ûnyi ge at Filisiti; ke walang e ame kec ge hnyei ca Abasoloma.

¹⁰ Ke a mokcu hnyi vat Abasoloma, at otin e hû. Ke ieû gabun öbun e laba hnyibû he ka ohmeto than?

¹¹ Haba Davita than ame ûkbûnöng kö Zadoka me Abiathara li at bihut, me haingen, ka habe, Fuc dʼ öbu ka wahingatiny Juda, me ha, ka habe, Ieû gabun a öbun e bec he ka ohmeto than ka hnyi umen uma? ke a o but hofuc hwan at Isaraela hia thithö ka than hnyi umen uma.

¹² Je liamekeiny öbun mönya, a je jeiök me utiöik öbun: ke ieû ang a öbun bec he ka ohmeto than?

¹³ Ke ha thö kö Amasa, ka habe, Hawa, ca jeiök u me utioik? e so Khong ame ânyâ helâe könya me bi hanen minya, u je ne ca he ka taben utbavat hnyi hnyimakök bala hwabö Joab.

¹⁴ Ke e ame ohmehmela hnyekon at Juda hia thithö helâ me at a khaca; me adre me ûkhûnöng ka than me ha, ka habe, Hmetu ju me lathnyabaem hia thithö.

¹⁵ Me ame hmetu than me o hnyi Joridano. Ke ame o at Juda hnyi Gilegala, me ûkhanö me than, he ka hom than hanyâûâ Joridano.

¹⁶ Ke e logot Simei nöku Gera at Beniamina, wale at Bahurim, me tha he me at Juda he ka ûkhanö me Davita a than.

¹⁷ Ke khaca thauzan tavat unyin a at Beniamina me Ziba athnyabainy lap anyi Saulo, tha e me lakon ta baga a fifitiny, me lathnyabainy a twente; ke ödrin e he hanyâûâ Joridano hnyi hnyimakan than.

¹⁸ Ke ame he hanyâûâ ke galu, me me houden lap anyin than, me ânyâ anyin ta je huliwa. Ke Simei nöku Gera ame hanyâûâ Joridano me ta ju hnyi hnyimakan than.

¹⁹ Me e ame ha ka than, ka habe, Ca he tuhok ka ip hnok, ke u me ca he ka ûnykûme monu a ânyâ athnyabaem hnyi bong than a tuhok ame he but ûheny Jerusalema, me me vec hnyekon than.

²⁰ Anyin ae khanö nya athnyabaem a oge me ânyâ hwakecin ae kong: me wâ bi, inya oge me bök ka o ke tiga hia lap hia anyi Josefa hnyi bong ang he ka ut ka ûkhanö me than a tuhok.

²¹ Ke haba Abisai nöku Zeruia ame thu, ka habe, Hawa, adre me ca ke ka hlingö Simei can ang, wale e ame hangâ hna hû hnö Iehova?

²² Ke haingö Davita, ka habe, Ieû könya gabun je laku Zeruia, mʼ öbun e he ka bi iwahnaihmiony mönya hnyi bong ang? hawa, adre me he ka hlingâ ke at hnyi Isaraela hnyi bong ang? hawa oge me ca wâ a iny than Isaraela hnyi bong ang?

²³ Haba than ame ha kö Simei, ka habe, U me ca he ka mok. Haba than ame khemanyin kâu.

²⁴ Ke haba Mefiboseth nöku Saulo ame utut he ka ûkhanö me than; ke a ca hneû li can, me ânyâwia wainy, me hneû anyin je ûkhaû, hwân hnyi bong ame he than ke ne o but e ame o hmetu me hnahic.

²⁵ Ke e ame o but hnyi Jerusalema he ka iouny me than, me ame ha kâu than, ka habe, Ieû gam Mefiboseth u je ca tha he mönya?

²⁶ Me e ame thu, ka habe, Than lö a tuhok, a iyawö nya athnyabaik: anyin a oge me ha athnybaem, ka habe, Oge me he ka ip taben hon asina, me laba hon, me tha he me than, anyin ae mat can athnyabaem.

²⁷ Ke e ame bi fuco athnyabaem ka than a tuhok; ke helâ me angela anyin Khong than a tuhok: hamâm he ka ânyâ ûnyi ae so köu.

²⁸ Anyin a helâ ke je komok ödrin hia hnyi lap anyi cica hnyi hnyimakan than a tuhok: ke so bi u je ip nya athnyabaem unyidrin tavat ödrin e han hnyi ânyâm lanlau. Ke hawa, iny ûcû hmetu he ka tenge ka than?

²⁹ Haba than ame ha kâu, ka habe, Hnân eû he ka ha hmetu ânyâm je ûnyi? Oge me ha, ka habe, u me he me Ziba ka khenâ hnyei.

³⁰ Ke haingö Mefiboseth ka than, ka habe, E so e he ka hom hia, anyin a haba than a tuhok ame o but ka hnyi umen uma me hnahic.

³¹ Ke ame utut Bazilai at Gileada ûheny Rogel; ke e ame tha hanyâûâ Joridano me than, he ka su e hanyâûâ Joridano.

³² Ke ti hingat ut Bazilai, eite je hunainy: ke e ame hia but han than kʼ ame tiga laba hnyi Mahanaima; anyin a e at ae ti ûnyi hnathu.

³³ Ke haingen than kö Bazilai, ka habe, Öte tha hanyâûâ, ke u me he ka tha han mönya hnyi Jerusalema.

³⁴ Ke haingö Bazilai ka than, ka habe, Ve biju ta je bong hnyi je huna oge me ka möt hnyin, me inye he ka tha he me than Jerusalema ai?

³⁵ Eite but je hunaik hnyi bong ang: hawa, e khanö nya he ka wâhmakhmeto so me kong? ke khanö nya athnyabeam be ka drem ûnyi oge me han me ic? ke khanö nya long hmetu hwan khumöng anyin obaga me omomo? ke hnân eû oge me he a athnyabaem ka hmak ka tuhok?

³⁶ E na omi hanyâûâ Joridano athnyabaen me than: ke hnân eû ame he than ka bi hwaban könya ge hwaban a helâe?

³⁷ Ö u hnö nya athnyabaem he ka hmetu mʼ oge me mok hnyi anyik taun cicö hu cica me bai. Ke wâ bi ang athnyabaem jia Kimeama; hamen he ka tha he me than a tuhok; me u me he ka ânyâ kâu wem.

³⁸ Me than ame thu, ka habe, Ame he Kimeama ka tha he mönya, me oge me he ka ânyâ kâu wem bi, haba ûnyi u je ha könya me oge me he bi nya ka ânyâ.

³⁹ Ke ame he hanyâûâ Joridano tavat hia, kʼ ame hanyâûâ minya than: ke than ame ûcimhnyimak me Bazilai me hahnahicâ; me e ame hmetu ka hnyi hnyaban.

⁴⁰ Me haba than ame he hanyâûâ Gilegala ai, ke Kimeama ame tha he mē: ke ame su than ge at Juda hia thithö, me hafiny at Isaraela.

⁴¹ Ke wâ bi, ame he at Isaraela hia thithö ka than, me ha ka than, ka habe, Anyin a ieû a hom duöngi u je liamekeiny möhmun a at Juda, me hom than me anyin lap, me tavat hia atö Davita a tha ödrin mē he ka hanyâûâ Joridano?

⁴² Haba at Juda hia thithö adre me thu ka at Isaraela, ka habe, Anyin a iate mʼ ohmun than: ke can ieû ame hmönyibun kohmun can ûnyi e? E hu hnöhmun hna han ûnyi ge than? e bu omjehehmun ûnyi gan?

⁴³ Me haba at Isaraela adre me thu ka at Juda, ka habe, Ten je ke keihen gahmun unyin than, ke ohmun e hu beönua hubun unyi Davita: ke ieû gabun öbun e hûkötiöhmun, me ca me ûhnenamö möhmun he ka ohmeto tuhöhmun? Ke e hwege hofuc hwan at Juda hon hofuc hwan at Isaraela.