II. Korinito 9 - Iaai Bible 1901 (New Caledonia)

¹ ECA ûnyi hnathu könya he ka sihnalimen köbun hwakecin huliwa ka wakap:

² anyin ae khanö nya hnyekubun ae beweny, wale oge me hobeluâ gabun hnyin ka at Makedonia, ka habe, adre hia but penapena hnyi Akaia ehac a khaca but huna; ke ame huliwan hnyekon tavat ae se hia hnen hnyekubun ae kahwa.

³ Ke oge hia but kunâ je liamekeiny, wâ e nye unyi baû hnöhmun hna hobeluʼ öbun hnyi ûnyi eang; mʼ öbun e he ka penapena helâ me hnok hna ha:

⁴ wâ oge nye o me keihen at Makedonia, me wâ a ga ca penapena ju öbun, me öhmun e he bi ka hmehma (ke ti e bi gabun) hnyi hna hobeluâ eling.

⁵ Anyin a wale oge me ûnykûme ae ûnyi hnathu he ka khöû ka ta je liamekeiny he ka bodrin köbun me penapena ta je ûnyi hnyi anyibun ibetengiö, waleji öbun e ha bânâ ehac, mʼ öbun e he ka penapena e, helâ me ûnyi hnyi ibetengiö, ke ca helâ bi me hna behânâ.

⁶ Ke wale minya eang, haba at ame tā ûhnyûkongoâ, me ûhnyûkong minya hnen hna meno; ke haba at ame tā gânâ, me gan minya hnen hna he ka meno.

⁷ E so he ka ve ham hoton hna thamuâ eû hnyi hnyok; ca hnyi hnyok ae hmak, me hna muso minya: anyin a Khong ame hnyokâ at ame ham senyinâ.

⁸ Ke e khana Khong he ka ogânâ thö köbun ibetengiö baû hia; mʼ öbun e he ka widrany gan hmâ bala hnyi ta je ûnyi hia, mʼ öbun e he ka si hnyi ta je huliwa hia ae so:

⁹ helâ me hna sihnalimen, ka habe, E ame ham bâûâ, me ham ka je theduoc; Ke tethmâ nyiele balua hwakecin ae wisa gan.

¹⁰ Ke haba at ame ham hatong ka at ame tā, me jeû hnân han, me e ame he ka ham me osehia wan hnobun hna tā, me ogânâ minya wan hwakecibun ae wisa:

¹¹ ame otreni öbun ge omjeû hnyi ta je ûnyi hia, mʼ öbun e hnyi ham gânâ but, wale hnân okûâ ole ka Khong ûnyi gahmun.

¹² Anyin a haba hna huliwan huliwa eang, me ca walang he ka ûcû ka wakap thibi, kʼ ame bi hanen minya ole ae gan hmâ ka Khong;

¹³ anyin adre me ogânâ Khong hnyi haten huliwa eang, me hnyi hnobun hna long hoton uthumetu ae so anyin Keriso, wale öbun e hom, me hnyi ibetengiö ae gan hmâ kodra me tavat hia;

¹⁴ ke adre me hnyok gan hmâ köbun ûnyi hnyi ibetengiö baû anyin Khong ae ti gan hmâ unyibun, ke adre me hic hobi köbun.

¹⁵ Ole ka Khong ge anyin bwihlany ae ca khanʼ öta ha hia.