II. Samuela 13 - Iaai Bible 1901 (New Caledonia)

¹ KE a um dö ta je ûnyi e, haba Abasoloma nöku Davita me hu haniny ae hmanenang, Tamara ien; ke Aurinona nöku Davita ame weny e.

² Ke ame vec Aminona me mok unyin ga Tamara a haniny; anyin a e hlu baû; ke e hmak kö Aminona bi he ka ânyâ ke ûnyi kâu.

³ Ke e hu ihumi Aminona, Jonadaba ien, nöku Simea, liamekeiny me Davita: ke at metâ Jonadaba.

⁴ Ke haingen kâu, ka habe, Ieû gam, nokon than lö, a u delâ hnyi je bong? u me ca he ka thumetu nya? Haba Aminona ame ha kâu, ka habe, E wek Tamara, hani Abasoloma liamekeiny mönya.

⁵ Ke Jonadaba ame ha kâu, ka habe, U me he ka mokut hon hnâm hna mokut, me mok thoi: ke e ka o kâmâm he ka ō u, u me he ka ha kâu, ka habe, Ö e me he jem Tamara a hanik, he ka haök, me bi han hnyi hnyimakök, mʼ inye he ka wâ, me han ûnyi gan.

⁶ Me Aminona ame mokut, me mok thoi: ke ame o but than he ka wâ e me haba Aminona ame ha ka than, ha habe, Ö e me he jem Tamara a hanik, me op li ong areto unyik, me inye he ka han ûnyi gan.

⁷ Haba Davita ame ûkhûnöng kö Tamara ka hnyi hnyaba, me ha, ka habe, He thö ka hnyi uma umo Aminona a hânâm, me bi an.

⁸ Haba Tamara ame be ka hnyi uma umo Aminona a haniny; ke e ae mokut. Ke e ame hom falawa, me op, me ânyâ je ong areto hnyi hnyimakan, me le je ong areto.

⁹ Me e ame hom öt, me hingâlâ hnyi hnyimakan; ke e höcö han. Haba Aminona ame ha, ka habe, Didrut tavat hia thithö unyik. Me ame didrut tavat hia thithö unyin.

¹⁰ Me Aminona ame ha kö Tamara, ka habe, Hukâ thö jem jeû ka hnyi hnyeule, mʼ inye he ka han ûnyi hnyi hnyamâm. Me Tamara ame hom je ong areto a op, me hom kö Aminona a haniny hnyi hnyeule.

¹¹ Ke e ame hom e kâu me me han me e ame kât, me ha kâu, ka habe, Hanik, otu me he ka tha mokut.

¹² Me e ame ha kâu, ka habe, Ohe, hanik, u me ca be ka okongu nya; anyin adra me ca ânyâ helâe hnyi Isaraela: u me ca he ka ânyâ monu ang.

¹³ Ke oge me he bi nya ka kâcâ kâ anyik hmehma? ke haba u, me u me he ka helâ me at ae monu hnyi Isaraela. Ke walang ang ö u ma ha thö ka than, anyin a e ame ca he ka behanö nya gam.

¹⁴ Ke höcö he ka long hofuc hwan hlu: ke e hwege hon, me ame okongoâ, me tha mokut mē.

¹⁵ Me Aminona ame ti ikikiâ hlu bi; ke beönua tulutiny hna ikikiâ hon tulutiny hna betenge gan abân. Me Aminona ame ha ka hlu, ka habe, Todrö, he thö.

¹⁶ Me haingen hlu kâu, ka habe, Ohe, anyin ae beönua monu ang a u je obö nya, hon unyi eji u je ânyâ könya. Ke e ame ca long kâu.

¹⁷ Me e ame hawâ athnyabainy at a labö huliʼwa unyin, me ha, ka habe, Lelö but momo ang unyik, me ohmâ hwanuma hwaban.

¹⁸ Haba khaûen hlu me ûkhaû ae ve makan: anyin ame labö khavâ je ûkhaû helâe wahlu lakon than ödrin tiga hlu hmai. Me haba athnyabiny ame hom hlu kâû ka hnyi hwanuma, me ohmâ bi hwanuma hwaban.

¹⁹ Me haba Tamara ame ip dröu ka hnyi hon ban, me kia ûkhaû ae ve makan a khavâ, me hai hnyamen hon ban, me tenge tot.

²⁰ Ke Abasoloma a haniny ame ha kâu, ka habe, Hawa, a mwi unyâm Aminona a hânâm? awe, laba hnyibu ju, hanik: hânâm e; ca vecâ ûnyi ang. Ke Tamara ame laba baû hnyi uma umö Abasoloma a haniny.

²¹ Ke a long ut Davita je ûnyi hia eling, me e ame gan hmonyin.

²² Ke Abasoloma ame ca fuc kö Aminona, ame ne ûnyi ae kong ame ne ûnyi ae so: anyin a Abasoloma ame ikikiö Aminona, can e ame okongu Tamara a haniny.

²³ Ke hwaban lo li huna me hu tavat subâʼ leûnen mamoe hale Abasoloma hnyi Baala-hazor, hakekeny Eferaima: ke Abasoloma ame hawâ obaga hia lakon than.

²⁴ Ke Abasoloma ame o ka than, me ha, ka habe, Wâ bi, walang ang, e hu tavat subâ leûnen mamoe haleny athnyabaem; ö e he but than me lathnyabainy könya athnyabaem.

²⁵ Ke haingen than kö Abasoloma, ka habe, Ohe, nökuk, ohmun e ca he hia thithö ka hnyi he, wâ e nye hmak köu. Ke e ame ûjengö: ke so bi e ame ca he, ke e ame ha hnahicâ e.

²⁶ Haba Abasoloma ame ha, ka habe, Ame ne ba, ö e tha he möhmun Aminona liamekeiny mönya. Haba than ame ha kâu, ka habe, Hnân eû e ame he ka tha he möu?

²⁷ Ke Abasoloma ame ûjengö e, me e ame hnö Aminona me je baga hia lakon than he ka tha he mē.

²⁸ Ke Abasoloma ame hûna ka lathnyabainy, ka habe, Wâ wia öbun, e ka senyin hnyeku Aminona ge waina; ke iny ka ha köbun, ka habe, Kuc Aminona but, awe, hlingâ but e, ca ot bi, hawa, inya oge ca hûna köbun? hwege thö, me hnyok baga but.

²⁹ Me haba lathnyabai Abasoloma ödrin e ânyâ kö Aminona helâ me hna hûna hnö Abasoloma. Me ame todrö je baga lakon than hia, me ve tabâ haledrin je miul, me kec.

³⁰ Ke tiga ödrin bi eû hnyi gethen, me ame o but kö Davita ûthumetu, ka habe, A hia thö Abasaloma hlingâ obaga lakon than hia, ke ba but kolon.

³¹ Me ame todrö than me kia anyin je ûkhaû, me mokut eû hnyi kânâ; ke ame tot unyin lathnyabainy hia adre hia but kia anyidrin je ûkhaû.

³² Me ame ha Jonadabu nöku Simea, liamekeiny me Davita, ka habe, Ca he bi tuhok ka ûnykûme e ga mokcu je hidröu hia je lakon than; anyin a Aminona thibi a mokcu: anyin a Abasoloma ame ip hnân, hwân hnyi bong e ame okongu Tamara hnyin a haniny.

³³ Ke walang ang ca he bi than a tuhok ka hmak ge ûnyi ang he ka ûnykûme a ga mokcu hia je lakon than; anyin a Aminona thibi a mokcu.

³⁴ Ke Abasoloma ame kec. Ke ame bwele hidröu at ame hmak, me wâ, ke wâ bi, wale tavat ae se hia ödrin e be hnyi getheniny bucen hnyi hoton.

³⁵ Ke haingö Jonadaba ka than, ka habe, Wâ bi, e but ang je lakon than: e hnathu helâji me athnyabaem ame ha.

³⁶ Ke ame um dö ha, me wâ bi, ame o but je lakou than me ödrin e tenge goranyai: ke ame ti tenge gan hmâ minya than me lathnyabainy.

³⁷ Ke Abasoloma ame kec, me he kö Talemai nöku Amihuda than Gesuri. Ke Davita ame tenge hnyi ta ogo bong ge nokon.

³⁸ Ke Abasoloma ame kec, me he Gesuri ai, kʼ ame laba eling kun ta huna.

³⁹ Ke e gan hmâ behe Davita kö Abasoloma: anyin a tubwet ut ga Aminona, anyin a mokcu.