II. Samuela 14 - Iaai Bible 1901 (New Caledonia)

¹ KE e khanö Joab nöku Zeruia a gʼ ame hnyok kö Abasoloma than.

² Ke Joab ame ûkhûnöng Tekoa ai, me hawâ ke momo ae metâ, me ha kâu, ka habe, Ö u me he ka tenge thoi, me khavâ je ûkhaûen hnyamok, kʼ u me ca he ka sûö wakaco, kʼ u me he ka helâ me momo ame tenge beû can at a mokcu:

³ ke he thö ka than me hi kâu je hofuc ang. Me Joab ame ip hofuc hnyi hnyimen momo.

⁴ Ke momo Tekoa ame fuc ka than, me e ame ta hnyikânâi, me iyâû, me ha, ka habe, Than lö, hadruâ thö.

⁵ Ke haingen than ka momo, ka habe, Ieû gam? Me haingen, ka habe, Iny safac, ke a mokcu öiök.

⁶ Ke e hu gak a athnyabaem lakuk li baga, ke ödru me û hnyi hnyei, ke ba at he ka öûsâkâû ödru, kʼ ame kot ke at ge ke at, me hlingâ.

⁷ Ke wâ bi, ame tha todrö lap hia könya athnyabaem, ke haingödrin dö, ka habe, Hna but at a hlingâ liamekeiny mē, mʼ öhmun e he ka hlingâ e can möt anyin liamekeiny mē, waleji e ame hlingâ, me ohia minya helâe at ame he ka tren ta je omjeû u ka mok bi: he haba helâe me ödrin e he ka omoko walep a kolon unyik, me me ba but ien me kolon ka öiök eang hmeledrany.

⁸ Me haba than ame ha ka momo, ka habe, He thö ka hnyi umâm uma, me oge me hd bi nya ka hûna gam.

⁹ Haba momo Tekoa ame ha ka than, ka habe, Than a tuhok lö, e so ame he hulö ang ka ta huk me lap anyi cica; ke ba konginy than me anyin theron.

¹⁰ Ke haingen than, ka habe, Ame ne he ka fuc köu ke at, hom bai jem könya, kʼ ame ca he hmetu ka kalö u

¹¹ Me haingen momo, ka habe Ö u unykûme than Iehova Khongom, me me ca he hmetu at ame bi hwaban komok ka bi hwaban bi, wâ ödrin nye he ka ohia nökuk. Me e ame ha ka momo, ka habe, Kia inya Iehova ame ca he ka kolu hnyikânâi ke leûnen ban nokom.

¹² Haba momo ame ha, ka habe, Ö iny me he a athnyabaem ka ha ke hofuc ka than a tuhok. Haingen, ka habe, Ha thö.

¹³ Ke haingen momo, ka habe, Ieû can u je hia but ûnykûme he ka ânyâ helâe ka tavat anyin Khong? Anyin a haba hnen than hna ha hofuc eling helâ ke e hu hulö ge than, wale hnyi hnen hna tha hom hmetu at e ame obâ.

¹⁴ Anyin a bongon bi at he ka mok, me helâ me köiö adre hingâlâ hnyikânâi, waleji adre me ca he hmetu ka ûkhöûnâ; ke haba khaca Khong ame ca hlingâ at, ke e ame bi deny, me me ca hia gan at adre me obâ.

¹⁵ Ke walang ang oge o but he ka ha hofuc eling ka than a tuhok, anyin a tavat ödrin e hia hut ooti nya: ke oge me ha, a athnyabaem, ka habe, Oge me he ka he walang ang ka ha ka than; ame ne he than ka ohwâdâ hna ha ge athnyabaem.

¹⁶ Anyin ame he than ka long, me omelö athnyabainy ûnyi hnyi hnyamen at ame he ka tha ohiö nya me nökuk ûnyi hnyi jekhoû jekhon Khong.

¹⁷ Ke ame ha athnyabaem, ka habe, Ö u, he ka öûsoköuâ but hofuc hwan than a tuhok: anyin a helâ than a tuhok me angela anyin Khong, he ka wâhmakhmeto so me kong: ke ame he Iehova Khongom ka tha e möu.

¹⁸ Me ame thu than me ha ka momo, ka habe, Ö u ca he ka ikhâlâ gak ûnyi oge me he ka hnö gam. Haingen momo, ka habe, E so than a tuhok ame fuc walang ang.

¹⁹ Me ame ha than, ka habe, ca tha u me Joab hnyi ûnyi ang? Me ame thu momo, ka habe, kia inya u than a tuhok a gʼ ame ca khana ke at he ka saû ka hnyi ke keihen metâ me me, ûnyi hnyi hna ha hia hnen than a tuhok: anyin a Joab, athnyabaem, e bi a hûna könya, me ip ta je hofuc hia eling hnyin hnyimök a athnyabaem:

²⁰ A ânyâ ûnyi eling Joab athnyabaem, hnân he ka wia bongon: ke e metâ tuhok helâ me ûmetâinv angela anyin Khong, he ka wâhmakhmetoâ ta je ûnyi hia tbithö eang hmeledrany.

²¹ Haba than ame ha kö Joab, ka habe. Wâ bi, oge hia but ânyâ ûnyi ang: he thö ka hawâ hidröu jia Abasoloma.

²² Haba Joab ame ta hnyikânâi me khudrung, me ha hnahicâ than: ke Joab ame ha, ka habe, A wâ but athnyabaem hnyi bong ang a oge me wâ ibetengiö hnyi hnyimâkâm than lö a tuhok, anyin a than ame kap hofuc hwan athnyabainy.

²³ Haba Joab ame todrö me he Gesuri ai, me hum Abasoloma Jerusalema ai.

²⁴ Ke haingen than, ka habe, E ame he ka saû ka hnyi umen uma, kʼ ame ca he ka wâ hnyimakök. Me Abasoloma ame saû ka hnyi umen uma, kʼ ame ca wâ hnyimakan than.

²⁵ Ke ba at ae lung gan hmâ helâ me Abasoloma hnyi anyin hmanenang hnyi Isaraela hia: e ba hnyikongon hwân hnyi li hnyeûcan ke ne o but hnyi ban.

²⁶ Ke e ka subâ leûnen ban (ke ame sö hnyi obiny huna anyin ae hmak bi me e ame l sö): kʼ adre me ne tuluto ihmakiny leûnen ban, me lo li haded je sekel, hoton tulut anyin than.

²⁷ Ke adre hnokoâ kun ta baga laku Abasoloma, ke khaca hlu, Tamara ien: e momo ae hmanenang.

²⁸ Ke Abasoloma ame laba hnyi Jerusalema hnyi lo li huna ae bekhöt; kʼ ame ca wâ hnyimakan than.

²⁹ Ke Abasoloma ame hawo Joab me me kunâ ka than, ke e ame höcö long; me ame olo hawâ, ke höcö bi he.

³⁰ Me e ame ha ka lathnyabainy ka habe, Wâ bi, e hakekeny könya utkânâ i Joab, ke e hu anyin bali eling; he thʼ öbun ka thong. Me haba lathnyabai Abasoloma ödrin e thong utkânâ.

³¹ Haba Joab ame todrö me he kö Abasoloma ka hnyi umen uma, me ha kâu, ka habe, Can ieû a thong ik utkânâ ge lathnyabaem?

³² Me Abasoloma ame thu kö Joab, ka habe, Wâ bi, oge me ûkhûnöng köu, ka habe, Aiö u, mʼ oge me he ka kunö u ka than, he ka ha, ka habe, Oge me he jem ûheny Gesuri kâ ieû? e so könya inya tiga laba eling: ke walang ang iny bewâ hnyimakan than; ke ame ne hu hulö unyik me hamen he ka hlingö nya.

³³ Me ame he j Joab ka than, me thumeto e: ke e ame hawo Abasoloma, me e ame he ka than, me nom hnyikânâi hnyi hnyimakan than: me ame ûcimhnyimak than me Abasoloma.