II. Je Than 3 - Iaai Bible 1901 (New Caledonia)

¹ KE haba Jorama nöku Ahaba ame hwân ka musi hon Isaraela hnyi Samaria hon huna a eitini Jehosafata than Juda, ke twelv but hunainy anyin musi.

² Ke e ame ânyâ ûnyi ae kong hnyi hnyimakö Iehova; ke so bi ca helâ me kamen, me hinyen: anyin a e ame degec veto ame tot anyi Baala a ânyâ kamen.

³ Ke so bi e ame kece ka je hulö anyi Jeroboama nöku Nebata, wale ame okûâ je hwakecin ae kong anyin at Isaraela; e ame ca saû ûnyi hnyin.

⁴ Ke Mesa than Moaba at ae tren mamoe; ke e ame fâtâ ka than Isaraela leûnen je nokon mamoe a wan haded thauzan, me je mamoe baga a wan haded thauzan.

⁵ Ke hwaban dö mok anyi Ahaba, me ame ûkhin fuc than Moaba ka than Isaraela.

⁶ Ke haba Jorama than ame he ûheny hnyi Samaria hnyi ûen eling, me hawâ at Isaraela hia thithö.

⁷ Ke e ame he me ûkhûnöng kö Jehosafata than Juda, ka habe, A hia but than Moaba ûkhin fuc könya: hawa, ötu ma tha he Moaba ai he ka vat? Haingen, ka habe, Ötu ma tha he: inya ang helâ möu, me lakeik helâ me lakem, me halek je hors helâ me halem je hors.

⁸ Ke haingen, ka habe, Ewa detu? Ke e ame thu, ka habe, Detu hnyi hnyebuba hnyi Edoma.

⁹ Me ame tha he than Isaraela, me than Juda, me than Edoma: me ödrin e he igigilo hnyi seven ta bong: ke ba köiö hobi kâu je utbavat me je meno ödrin e tha he mē.

¹⁰ Ke haingen than Isaraela, ka habe, Ekölö, Iehova ame ûkhacaköuâ kun ta than he ka hnʼ ödrin ka hnyi hnyamen at Moaba.

¹¹ Haba Jehosafata ame ha, ka habe, Hawa, e ba perofeta anyi Iehova eang, mʼ otin e he ka hnei Iehova a deny? Me ame thu ke athnyabainy than Isaraela, ka habe, Waleû Elisaia nöku Safata, at ame hingölö köien li hnyamö Elia.

¹² Ke haingö Jehosafata, ka habe, E unyin hofuc ho Iehova. Me ame he kâu than Isaraela, me Jehosafata, me than Edoma.

¹³ Ke Elisaia ame ha ka than Isaraela, ka habe, Ieû gak köu? he bi thö ka je perofeta anyin kâmâm, me je perofeta anyin hinyâm. Ke haingen than Isaraela kâu, ka habe, Ohe, anyin a Iehova ame ûkhacaköuâ kun ta than eang he ka hnʼ ödrin ka hnyi hnyamen at Moaba.

¹⁴ Ke haingö Elisaia, ka habe, Kia inya Iehova tuhan sabaoth wale oge me tot hnyi hnyimakan, oge ne ca ogâ nâ hnyimakö Jehosafata than Juda, me oge me ca he bi nya ka bwele köu, me ô u.

¹⁵ Ke walang ang hom but könya ke at ame ânyâ ûnyi khumöng. Ke ame tiga ânyâ ûnyi khumöng, me ame o but kâu hnyamö Iehova.

¹⁶ Me e ame ha, ka habe, Walang hna ha hnö Iehova, ka habe, Hiny ju je thop ae se hnyi hnyegöulen bucen eang.

¹⁷ Anyin a walang hofuc ho Iehova, ka habe, Öbun e ca he ka wâ ang, me we, ke so bi ame he ka unöngöt hnyigöulen bucen eling ge köiö: mʼ öbun e he ka ic, a öbun, me je hnahat halebun, me omeno a halebun.

¹⁸ Ke ûnyi ae hâhâ e kö Iehova: ke e ame he bi ka hna tavat Moaba ka hnyi hnyamöbun.

¹⁹ Ke öbun e he ka kot je taun hia adre up haginy, me je taun hia ae so, me sö degecâ je ûö ae so hia, me hlöng je hna pupuainy je köiö, me okongoâ je utkânâ hia ae so ge veto.

²⁰ Ke haba hnyi hnyomakatu hnyi ûen adre me hudo hudiny han, me wâ bi, ame o thö köiö hnyi gethen ûheny Edoma, me ame unöngötö hnyei ge köiö.

²¹ Ke a long ut at Moaba a ga o thö je than he ka vat mödrin, me ödrin e hawâ ûkhacaköuâ tavat hia hnyat ae khanʼ ödrin he ka khavâ khaûen vat, ke ne o but ka wahingat minya, me ödrin e tot hnyi hnyigot.

²² Ke ödrin e vesâ hnyi hnyomakatu kong, ke ame hat dö seûno hon köiö, ke haba at Moaba ödrin e wâ köiö cici ödrin, kʼ ame helâ me dra:

²³ me haingödrin ka kabe, Waleû dra; adre hia but kot je than, kʼ ödrin e ivatköu: anyin a wale, at Moaba lö, ate me he bi walang ka sei.

²⁴ Me ödrin e o but ka hnyi hunuma anyin at Isaraela, me ame tot at Isaraela me kot at Moaba, mʼ ödrin e kec hnyi hnyimaködrin: ke ödrin e ûhnûhnû me kot tilâ at Moaba.

²⁵ Ke ödrin e hagutâ hnyikânâi ta je taun; me ve khûö veto hon je utkânâ hia ae so, me ounöngötâ; ke ödrin e hlöng je hna pupuainy köiö hia, me sö degecâ je ûö hia ae so: kʼ adre hnen biju hnyi Kiraharaseth je vetoiny; kʼ ame he igigilo e tavat koloû, me kot e.

²⁶ Ke a wâ but than Moaba a gʼ ame hwege but vat hon, me e ame hom tavat a seven haded, tavat hok hele vat, me me thu vat ka than Edoma: ke ca khanʼ ödra.

²⁷ Me e ame hom nokon a atö, at ame he ka than hwaban, me hudo e hnân hudiny leû hon hna up haginy. Ke e gan hmâ anyidrin hmonyin ka at Isaraela: me ödrin e hna e me he ka hnyi idrin hnyei.