II. Peteru 1 - Iaai Bible 1901 (New Caledonia)

¹ INYA Simona Peteru athnyaba me aposetolo anyi Iesu Keriso, oge me sihnalimen ka tavat ae hu gadra labageju ae ûnyi hnathu helâ mʼ öhmun hnyi hwakecin ae wisa unyin Khonguta me At ûhomeli a Iesu Keriso:

² e so adre osehia unyibun ibetengiö baû me ûsoköu hnyi hna wâhmakhmetoâ Khong me Iesu Keriso a Tuhöta;

³ anyin a e ame hia but ham köta ta je ûnyi hia hnyi möt me hwakecin ae ûcû me Khong, hnen maniny man, ûnyi ge hna wâhmakhmetoâ e, at ame ha öta ge anyin hmanenang me hnyok so;

⁴ ke can thibi e, e ame ham köta ta je hna ha bânâ ae ûnyi hnathu me gan hmâ hmonyin; mʼ öbun e he ka hnyi vheno hwakecin Khong, hnen e, öbun tavat kec ge hwakecin ae kong eang hmeledrany ûnyi ge weny Khong.

⁵ Eke, can thibi e, e so öbun e he ka ti hwege hnyi je huliwa hia, me bi hanen hnyok ae so ka hnyi anyibun labageju; me bi hanen metâ ka hnyi hnyok ae so;

⁶ me bi hanen hom ûhnyûkongo ka hnyi metâ; me bi hanen hokhnyok ka hnyi hom ûhnyûkongo; me bi hanen hwakecin ae ûcû ka Khong ka hnyi hokhnyok;

⁷ me bi hanen hnyokâ hnyat me lakeiny ka hnyi hwakecin ae ûcû me Khong; me bi hanen ibetengiö ka hnyi hnyokâ hnyat me lakeiny.

⁸ Anyin a ne e unyibun ta je ûnyi e, kʼ ame ne se, me wale ame he ka wiʼ öbun mʼ öbun e ca hnyat baû bi, ke ca hnyat bi adre me ca wâ, hnyi hna wâhmakhmetoâ Tuhöta Iesu Keriso.

⁹ Anyin a wadröu but at ae ca tren ta je ûnyi e, ke hadedak, kʼ ame hnying hna obosoâ ûnyi hnyi anyin ta je hulo ehac.

¹⁰ Anyin a wale, hnyat me lakeiny lö, hwege thʼ öbun he ka ohwâdâ hna hawʼ öbun, ke hna ûcʼ öbun: anyin a öbun e ne ânyâ balua ta je ûnyi e me öbun e ca he balua ka thö:

¹¹ anyin a helâe adre me he ka ti hnʼ öbun he ka dit ka hnyi dokhu ame ca ba balua a dokhon Tuhöta At a omeli öta, a Iesu Keriso.

¹² Anyin a wale oge me he ka laba penapena he ka oûnykûmi öbun ge ta je ûnyi e, ke so bi e khanʼ öbun, me tethmâ hnyi hnathu e unyibun.

¹³ Ke inya oge me ûnykûme ae so könya he ka sihwegi öbun ge hnok hna oûnykûmi öbun, e me tiga inya hnyi uma menâ eang;

¹⁴ e khanö nya ae logot oge me he ka uny degecâ but umök uma menâ, helâ me hnen Tuhöta Iesu Keriso hna omanenâ könya.

¹⁵ Eke oge me he ka hwege huliwa me me khanʼ öbun ûnykûme bala ta je ûnyi eang, iny ka mokcu.

¹⁶ Anyin a öhmun e ca hnu hoton ta je vekhet thoi anyin tavat ae metâ, waleji hnyi ûen öhmun e omanenâ köbun man me ioiny Tuhöta Iesu Keriso, ke öhmun e hnyi wâ anyin hmanenang.

¹⁷ Anyin ae hu but gan ûnyi ge Khong a Kamen hna ogânâ me hmanenang, waleji ame o kâu hwan hofuc ûnyi hnyi hmanenang ae nua, ame ha, ka habe, Walang Nokuk a oûnykûmik oge me senyin kâu:

¹⁸ ke öhmun e hnyi löng hofuc e ûnyi hnyi drany, waleji ke tiga öhmun unyin hnyi hon bucen ae kap.

¹⁹ Ke e hu but gahmun hofuc adre perofeta adre ti ohnathoâ; ke so öbun e ûnykûme wia ka hnyin, helâ me ka lamepa ame umumelam hnyi dok ae lit, ke ne o but hnyi haolany, ke ame o thö okhû lany eû hnyi je hnyekubun:

²⁰ ke öbun e wâhmakhmetoâ a bân, ka habe, haba je hna perofeta hia thithö hnyi hna sihnalimen, me, ame ca manen baû bi.

²¹ Anyin ame ca o ke hna perofeta ehac ûnyi hnyi weny at, ke ame ha tavat ûnyi ge Khong, ke a huliwan je hnyekudrin hnen Hanu Kap.