II. Korinito 7 - Iaai Bible 1901 (New Caledonia)

¹ HNYAT a oûnykûmik lö, e hu but unyita ta je hna ha bânâ eling, anyin a wale, e so ate me he ka ânyâwiʼ öta bi ûnyi hnyi ta je ûnyi ae ikiki hia hnyi unyin me hanu, he ka obekhötâ hwakecin ae kap hnyi ot ka Khong.

² Köp öhmun dʼ öbun: e ba at öhmun e hwali kâu, e ba at öhmun e okongoâ, e ba at öhmun e iyawöâ.

³ Oge me ca ha e hnân hângʼ öbun: anyin oge hia but ha köbun ehac, ka habe, öbun eû hnyi je hnyekuhmun he ka tha mok me tha möt.

⁴ E gan hmâ hnok hna fuc hwege köbun, ke gan hmâ hnok hna hobeluâ gabun: inya at ae unöngöt ge kahwa, oge me ti sēnyin gan hmâ hnyi anyihmun ta je vec hia.

⁵ Anyin a waleji hnyi hnöhmun hna o but hnyi Makedonia, ame ca menâ bi je unyihmun, ke öhmun e vec hnyi ta je ke keihen hia; e hu vat hnyi hoton, ke ot eû hnyin.

⁶ Ke haba Khong, at ame okahwa tavat adre me ohnyikönʼ ödra bi, me e ame okahwʼ öhmun ge ioi Tito;

⁷ ke ca ûnyi thibi ge ioiny, ke so bi hnen kahwa Öbun e okahwa e kâu, ke a thumetu öhmun ge webun ae tethmâ, me anyibun tenge, me hnyekubun ae kahwa könya; wale me me ti gan anyik sēnyin.

⁸ Anyin a eja ke ne oge ne oveci öbun ge anyik tusi, oge me ca ietra bi, ke so bi oge me ietra ehac; anyin oge me wâ, a gʼ ame oveci öbun tusi e, ke hnyi ûen thibi a khaca.

⁹ Ke walang ang inya oge me sēnyin, ca anyin adre ohmakâ hyekubun, ke anyin adre ohmakâ je hnyekubun ke ne o but ka hnyi ietra: anyin adre ohmakâ je hnyekubun helâ me ûcû ka Khong, mʼ öbun e ca kong bi ûnyi gahmun hnyi ke ûnyi.

¹⁰ Anyin a haba hmak hnyok ae ûcû ka Khong, me wale at ame okûâ ietra ke ne o but ka hnyi möt, haba ietra eling, me ca hnân ietra hmetu: ke haba hmak hnyok ûnyi eang hmeledrany ame okûâ mok.

¹¹ Anyin a wâ ju öbun ûnyi eang waleji e hmak hnyekubun hoton ae ûcû ka Khong e ame okûâ hna wâ wia unyibun, me ivinö, eke, me haiwisai öbun eke, me kong hnyekunâ, eke, me ot, eke, me weny ae gan hmâ, eke, me hnyok ae kahwa, eke, me bi hwaban! Haba hnyi ta je ûnyi hia öbun e hia but omanenʼ öbun bi ae ba anyibun hulo hnyi ûnyi eang.

¹² Ke haba hnyi hnok hna sihnalimen köbun, me ca hake hobi kâu bi at ame mâdrâ monu, ke ca hobi kâu minya bi at adre me monu kâu, ke so bi me me manen dut köbun hnyi hnyimakan Khong a öbun e kong hnyekuni öhmun.

¹³ Anyin a wale adre ti okhawʼ öhmun: ke haba hnyi kahwa a öhmun, öhmun e sēnyin gan hmâ hnyi sēnyin anyi Tito, anyin ame okahwa hnyekon ûnyi gabun hia.

¹⁴ Anyin a ne hu hnok hna ohobeluâ kâu ûnyi gabun, iny ca hmehmâ bi; ke öhmun e ha ta je ûnyi hia köbun hnyi hnathu, helâe minya adre wâ ae hnathu hnöhmun hna ohobeluâ, waleji oge ânyâ hnyi hnyimakö Tito.

¹⁵ Ke e ame ti hnyok gan hmâ köbun, me ûnykûme anyibun ûling hia, me hnobun hna ot, me öbubuny hnyi hna kap e.

¹⁶ Inya oge me sēnyin anyin adre sihwegiâ hnyekuk gabun hnyi ta je ûnyi hia thithö.