II. Korinito 5 - Iaai Bible 1901 (New Caledonia)

¹ ANYIN ae khanʼ öhmun a ga ne kia but umöhmun uma menâ eang hmeledrany, me hu bi gahmun uma ûnyi ge Khong, wale uma adre ca mâdrâ bi ge hnyam, ame ca ba balua, ke ethö hnyi drany.

² Anyin a öhmun e mâng hnyi uma eang, ke ti wehmun he ka khaû öhmun ge umöhmun uma ethö hnyi drany:

³ öhmun e ne khaû, mʼ adre me ca ö ʼhmun bi öhmun e he thu.

⁴ Anyin a haba öhmun hnyi uma menâ eang, öhmun e mâng, ke hmak; ca anyin ae wehmun he ka uny jut, e so bi mʼ adre me khaûʼ öhmun, me me utâ but mok hnen möt.

⁵ Ke Khong at ame up öhmun hobi kâu e, waleji at ame ham kohmun haten Hanu.

⁶ Anyin a wale e hwege bala hnyekuhmun, ke khanʼ öhmun, ka habe, e ka tiga öhmun hnyi unyin, e hiʼ öhmun unyin Than

⁷ (anyin a öhmun e he hnen labageju, ke ca hnen bi hna wâ);

⁸ öhmun e hwege hnyok, me wehmun he ka hia but hnyi unyin, me tha öhmun unyin Than.

⁹ Anyin a wale öhmun e hwege nâ he ka osenyinâ e bi, a ne öhmun dut eang, ame ne hiʼ öhmun.

¹⁰ Anyin adre me he ka omanenʼ öta hia hnyi hnyimakan taben owisa anyi Keriso; mʼ ate me he ka ve kap ta je ûnyi ate ânyâ hnyi unyin, hoton hna ve ânyâ, ame ne so, ame ne kong.

¹¹ Anyin ae khanʼ öhmun ûnyi hnân ootâ unyin Than, wale me öhmun e ûjeogö tavat, ke öhmun e manen dut ka Khong; ke ogeʼ me ûnykûme a öhmun manen dut minya hnyi je ûnykûmenöbun.

¹² Ohmun e ca haisoi öhmun hmetu bi köbun, ke so bi, helâke öhmun e ham köbun ûnyi hnân hobeluâ gahmun, me me hu gabun hnân thu kodra adre me hobeluâ hnyi hnyimak, ke ca bi eû hnyi hnyok.

¹³ Anyin a öhmun e ne monu, me hobi kâu Khong; ke öhmun e ne metâ, me hobi köbun.

¹⁴ Anyin ame musi öhmun ibetengiö anyi Keriso; anyin a walang ang ûnykûmenöhmun, a gʼ ame mok ke at hobi kâu tavat hia, awe, a mok hia;

¹⁵ ke e ame mok hobi kâu tavat hia, mʼ adre me ca he hmetu ka möt kodra bi tavat ae möt, ke so bi kâu at a mok me möt hmetu thö hobi kodra.

¹⁶ Wale me öhmun e hwân walang ang a öhmun e ca he ka wâhmakhmeto ke at hoton unyin: eja ke ne öhmun e hia but wâhmakhmeto Keriso hoton unyin, ke so bi walang ang öhmun e ca he ka wâhmakhmeto hmetu bi e helâe.

¹⁷ Anyin a wale a ne e but ke at unyin Keriso, e at adre teb op; e hia but ta je ûnyi adrem; ke wâ bi, adre ohâtâ ta je ûnyi.

¹⁸ Ke ûnyi ge Khong ta je ûnyi hia thithö, at ame öûsoköu öta më a deny Iesu Keriso, ke ame ham kohmun huliwainy ûsoköu;

¹⁹ waleji, a e unyin Keriso bi Khong, ame öûsoköuâ hmeledrany më, kʼ ame ca ip hnödra je hna hanyâûâ kodra bi, ke ame ham kohmun hofucin ûsoköu.

²⁰ Anyin a wale, öhmun je metâ anyin Keriso, helâke Khong ame khöû ûnyi gahmun: ke öhmun e sumatʼ öbun, hobi kâu Keriso, ka habe, ûsoköu öbun ju me Khong.

²¹ E, at eji ae ca khana bi monu, e ame wia e me me monu hobi köta, mʼ adre me he ka wiʼ öta hnân hwakecin ae wisa anyin Khong ûnyi gan.