II. Je Than 8 - Iaai Bible 1901 (New Caledonia)

¹ KE a hia but Elisaia fuc ka momo waleji e ame omelö nokon, me ha, ka habe, Todrö, me u me he, me ânyâm lap, me laba kanyua hnyi hnâm hna he ka wâ: anyin a hia but hawâ hmiâ ga Iehova; kʼ ame he ka o minya hnyi hnyei ke ne o but hnyi seven je huna.

² Me haba momo ame todrö, me ânyâ helâ me hna ha ge aten Khong: me e ame he me anyin lap me laba kanyua hnyi hnyei iny at Filisiti ke ne o but hnyi seven je huna.

³ Ke hwaban je huna a seven, haba momo ame hmetu ûheny hnyi hnyei iny at Filisiti: ke e ame he me tenge ka than can umen uma me iny hnyei.

⁴ Ke haba than ame ûhnenamö me Gehazi a athnyabainy aten Khong me ha, ka habe, Me thumetu nya ge ta je ûnyi ae gan ame ânyâ Elisaia.

⁵ Ke e ame tiga omanenâ ka than hnen hna omelö at a mokcu, ke wâ bi, wale momo a omelö nokon ame tenge ka than can umen uma me iny hnyei. Me haba Gehazi ame ha, ka habe, Than a tuhok lö, wale but ang momo, ke wale but ang nokon waleji a omelö ga Elisaia.

⁶ Me haba than ame hnö momo, me e ame thumeto e. Me haba than ame kunâ ke athnyaba, me ha, ka habe, Ham hmetu thö ka momo anyin ta je ûnyi hia, me troban iny hnyei hia, hwân hnyi bong a hna hnyin momo hnyei ke ne o but walang ang.

⁷ Ke haba Elisaia ame he Damaseko ai; ke a mok Ben-adada than Suria; ke adre me thumeto e, ka habe, A o but ang aten Khong.

⁸ Haba than ame ha kö Hazaela, ka habe, He thö ka hom bwihlany me ûkhanö me aten Khong, me hnö unyi Iehova a deny, me ha, ka habe, Hawa oge me he ka möt ûnyi hnyi mok ang?

⁹ Me Hazaela ame he ka ûkhanö mē, me hom bwihlany, a ta je ûnyi ae so hia ûnyi hnyi Damaseko, kʼ ame hijen ta je kamela a fâte, me e ame he me tot hnyi hnyimakan me ha, ka habe, A kunö nya köu Ben-adada a nokom, than Suria he ka ha, ka habe, Hawa, oge me he ka möt ûnyi hnyi mok ang?

¹⁰ Haba Elisaia ame ha kâu, ka habe, He thö ka ha kâu, ka habe, U me he ka möt; ke so bi a hia but Iehova omanenâ könya a e ame he ka mokcu.

¹¹ Ke e ame wâ hmâ e ke ne o but e ame hmehma but; me haba aten Khong ame tenge.

¹² Haba Hazaela ame ha, ka habe, Tuhok lö, ieû u me tenge gan? Me e ame thu, ka habe, Anyin ae khanö nya ûnyi ae kong u me he ka ânyâ ka lakon Isaraela: haba anyidrin ta je hnabâ u me he ka thong ge meic, me u me he ka hlingâ ge hele vat ta je hidröu unyidrin, me sa degecâ lakudrin je mendreng, me kave je erkin gadrin.

¹³ Me haba Hazaela ame ha, ka habe, Ie inya a athnyabaem, a kuli, mʼ oge me he ka ânyâ ûnyi e ae gan? Me Elisaia ame thu, ka habe, A hia but Iehova omanenâ könya a u me he ka than Suria.

¹⁴ Ke e ame he but ûnyi ga Elisaia me o unyin tuhan; me e ame hnö e, ka habe, leû a ha köu Elisaia? Me e ame thu, ka habe, E ame ha könya a u me he ka möt.

¹⁵ Ke haba nyi e ame hom mano tubwiny hna mokut, me hûlûlûâ hnyi köiö me lau e hon hnyimakan, me e ame mokcu: ke ame than biju Hazaela hwaban.

¹⁶ Ke haba hnyi huna a thabûngi Jorama nöku Ahaba than Isaraela, ke Jehosafata than hnyi Juda, me ame hwân Jorama nöku Jehosafata than Juda he ka than.

¹⁷ Ke e ame hwân he ka than, ke thote tu je hunainy; ke e ame musi hnyi Jerusalema eit je huna.

¹⁸ Ke e ame vheno gethen deny je than Isaraela, helâ me hna ânyâ hnen lap anyi Ahaba: anyin a âiân momo nöku Ahaba: ke e ame ânyâ ûnyi ae kong hnyi hnyimakö Iehova.

¹⁹ Ke so bi e ca we Iehova bi he ka ohia Juda, ga Davita athnyabainy, helâ me hna ha bânâ kâu he ka ham lamepa kâu, hobi kâu bala lakon.

²⁰ Ke haba hnyi bongon je bong Edoma ame hna degeci Juda, me otilö thanidrin bi.

²¹ Ke haba Jorama ame tha he Zaira ai me anyin te je kariota hia thithö: ke e ame todrö hnyi hnyinghet me kot at Edoma wale adre igigilo e, me je taben kariota, me ame kec tavat ka hnyi ʼ umödrin je uma mano.

²² Haba Edoma ame hna degeci Juda bala bi ke ne o but hnyi bong ang. Ke Libena ame hna degecâ minya hnyi ûen a khaca.

²³ Ke haba kolon je hna ânyâ hnö Jorama me anyin ta je huliwa hia, hawa, adre ca sihnalimen hnyi tusi hnân ha je bong bongon je than Juda?

²⁴ Ke ame mokut ut Jorama tha e me lakamen, me adre me konâm e tha e me lakamen hnyi taun anyi Davita: ke ame than biju Ahazia a nokon hwaban.

²⁵ Ke haba hnyi huna a twelvi Jorama nöku Ahaba than Isaraela, ame hwân ka than Ahazia nöku Jorama than Juda.

²⁶ Twente tu je hunai Ahazia me e ame hwân ka than; ke e ame than khaca huna hnyi Jerusalema. Ke haba ien hinyen jia Athalia, momo nöku Omeri than Isaraela.

²⁷ Ke e ame vheno gethen deny lap anyi Ahaba, me ânyâ ûnyi ae kong hnyi hnyimakö Iehova, helâ me lap anyi Ahaba: anyin a e ûngon lap anyi Ahaba.

²⁸ Ke e ame tha he me Jorama nöku Ahaba he ka vat me Hazaela than Suria hnyi Ramothe-gileada: ke ame aat dö Jorama ge at Suria.

²⁹ Ke haba Jorama than ame hmetu Jezerela ai he ka bi anyin hnân aat ge at Suria hnyi Rama, hnyi hnen hna vat me Hazaela than Suria. Ke haba Ahazia nöku Jorama than Juda ame he he ka ō Jorama nöku Ahaba hnyi Jezerela, anyin a e mok.