II. Samuela 15 - Iaai Bible 1901 (New Caledonia)

¹ KE hwaban e Abasoloma ame penapena ke kariota me je hors hobi kâu e bi, me tavat a fifite he ka bodrin ka wadring hnyi hnyimakan bi.

² Ke Abasoloma ame vesâ kong, kʼ ame tot hnyi getheniny homagöule: ke ame ne o ke at ae hu iwatretra me me he than ka owisa, me haba Abasoloma ame hawâ e, me ha, ka habe, U je mwi ua? Ke haingen, ka habe, Ûhek athnyabaem hnyi ke tribu hnyi je tribu Isaraela.

³ Ke Abasoloma ame ha kâu, ka habe, Wâ bi, e so me wisa ânyâm je ûnyi; ke ba at a kunâ hnen than be ka long köu.

⁴ Ke Abasoloma ame ha minya, ka habe, E na kunö nya ju he ka owisa hnyi hnyei, me me he könya tavat hia thithö ae hu iwatretra, me ûhnei, me inye he ka owisa, kâu!

⁵ Ke e ka hakekeny kâu ke at he ka nom kâu, me e ame inâ benyin me kât e, me ûcimhnyimak mē.

⁶ Ke Abasoloma ame ânyâ helâe kö Isaraela hia ödrin e o ka than he ka ûhnei: ke Abasoloma ame venâu hnyekon at Isaraela.

⁷ Ke hwaban je huna a fâte, Abasoloma ame ha ka than, ka habe, Ö u hnö nya he ka he ka subâ anyik khöbi, wale o ge hûkâlâ kö Iehova hnyi Heberona.

⁸ Anyin a inya athnyabaem oge hûkölö khöbi ke oge me tiga laba hnyi Gesuri hnyi Suria, ka habe, A ne he Iehova ka hum nya hmetu Jerusalema ai, awe, oge me he ka bi athnyabai Iehova.

⁹ Haba than ame ha kâu, ka habe, He thö me hnahic. Me e ame tot me he Heberona ai.

¹⁰ Ke haba Abasoloma ame kunâ je hnyat wâ bongon ka hnyi ta je tribu hia anyi Isaraela, haingen, ka habe, Öbun ka long dö hwan trutru, öbun e he ka ha, ke habe, Than dö Abasoloma hnyi Heberona.

¹¹ Ke ame tha he me Abasoloma tavat a tu haded ûheny Jerusalema, adre hawʼ ödrin, ke ödrin e he me hnathu, ke ca khanʼ ödrin ke ûnyi.

¹² Ke Abasoloma ame ûkhûnöng he ka hum Ahithofela at Gilo, ke obotkongi Davita ûheny hnyi anyin taun, wale ûheny Gilo, ke e ame tiga hudo je hut. Ke e hwege but hna sihnân; anyin ame se hia tot tavat unyi Abasoloma.

¹³ Ke ame o but kö Davita ûthumetu, me ba, ka habe, A ok ut hnyekon at Isaraela kö Abasoloma.

¹⁴ Haba Davita ame ha ka lathnyabainy hia unyin hnyi Jerusalema, ka habe, Todrö, otin e kec, wâ e nye ca kec möt ke at gatin ûnyi ga Abasoloma: logotö, mʼ otin e he, wâ e nye hom tilʼ otin logot, me me oâ unyi ae kong kötin, me kot taun ge hele vat.

¹⁵ Me ame ha ka than ge lathnyabainy than, ka habe, Wâ bi ame he lathnyabaem ka ânyâ hia helâ me hna he than a tuhöhmun ka ha.

¹⁶ Ke ame didrut than me anyin lap hia hoton. Ke than ame ip biju je momo a ten, a anyin je momo he ka tuö hnyaban.

¹⁷ Ke ame didrut than me tavat hia hoton; me laba hnyi Bethe-merhak.

¹⁸ Ke ame tha he ehele lathnyaba hia unyin; me at Kerethi me Pelethi, me Gatha hia, tavat a siks haded hnyat he hoton ûheny Gatha, ödrin e bodrin hnyi hnyimakan than.

¹⁹ Ke than ame ha kö Itai at Gatha, ka habe, Anyin a ieû u me tha he möhmun! hmetu ju ka hnyi hnâm, me tha laba me than: anyin a u atkanyua me bâ.

²⁰ U je o et, ke hawa, oge me he ka kunö u hnyi bong ang he ka tha vheno möhmun, iny ka he hnyi je dok oge me wek ka he hnyin? hmetu ju, ke ohmeto ju je liamekeiny möu; ke so e bi unyâm ibetengiö me hnathu.

²¹ Haba Itai ame thu ka than, ka habe, Kia inya Iehova, ke kia inya than a tuhok, haba inya athnyabaem oge me he ka tha laba hnyi dok ame laba hnyin than a tuhok.

²² Ke haingö Davita kö Itai, ka habe, he thö me hanyâûâ. Me Itai at Gatha ame tha he hanyâûâ me tavat hia unyin, me tavat hia ae ûhnyûkong unyin.

²³ Ke ame tenge goranyai hnyei hia, ke tavat hia adre me he hanyâûâ: me than minya bi ame hanyâûâ wagewe Kederon, kʼ ame hanyâûâ tavat hia thithö getheniny hnyebuba.

²⁴ Ke wâ bi, Zadoka minya me at Levi hia unyin, ödrin e vadren tangen ûhihinyköu anyin Khong; ke ödrin e ip tang tangen Khong, ke Abiathara ame ölö ke ne o but ame didrut tavat hia ûheny hnyi taun.

²⁵ Me ame ha than kö Zadoka, ka habe, Hom hmeto thö tang tangen Khong ka hnyi taun: ame ne he Iehova ka betenge gak, me e ame he ka ohmetu nya, me tha omanenâ e bi könya me hnyaban minya:

²⁶ ke ame ne ha, ka habe, Oge me ca senyin gam; awe walönya ang, hamen he ka ânyâ könya unyi ae so hnyi hnyimakan.

²⁷ Ame ha minya than kö Zadoka, at bihut, ka habe, U at ame wâ? awe, hmetu ju ka hnyi taun hnyi hnahic, me Ahimaza a nokom, me Jonathana a nöku Abiathara, li lakubu a tha ödru möbu.

²⁸ Wâ bi, o-ge me he ka me laba hnyi dok ae tha hon hnyi hnyebuba, ke ne o but ame o hofuc ûnyi gabu he ka thumetu nya.

²⁹ Anyin a wale haba Zadoka me Abiathara ödru me vadren hmetu tang tangen Khong Jerusalema ai: me ödru me laba eling.

³⁰ Ke Davita ame ölö hnyi getheniny bucen Elaio, me ölö me tenge tot; ke adre tube ban, ke ba tangen linyeûca: ke haba tavat hia adre me tha he mē, ödrin e ve tube je bodrin, me ölö me tenge tot.

³¹ Ke ame ha ke at kö Davita, ka habe, Ahithofela, ame tha he me tavat hûgûnâ dökhu, me Abasoloma. Haba Davita ame ha, ka habe, Iehova lö, ohavâ but ûhnenamö anyi Ahithofela me me monu but.

³² Ke ame o thö Davita ka hnyi ban bucen, wale adre labö khudrung hnyin ka Khong, wâ bi, Husai at Areki ame ûkhanö mē a kia anyin ûkot, me e hu kânâ hon ban:

³³ ke Davita ame ha kâu, ka habe, U je ne tha be mönya u me he ka ohmakö nya:

³⁴ ke u je ne hmetu ka hnyi taun, me ha kö Abasoloma, ka habe, Oge me he ka bi athnyabaem, than; helâ me hnok hna bi athnyabainy kâmâm e hac, helâe oge me he walang ang ka bi athnyaba köu: ke wale u me he ka ohavâ hobi könya ûhnenamö anyi Ahithofela.

³⁵ Ke hawa, ca tha e möu eling Zadoka me Abiathara li at bihut? ke haba ta je ûnyi hia thithö u me he ka long hnyi uma umen than, me u me he ka thumetu Zadoka me Abiathara li at bihut.

³⁶ Wâ bi, eling unyidru li lakudru, jia Ahimaza nöku Zadoka, me Jonathana nöku Abiathara; ke öbun e he ka kunʼ ödru me ta je hofuc hia thithö öbun e he ka long.

³⁷ Me haba Husai ihumi Davita ame he ka hnyi taun; ke ame o but Abasoloma hnyi Jerusalema.