II. Samuela 11 - Iaai Bible 1901 (New Caledonia)

¹ KE ame o hmetu but huna a ûen ame labö he je than he ka vat hnyin, me haba Davita ame kunö Joab me lakeiny unyin, me Isaraela hia; ke ödrin e ohia lakon Amona me thelöng Raba. Ke Davita ame laba hnyi Jerusalema.

² Ke haba hnyi sahac Davita ame todrö ûheny hon hnen hna mokut, me ngenu hon uma umen than: ke e ame wâ ûnyi hnyi hon uma ke momo ame soû; ke e te hmanenang momo at ka wâ.

³ Ke Davita ame ûkhûnöng he ka hnei ge momo. Ke haingen ke at, ka habe, hawa, ca Bathe-seba e a nöku Eliama, öiö Uria at Heth?

⁴ Ke Davita ame kunâ je ûthumetu me hom e; ke e ame he kâu, me e ame tha mokut mē; (anyin ae bo so but ûheny hnyi hna bo kong;) me e ame hmetu ka hnyi umen uma.

⁵ Me ame erkin dut momo, me e ame ûkhûnöng he ka thumetu Davita, ka habe, Iny erkin dut.

⁶ Me haba Davita ame ûkhûnöng kö Joab, ka habe, Kunö Uria thö jem at Heth könya. Me Joab ame kunö Uria kö Davita.

⁷ Ke ame o but Uria kâu, me Davita ame hnö, ka habe, Hawa ga Joab, ke hawa ge tavat, ke hawa ge vat?

⁸ Haba Davita ame ha kö Uria, ka habe, He thö ka hnyi umâm uma me hneû li cam. Ke ame didrut Uria ûheny hnyi uma umen than, ke adre me kunâ kâu ujeû ûnyi ge than.

⁹ Ke Uria ame mokut hnyi hwanumen uma umen than tha e me lathnyabainy tuhan hia, ke a ca he ju ka hnyi umen uma.

¹⁰ Ke ödrin e hia but thumetu Davita, ka habe, A ca he bi Uria ka hnyi umen uma, me haba Davita ame ha kö Uria, ka habe, U je ca o bi ûhem hnyi hna he? ieû u je ca he gan ka hnyi umâm uma?

¹¹ Haba Uria ame ha kö Davita, ka habe, Ame laba tang hnyi je uma menâ, me Isaraela, me Juda; ke Joab a, tuhok, me lathnyabainy tuhok, ödrin e hunuma hnyi hnyei; ke hawa oge me he ka he ka hnyi umök uma he ka han me ic me tha mokut me öiök? kia inya u, ke kia inya hanom, a oge me ca he ka ânyâ ûnyi eling.

¹² Ke Davita ame ha kö Uria, ka habe, Me laba hmetu ju hnyi bong ang, ke nyi oge me he ka kunö u. Ke Uria ame laba hnyi Jerusalema hnyi bong eling me nyi.

¹³ Ke a hia but hawâ e Davita, me e ame tha han me ic mē; ke e ame habelen me me monu but: ke hnyi sahac e ame didrut he ka mokut hnyi hnen hna mokut tha e me lathnyabainy than, ke a ca he bi ka hnyi umen uma.

¹⁴ Ke hnyi hnyomakatu Davita ame sihnalimen tusi kö Joab, me kunâ e hnyi hnyamö Uria.

¹⁵ Ke e ame sihnalimen hnyi tusi, ka habe, Ip Uria ju cicö dok adre vat hwege hnyin, me hna but e, mʼ adre me kot, me me mokcu.

¹⁶ Ke hnyi ûen Joab ame hmâkâ taun, me e ame kunö Uria ka hnyi dok cicö hnen hna khana ae hu tavat hwege hnyin.

¹⁷ Ke ame didrut tavat hnyi taun, me vat me Joab; ke ame ta but ke je hnyat, wale je lakei Davita; ke ame mokcu minya Uria at Heth.

¹⁸ Ke haba Joab ame ûkhûnöng he ka thumetu Davita ge ta je ûnyi hia thithö hnyi vat;

¹⁹ ke e ame hûna ka ûthumetu, ka habe, U ka hia but thumeto than ge ta je ûnyi hnyi vat,

²⁰ ke ame ne hmonyin than, me e ame ha köu, ka habe, Ieû gabun öbun e hakekeny ka hnyi taun he ka vat? e ca khanʼ öbun a ödrin e he ka fana ûnyi hnyi hon hna up hagin?

²¹ ia kuc Abimelek nöku Jerubeseth? ca hnen ke momo a khûâ veto hnân oamamâ hwit hon ûnyi hnyi hon hna up hak veto, me e ame mokcu hnyi Thebez? ieû gabun öbun e hakekeny ka hnyi hna up haginy? awe, u me he ka ha, ka habe. Ke a mok minya ju athnyabaem jia Uria at Heth.

²² Me ame he ûthumetu, me o, me omanenâ kö Davita je hofuc hia ho Joab.

²³ Me ame ha ûthumetu kö Davita, ka habe, E hwege huhmun tavat, ke adre me o kohmun ka hnyi hnyei, me ohmun e he kodra ke ne o but ka hnyi homagouleny taun.

²⁴ Ke haba hnyat fana ödrin e fana lathnyabaem ûnyi hnyi hon hna up hak veto; kʼ ame mokcu ke je lathnyabainy than, me a mok minya lathnyabaem jia Uria at Heth.

²⁵ Me Davita ame ha ka ûthumetu, ka habe, U me he ka thu kö Joab, ka habe, U me ca he ka vec ûnyi hnyi ûnyi e, anyin a haba hele vat ame han monu: hwege thö ânyâm vat ka hnyi taun, me kot: ke u me he ka sihwegiâ.

²⁶ Ke a long ut öiö Uria a ga mokcu âiân a Uria, me e ame tenge can âiân.

²⁷ Ke e a hia but tenge, me haba Davita ame ûkhûnöng he ka hom e ka hnyi umen uma, ke âiân dö e, kʼ ame hnokoâ nokon a da. Ke kong kö Iehova ûnyi eling a ânyâ Davita.