II. Peteru 3 - Iaai Bible 1901 (New Caledonia)

¹ HNYAT a oûnykûmik lö, walang tusi a loiny inya oge me sihnalimen köbun; ke haba hnyi li tusi a lo hia, me oge me sihwegiâ je hnyekubun ae hnathu me oûnykûmi öbun;

² mʼ öbun e he ka ûnykûme thö ta je hofuc a bân hwan ta je perofeta ae kap, me hnanyibu anyin Than At ûhomeli a deny anyibun ta je aposetolo:

³ a böbun he ka wâhmakhmeto ûnyi eang a haba hnyi ta je bong a biliny, me ame he ka o tavat ûhiö me ûhlumöny, kʼ adre me he ka he hoton ta je wedra bi ae kong,

⁴ me ha, ka habe, Ewa hna ha bânâ a gʼ ame he ka o? anyin a hwân dö hnyi ûen mokut a lakamöta adrem, me ame tethmâ bala ta je ûnyi hia thithö, waleji hwân hnyi hna op ta je ûnyi hia.

⁵ Anyin ae wedra bi he ka hnying ûnyi eang, ka habe, walethö drany kâû adrem, me hmeledrany minya, waleji adre tretraoâ ge köiö ke ûnyi hnyi köiö hnen hofuc hwan Khong;

⁶ ke can e haba uoû ame ohia hmeledrany waleji adrem:

⁷ ke haba drany me hmeledrany walang ang, me adre hia but ip ûnyi ge hofuc eling hnân hobi kâu meic, kʼ adre me ip bi ke ne o but hnyi bong owisa me hnaûhango anyin tavat ae ca ûcû hwakecidra me Khong.

⁸ Hnyat a oûnykûmik lö, ca he öbun ka hnying hofuc ang a khaca, ka habe, haba hnyi hnyimakan Than, me bong a khaca helâ me wan thauzan ta je huna, ke haba ta je huna a wan thauzan, me ûcû thibi me bong a khaca.

⁹ E ca bec bi Than hnyi hnen hna ha bânâ, helâ me ûnykûmenen keihen, ka habe, e bec; ke e ame hok hnyoki öbun beû hmâ, e ca weny bi ame he ke at ka hnaûhango, ke so bi adre me he hia thithö ka ietra.

¹⁰ Ke ame he ka o bong bonginy Than helâ me at venöu; ke ame he ka hia drany me hmuhmu ae gan hmâ hnyi bong eling, ke ame he ka köiö but ge kahwa ae gan hmâ ta je ûnyi hia thithö, ke adre me he ka thong degecâ minya hmeledrany me ta je ûnyi adre huliwan hnyin e.

¹¹ Ke can ame he ka hia ta je ûnyi e, me ieû hwakecin ae ûcû köbun? hawa e ca so öbun e he ka tavat ae hnathu hnyi hwakecin ae kap me hwakecin ae ûcû me Khong,

¹² me tavat halubahingen me webun he ka o but bong bongon Khong, wale ame he ka thong drany me me he ka oköiâ e, ke ame be ka köiö but ge kahwa ae gan hmâ ta je ûnyi hia thithö?

¹³ Ke hoton hnen hna ha bânâ, ate me halubahingen drany a teb ûnyi me hmeledrany a tebûnyi, wale ame he ka laba hnyin hwakecin ae wisa.

¹⁴ Anyin a wale, hnyat a oûnykûmik lö, haba öbun tavat öbun e halubahingen ta je ûnyi e, hwege thö, mʼ adre me ö ʼbun dö hnyi ûsoköu ae ba hnyikongon me hnân haikongu öbun hnyi hnyimakan.

¹⁵ Ke ûnykûme ju öbun a haba hok hnyok beû hmâ anyin Tuhöta me wale möt, helâ me hna sihnalimen köbun ga Paulo liamekeiny mʼ öta a oûnykûmita, hoton metâ adre ham kâu;

¹⁶ ke helâe hnyi anyin ta je tusi ame ha hnyin ta je ûnyi e; ke wale thibi e ke je hofuc ae hmak he ka wâ tremângâ, adre wia hnen tavat adre ca nâ me tavat loloâ, helâe minya ke je hna sihnalimen, mʼ adre me ka ohnaûhangʼ ödra bi.

¹⁷ Anyin a wale hnyat a oûnykûmik lö, ö ʼbun âu, anyin ae khanʼ öbun dut ehac wâ öbun nye ta hnyi hnobun hna tet hmâ e, e ka lili öbun ge monu anyin tavat ae monu.

¹⁸ Ke hûhûö thʼ öbun hnyi ibetengiö baû me wâhmakhmetoâ Tuhöta At ûhomeli, a Iesu Keriso. E unyin hmanenang walang ang me nyiele balua. Amen.