II. Samuela 12 - Iaai Bible 1901 (New Caledonia)

¹ ME haba Iehova ame kunö Nathana kö Davita. Ke e ame o but kâu, me ha, ka habe, E hu li at hnyi taun a khaca; e tren omjeû ke at, ke ba ta ûnyi anyin ke at.

² Ke e hu ge at ae tren omjeû je mamoe me kau ae ti se hia hmonyin:

³ ke ba ke ûnyi anyin at ae ba ta ûnyi, ke so bi khaca thibi nokon mamoe a momo, waleji e ame ûco me hat: ke ame gan tot hnyi hnyimakan me lakon; kʼame hnyi an an jeû, kʼ ame hnyi ijem belen kaia, kʼ ame mokut hnyi ûlainy, ke e thibi helâ me nokon hlu.

⁴ Ke ame o but ka at ae tren omjeû ke at ûheny hnyi hna he, kʼ ame höcö bi he ka hom ûnyi hnyi haleny je mamoe me kau he ka thân hobi kâu at a o kâu, me e ame hom nokon mamoe haleny at ae ba ta ûnyi, kʼ ame thân bi hobi kâu at a o kâu.

⁵ Me ame ûbahlâ gan hmâ hmonyin anyi Davita ka at; ke e ame ha kö Nathana, ka habe, Kia inya Iehova, ae ûcû he ka mok at ame ânyâ helâe:

⁶ ke e ame he ka ovak ham hnân bi hnen nokon mamoe, can e ame ânyâ ûnyi e, ke ba betenge gan.

⁷ Haba Nathana ame ha kö Davita, ka habe, U at eling, Walang hna ha hnö Iehova, Khongu Isaraela, ka habe, Oge hû u hnân thaniny Isaraela, ke oge omeli u ûnyi hnyi hnyamö Saulo;

⁸ ke oge ham köu hnyaban tuhâm, me laâiân tuhâm ka hnyi ûlâiâm, me ham köu lap anyi Isaraela me Juda; ke ame ne ti ûhnyûkong e, oge me ne he ka bi hanen köu ge ke ûnyi me ke ûnyi.

⁹ Ieû gam u je hia but höciâ hofuc ho Iehova he ka ânyâ hulö hnyi hnyimakan? u je hia but kuc Uria at Heth ge hele vat, me hom âiân me âiâm, ke u je hlingâ e ge hele vat anyin lakon Amona.

¹⁰ Ke walang ang ame ca he ka hia hele vat hnyi hnyabam nyiele balua; anyin u je höciö nya me hom öiö Uria at Heth me âiâm.

¹¹ Walang hna ha hnö Iehova, ka habe, Wâ bi, oge me he ka okûâ ûnyi ae kong köu ûnyi hnyi hnyabam, ke oge me he ka hom laâiâm hnyi hnyimâkâm, me ham bi ka ke at, ke e ame he ka tha mokut me laâiâm hnyi hnyimakan seûno ang.

¹² Anyin a u je ânyâ duöngâ e, ke oge me he bi nya ka ânyâ ûnyi ang hnyi hnyimakö Isaraela hia, me hnyimakan seûno.

¹³ Haba Davita ame ha kö Nathana, ka habe, Oge hia but ânyâ hulö kö Iehova. Ke haingö Nathana kö Davita, ka habe, Iehova ame hia but ohia minya ânyâm hulö; u me ca he ka mok.

¹⁴ Ke so bi can anyin a u je kunâ je iwahnaihmiony me Iehova he ka bi gan ge ûnyi e awe, ame he ka mok nokom adre me he ka hnokoâ.

¹⁵ Me haba Nathana ame he ka hnyi hnyaban. Ke Iehova ame kot wanakat wale a hnokoâ öiö Uria ga Davita, ke e gan imekiny.

¹⁶ Haba Davita ame elâm Kkong hobi kâu wanakat; ke Davita awe ca han, me didro, me mokut eû hnyi kânâ hnyi lit hia.

¹⁷ Ke ame todrö je hingatiny hnyaban unyin, he ka kap e ûnyi hnyi kânâ: ke e ame höcö, ke e ame ca hnyi tha han mödrin.

¹⁸ Ke ame mokcu wanakat hnyi bong a seveniny. Ke e ot, lathnyabai Davita he ka thumeto e a ga mokcu wanakat: anyin a haingödrin, ka habe, Wâ bi, otin e fuc kâu ke tiga möt wanakat, me e ame ca long hötin: ke hawa anyin vec walang ang, otin e ne ba kâu, ka habe, A mokcu wanakat?

¹⁹ Ke Davida ame wâ a gʼ ame iulitköu lathnyabainy, me Davita ame wâhmakhmeto a ga mokcu wanakat: ke haingö Davita ka lathnyabainy, ka habe, Hawa, a mokcu wanakat? Me haingödrin, ka habe, A mokcu.

²⁰ Me haba Davita ame todrö ûheny hnyi kânâ, me soû, me hû ge wakaco, me khavâ ke je ûkhaûen; me o ka hnyi uma umo Iehova, me khudrung: me e ame he ka hnyi umen uma; ke e ame hûna ködrin, me ödrin e ip jeû hnyi hnyimakan, me e ame han.

²¹ Me ame ha kâu lathnyabainy, ka habe, Ieû ûnyi ang u je ânyâ? a u je ca han kʼ u tengiâ wanakat ke tiga möt; ke a mokcu wanakat, me u me todrö me han.

²² Me haingen, ka habe, Kʼ ame tiga möt wanakat oge me ca han, kʼ oge me tenge: anyin a haingök ka habe, Ie at ae khana ame ne he Iehova ka betenge gak, me me möt bi wanakat

²³ Ke walang a mokcu, hnân eû oge me ca he ka han? Hawa, e khanö nya he ka ohmeto e? Oge me he bi nya ka he kâu kʼ ame ca he bi e ka hmetu könya.

²⁴ Ke Davita ame otubweli Bathe-seba a âiân, me didro kâu, me laba unyin: me e ame hnokoâ da, me hwenyi ien Solomona. Ke Iehova ame betenge gan;

²⁵ me e ame ûkhûnöng a deny Nathana a perofeta, ke e ame hwenyi ien bi me Jedidia ga Iehova.

²⁶ Ke haba Joab ame vat me Raba hanen lakon Amona, me hûgûnâ taun anyin than.

²⁷ Ke Joab ame kunâ je ûthumetu kö Davita, me ha, ka habe, Oge me vat me Raba, eke, oge hia but hûgûnâ taun adre khû an hnyin.

²⁸ Ke haba walang ang u ma he ka ûkhacaköuâ kolon tavat, me hunuma hnyi taun, me hûgûnâ e: wâ oge nye hûgûnâ bi nya, me adre me hwenyi ien e venyik.

²⁹ Ke Davita ame ûkhacaköuâ tavat hia thithö, me he Rama ai, me vat mē, me hûgûnâ e.

³⁰ Ke e ame hom koronainy anyidrin than ûnyi hnyi hon ban; ke haba ihmakiny me khaca talan gol, ke e hnyin je veto ae gan hwaban; ke adre me ip hnyi hon bö Davita bi. Ke e ame hom but je ûnyi adre sö ûnyi hnyi taun, ae ti gan hmâ.

³¹ Ke e ame hom but tavat ûheny hnyi taun, me ip odrin hmelen je gili, me je fao ae ûdö, me je giwa fao, me odili ödrin hnyi hna leû veto kânâ: ke e ame ânyâ helâe ka je taun hia anyin lakon Amona. Ke Davita me tavat hia ödrin e hmetu Jerusalema ai.