II. Korinito 12 - Iaai Bible 1901 (New Caledonia)

¹ E ÛCÛ könya he ka hobelöu, ke ca so bi; awe, oge me he ka ha ta je hna omenenâ me ta je hna ûthumetu ûnyi ge Than.

² E khanö nya ke aten Keriso waleji fotin je huna ehac, adre kât goranyai ka hnyi drany a kuniny, (e ca khanö nya, ame ne ûnyi hnyi unyin; ke ca khanö nya minya ame ne ca e bi hnyi unyin; e khana thibi Khong).

³ E khanö nya at helâe (ame ne e hnyi unyin, ame ne ca e bi hnyi unyin, e ca khanö nya; e khana thibi Khong),

⁴ ke adre hom dö e ethö ka hnyi Paradaiso, kʼ ame long ta je hofuc a ca hnân ha, wale ae ca ûcû ka at he ka ha:

⁵ Oge me he ka hobeluâ at a helâe: ke oge me ca he ka hobeluö nya bi, ke so bi hnyi anyik ta je sënyin.

⁶ Anyin a ne wek he ka hobeluâ, me iny ca monu bi; anyin oge me he ka ha hnathu: ke inya oge me hokhnyok, wâ e nye he ke at ka ûnykûmi nya, hon hnen hna ō nya, me ling nya.

⁷ Ke wâ adre nye ogoranyi nya bi hnen nuainy ta je ûthumetu, me adre ham könya ûdöiny unyin, wale hna ûkhûnöng hno Satana he ka kulup nya, me inye ca ti görany bi.

⁸ Ke iny okun khöû ka Than ge ûnyi eling, me me he ka ohia but gak.

⁹ Ke e ame ha könya, ka habe, E ûcû köu anyik ibetengiö baû: anyin adre obekhötâ manik man hnyi sēnyin. Anyin a wale oge me sēnyin gan hmâ he ka hobeluâ hnyi anyik je sënyin, me me tubi nya hnen man manin Keriso.

¹⁰ Wale me inye senyinâ ta je sënyin, me ta je hna okongo, me ta je hna theduoc, me ta je hna seda, me ta je vec can Keriso: anyin a iny ka sënyin, wale ûen a iny hwege hnyin.

¹¹ Iny monu but: öbun e kunö nya; anyin ae ûcû köbun he ka haisoi nya: ke eja ke ne oge ne ca ûnyi hnathu bi, ke so bi ca inya bi hmelen ta je hing aposetolo.

¹² E hnathu adre ânyâ unibun ta je haten aposetolo hnyi hokhnyok hia, hnyi je haten, me ûöman, me huliwa ae man.

¹³ Anyin a ieû a öbun hnyi hmelen keihen je ekalesia, a ca ûnyi ang a oge me ca ohmakʼ öbun? betenge ju öbun gak hnyi hwali eang.

¹⁴ Wâ bi, okuniny ju ang penapena a inya he ka he but köbun; ke oge me ca he ka ohmakʼ öbun: anyin oge me ca elâm anyibun ta je ûnyi, ke öbun bi: anyin a ca hanymen bi je lakon he ka ûkhöûnâ hobi kâu je kamen me hinyen, ke so bi je kamen me hinyen hobi kâu je lakon.

¹⁵ Ke oge me he ka sēnyin he ka ohia omjehek, me ohiö nya minya hobi kâu je hanubun. Ke oge ne hnyok gânâ köbun, hawa, ame he ka ûhnyûkong hnobun hna hnyok könya?

¹⁶ Ke so minya ju, oge me ca ohmakʼ öbun bi; ke so bi oge bibihwakecik me oge me kot öbun ge iyawö.

¹⁷ Hawa, oge me hwen iyawöâ anyibun ta je ûnyi hnen tavat waleji oge kunâ köbun?

¹⁸ Oge sihwegiö Tito, me kunâ e me ke liamekeiny. Hawa, ame hwenenâu Tito auyibun ta je ûnyi? hawa ohmu me ca he hnen Hanu a khaca? ke hnyeûca a khaca?

¹⁹ Öbun e ûnykûme ang a öhmun e ka owisʼ öhmun bi köbun. Ohmun e ha unyin Keriso hnyi hnyimakan Khong. Hnyat a oûnykûmik lö, hnân okahwʼ öbun ta je ûnyi hia.

²⁰ Anyin a oge me ot, wâ oge nye o but köbun me ō ʼbun a ca helâ me hnok hna wek, ke wâ öbun nye ö nya a ca helâ me webun; wâ e nye hu ihunyinköu, me wathethot, me iwatretra, me bi fuco, me ûhaiö, me imediököu;

²¹ wâ e nye he Khonguk ka ohnyikönö nya unyibun, hukâ o hmetu, me oge me he ka tengiâ tavat ae se hia, a tavat adre me mâdrâ hulo, kʼ adre ca ietra hwakecidrin ae ikiki, ke bi ûnyi monu, ke wagelue adre me ânyâ.