II. Samuela 1 - Iaai Bible 1901 (New Caledonia)

¹ KE hwaban mok anyi Saulo, ke a hmetu Davita ûheny hnyi hna kot at Amaleka, ke lo li bong Davita ame laba hnyi Zikelag;

² me haba hnyi bong a kuniny, wâ bi, ame o but ke at ûheny hnyi hna hunuma unyi Saulo ae khekhe anyin je ûkhaû, ke e hu kânâ hon ban: ke e ame o but kö Davita me e ame ta hnyikânâi me khudrung.

³ Me haba Davita ame ha kau, ka habe, U je mwi ua? Haingen, ka habe, Oge kec möt ûnyi hnyi hna hunuma anyin Isaraela.

⁴ Ke haingö Davita kâu, ka habe, Hawa bongon? Ö u thumetu nya thö. Ke e ame thu, ka habe, A kec dö tavat ûnyi hnyi vat, ke se hia tavat a ta me mokcu; ke a mokcu minya Saulo me Jonathana a nokon.

⁵ Ke Davita ame ha ka hidröu at ame thumeto e, ka habe, Hawa, a kâmâu ka khanö u a ga mokcu Saulo me Jonathana a nokon?

⁶ Me ame ha hidröu at ame thumeto e, ka habe, Inya o ge me he hon bucen Gileboa, ke wâ bi, Saulo ame tot inyifâlâ dân ö; ke wâ bi, je kariota me tavat tabö hors adre me hnu hwegiâ e.

⁷ Ke e ame hwio me ō nya, me hawo nya. Ke haingök dö, Inya ang.

⁸ Haingen könya, ka habe, U ia? Ke oge me thu kaû, ka habe, Iny at Amaleka.

⁹ Me e ame ha könya, ka habe, Ö u todru huk me hlingö nya, anyin ame o but könya hmak; can ae tiga bekhöt möt eû hnyik.

¹⁰ Me oge me tot hon, me hlingâ, anyin a oge wâ but a ga me ca he bi ka möt hwaban hnen hna ta but: ke oge me hom korona ûnyi hnyi hon ban, me waen hnyi benyin, ke oge me hom jem ka tuhok.

¹¹ Ke Davita ame kât anyin je ûkhaû, me kia, ke helâe minya tavat hia unyin:

¹² ke ödrin e tenge, me tenge gan hmâ, me ca han ke ne o but sahac, ca Saulo me Jonathana a nokon, me tavat anyi Jehova, me lap anyi Isaraela; anyin a ödrin e ta but ge hele vat.

¹³ Ke Davita ame ha ka hidröu at ame thumeto e, ka habe, U at ua? Haingen ka habe, Iny nokon atkanyua a at Amaleka.

¹⁴ Ke Davita ame ha kâu, ka habe, Ieû gam a u ca ot he ka hinobenyom ka at Iehova ame hû?

¹⁵ Ke Davita ame hawâ ke hidröu, me ha, ka habe, Hakekeny ju me hlingâ. Me e ame kot moko e.

¹⁶ Ke Davita ame ha kau, ka habe, Ame he drâm ka mokut bi ka hnyi hon bâm; anyin a u je haiö u bi ge hnyimâm, ka habe, Oge me hia but hlingâ at Iehova ame hû.

¹⁷ Ke Davita ame tenge ge utengien eang ca Saulo me Jonathana a nokon:

¹⁸ ke e ame hûna ködrin he ka nâ lakon Juda ge utengien cafana: wâ bi, adre sihnalimen e hnyi tusi Jasar; ka habe,

¹⁹ Isaraela lo, adre hlingâ hmanenangâm hnyi je dok ae görany unyâm! Ekölö a ta but tavat ae hwege!

²⁰ Ca he ka thumetoâ hnyi Gatha, Ca he ka khetâ e hnyi je getheniny Asekelona; Wâ e nye senyin wahlu lakon at Filisiti, Wâ e nye hobâ wahlu lakon tavat adre ca peritomonâ.

²¹ E, öbun je bucen hnyi Gileboa, E so ame ca ta hubun dân hau me we, ke ba je utkânâ hnân hut: Anyin adre degecâ eling becin at ae hwege me me kong ut, Bec anyi Saulo, helâke adre ca hû ge wakaco.

²² Ame ca hwio cafana anyi Jonathana, Kʼ ame ca hmetu baû hele vat anyi Saulo Ûnyi hnyi dren hna hlingâ, me ûnyi hnyi pipikhenyainy tavat ae hwege,

²³ E tha so me hmanenang Saulo me Jonathana hnyi anyidru möt, Ke adre ca oûsâkâûʼ ödru hnyi mok; Ödru logot hon je aeto, Ödru hwege hon je liona.

²⁴ Wahlu laku Isaraela lö, tengiö Saulo, At ame khaûʼ öbun ge ûnyi ae dra hnân omecâ, At ame ip je omjehen gol hnyi je khaû-öbun.

²⁵ Ekölö a ta but hnyi wanben vat tavat ae hwege! Adre hlingö Jonathana hnyi je dok ae görany unyâm.

²⁶ Iny hlöuhlöu gam Jonathana liamekeiny mönya: E gan hmâ ânyâm mec könya: Hnân lâiâ ânyâm ibetengiö könya, E beönua hon betenge anyin omomo.

²⁷ Ekölö a ta but tavat ae hwege, Ke a hia but je ûnyi hnân vat!