II. Samuela 16 - Iaai Bible 1901 (New Caledonia)

¹ KE a biâ but Davita onua ûhnyûkong ge ban bucen me wâ bi, ame ûkhanö me Ziba athnyabai Mefiboseth tha e me li asina adre hije hok, lo li haded je areto, ke khaca haded de wan vine adre hlec meleca, ke khaca haded je wan ûö hnyi huna, ke khaca waina.

² Ke haingen than kö Ziba, ka habe, Ieû u me he ka ânyâ ge ta je ûnyi ang? Haingö Ziba, ka habe, Haba li asina me hnân bi taben lap anyin than; ke haba je areto me je wan ûö, me, an wahidröu; ke haba waina me belen tavat ae sēnyin hnyi hnyebuba.

³ Ke than ame hnö, ka habe, Ke ewa nokon tuhâm? Haingö Ziba ka than, ka habe, e ame laba bi hnyi Jerusalema: anyin a haingen, Ame he lap anyi Isaraela ka ham könya hnyi bong ang dökhu dökhu cica.

⁴ Ke haingen than kö Ziba, ka habe, Wâ bi e unyâm ta je anyi hia anyi Mefiboseth. Ke haingö Ziba, ka habe, Inya oge me nom köu, me u me betenge gak than a tuhök.

⁵ Ke a o but Davita than hnyi Bahurim, me wâ bi, ame didrut ûheny e ke at hanen lap anyi Saulo, Simei ien, nöku Gera: kʼ ame didrut me ûhangö tot.

⁶ Ke e ame kuc Davita ge veto, me lathnyabai Davita hia thithö: ke e bi hnyi ke keihen a metâ me meny tavat hia me tavat ae hwege hia.

⁷ Ke haba Simei ame ûhangö me ha, ka habe, He thö, he thö, u aten dra, me atö Belial:

⁸ haba Iehova ame hia but ohmeto köu dra hia dren lap anyi Saulo, at u je hwöhwaban; ke a hia but Iehova hna dökhu ka hnyi hnyamö Abasoloma a nokom: ke wâ bi, adre me hum u hnyi ânyâm hulö, anyin a u ke aten dra.

⁹ Me haba Abisai nöku Zeruia ame ha ka than, ka habe, Can ieû ame he at ang a e kuli ae mok ka hanga than a tuhok? ö u hnö nya he ka sö degecâ ban.

¹⁰ Ke haingen than, ka habe, Ieû könya gabun ta laku Zeruia? haba hnen hna ûhangö, me can ame ha kâu Iehova, ka habe, Hangö Davita thö; ke ie at ame he ka ha, ka habe, Ieû gam u me ânyâ e?

¹¹ Ke Davita ame ha kö Abisai, me lathnyabainy hia, ka habe, Wâ bi, e bekuc nya nökuk, at a o ûnyi hnyi hnyekuk; me hawa, ame ca he at Beniamina eang ka ânyâ helâe? hna but e, hamen he ka ûhangö thö, anyin a Iehova ame kunâ e.

¹² Ke ame ne be Iehova ka wâ hna okongu nya, me me he Iehova ka bi hwaban so könya hwaban hnen hna hangö nya hnyi bong ang.

¹³ Ke haba Davita me je aten ödrin e vheno gethen: haba Simei ame vheno baten bucen cicö e, me ûhangö tot, me kot e ge veto, me iâ sesâ.

¹⁴ Ke ame o but than me tavat hia thithö unyin, ke ödrin sēnyin dut, me ödrin e menâ eling.

¹⁵ Ke ame o but Abasoloma me tavat hia thithö a at Isaraela unyin hnyi Jerusalema, ke tha e mē Ahithofela.

¹⁶ Ke ame o but Husai at Areki ihumi Davita kö Abasoloma, me haba Husai ame ha kö Abasoloma, ka habe, E so e möt bi than, e so e möt bi than.

¹⁷ Ke Abasoloma ame ha kö Husai, ka habe, wale ânyâm betenge ka hânâm? anyin a ieû u je ca tha he me hânâm?

¹⁸ Haba Husai ame thu kö Abasoloma ka habe, Ohe; ke haba at a ûca Iehova, me tavat eang, me at Isaraela hia, me oge me he ka bi aten, me tha laba mē.

¹⁹ Ke haba khaca, ie at ae ûcû könya he ka bi athnyabainy kâu? oge me ca he ka bi athnyaba hnyi hnyimakan nokon? oge me he ka bi athnyaba köu helâji me hnok hna bi athnyaba hnyi hnyimakan kâmâm.

²⁰ Ke Abasoloma ame ha kö Ahithofela, ka habe, Omanenâ thö ûnykûmânâm ge ûnyi otin he ka ânyâ.

²¹ Ke Ahithofela ame thu kö Abasoloma, ha habe, U me he ka didro ka je momo anyin kâmâm, wale e ame ip he ka tuö uma; ke ame he ka long Isaraela hia a u bon dut ka kâmâm: me ame he ka hwege hnyamen ta je lahiâm.

²² Me ödrin e ulolo uma mano hon ban uma; me haba Abasoloma ame didro ka je momo anyin kamen hnyi hnyimakan at Isaraela hia thi-thö.

²³ Ke haba ûhnenamö anyi Ahithofela, wale e ame ûhnenamö hnyi je bong eling, e bi helâ ke at ame hnö hnyi hofuc hwan Khong: helâe minya bi je ûhnenamö hia anyi Ahithofela ga Davita me ga Abasoloma.